Kgaolo 10

Ke Eng fa Tsala Ya me E Nkutlwisitse Botlhoko?

“Kerry e ne e le tsala ya me e kgolo. O ne a se na koloi ka jalo ke ne ke mo pega mo koloing ya me letsatsi le letsatsi fa re tswa tirong. Le fa go ntse jalo, ke ne ka simolola go nna le boikutlo jwa gore o ne a batla go nna tsala ya me fela ka gonne a batla thuso ya me.

“E ne e tle e re fa a tsena mo koloing a bo a simolola go bua ka founo kgotsa go romela melaetsa. O ne a se ke a ntebogela go bo ke mo pegile e bile o ne a tlogela go ntsha madi a peterolo. Mme fa a tlotla o ne a rata go tshwayatshwaya ba bangwe diphoso. Ke ne ka betisiwa pelo ke go bo ke ile ka itshokela seno lobaka lo loleele jaana!

“Letsatsi lengwe ke ne ka tlhalosetsa Kerry ka bopelonomi gore ga ke na ke tlhola ke kgona go mo pega fa ke tswa tirong. Fa e sa le ka nako eo ga a tlhole a batla le go mpona—e leng se se ntlhomamisetsang gore o ne a batla go nna tsala ya me fela ka gonne a ne a batla thuso ya me. Mme seo se nkutlwisa botlhoko tota!”—Nicole.

TOTA le ditsala tse di ntshanang seinong di ka diragalelwa ke seno. Gompieno ke monwana le lenala; kamoso ga ba batle le go buisana. Go tla jang gore ditsala tse di ntshanang seinong di fetoge baba ka bonako jalo?

● Jeremy ene, dilo di ne di ntse di mo tsamaela sentle go fitlha tsala ya gagwe e kgolo e fudugela kwa lefelong le le neng le le bokgakala jwa dikilometara di ka nna 1 600. Jeremy a re: “Fa a sena go fuduga ga a ise a ko a foune mme seo se ne sa nkutlwisa botlhoko tota.”

● Kerrin o ne a simolola go lemoga gore botho jwa tsala ya gagwe bo a fetoga. Ba ne ba na le dingwaga di le tlhano e le ditsala tse dikgolo. Kerrin a re: “Ke ne ke tshwenngwa thata ke tsela e a neng a itshwara ka yone le e a neng a bua ka yone. O ne a simolola go nyatsa le go bua maswe ka dilo tse ke neng ke di tsaya di le botlhokwa. Fa re ne re leka go rarabolola bothata jono o ne a ntatofatsa ka gore ke itira mosiami le gore ga ke ikanyege, a bo a re botsala jwa rona bo ne bo sa mo solegele molemo ka sepe!”

● Gloria ene o ne a bona fela tsala ya gagwe e kgolo e mo latlha kwantle ga lebaka kgotsa tlhaloso. Gloria a re: “Re simolotse re utlwana tota mme o ne a ba a re go ntse jaaka e kete re bana ba motho. Ke ne ka bona fela a sa tlhole a batla go dira sepe le nna mme o ne a dira diipato tse di sa utlwaleng.”

● Bothata jwa ga Laura le Daria bo simologile fa Daria a tseela Laura lekau. Laura a re: “O ne a kgona go fetsa diura a bua le lekau la me mo founong le mororo a itse gore re a ratana. Ke ne ka tsiediwa ke tsala ya me e kgolo ka ba ka latlhegelwa ke motho yo gongwe ke neng ke tla nyalana le ene—ka nako e le nngwe!”

Matsapa di a Tsere Kae?

Rotlhe re dira diphoso. Ka jalo o ka lebelela gore nako nngwe tsala ya gago e tla bua kgotsa e tla dira sengwe se se ka go utlwisang botlhoko. Fa o akanya sentle, le wena go ka tswa go na le makgetlo mangwe a o ileng wa utlwisa ba bangwe botlhoko ka one. (Moreri 7:22) Mosetsana mongwe yo o bidiwang Lisa a re: “Rotlhe ga re a itekanela ka jalo re tla nna re direlana diphoso ka dinako dingwe.” Gantsi kgotlhang e e bakwang ke bothata jo bo sa reng sepe e ka rarabololwa ka gore go buisanwe.

Le fa go ntse jalo, mo maemong a mangwe kgotlhang ga e bakwe ke bothata jo bo diregileng gangwe fela, go na le moo e bakwa ke go lemoga gore ga lo tshwane ka mogopolo jaaka lo ne lo akanya. Se lebale gore fa o ntse o gola o ka nna wa se tlhole o kgatlhegela dilo tse o neng o di kgatlhegela pele—go ntse jalo le ka tsala ya gago. O ka dira eng fa o lemoga gore wena le tsala ya gago lo a katogana?

Kafa o ka Namolang Botsala Jwa Lona ka Teng

A seaparo sengwe se o se ratang se kile sa gagoga? O ne wa dira eng? A o ne wa se latlha? kgotsa wa se baakanya? Ga go pelaelo gore seo se ne se ikaegile ka gore seaparo seo se ne se senyegile go le kana kang le gore o ne o se tsaya se le botlhokwa go le kana kang. Fa e le gore tota o ne o se rata, o ka tswa o ile wa batla ditsela tsa go se baakanya. Gantsi go ntse jalo le ka botsala jo bo senyegileng. Go ikaegile thata ka gore botsala joo bo sentswe ke eng le gore o bo tsaya bo le botlhokwa go le kana kang.a

Ka sekai, fa mongwe a ile a bua kgotsa a dira sengwe se se go utlwisitseng botlhoko, o ka nna wa tlhokomologa seo ka go latela kgakololo ya Pesalema 4:4 e e reng: ‘Buela mo pelong ya gago, mo bolaong jwa gago, mme o didimale.’ Ka jalo, pele ga o latlha tsala ya gago, akanya sentle. A o go utlwisitse botlhoko ka boomo? Fa o sa tlhomamisege, tsaya fela gore ga a dira seo ka boomo. Gantsi go a thusa go letla ‘lorato go bipa maleo a le mantsi.’—1 Petere 4:8.

O ka nna wa bo wa leka go bona gore a ga o a nna le seabe mo bothateng joo. Ka sekai, fa tsala ya gago e rothisitse mmutla madi, a e ka tswa e le gore go ne go sa tlhokege gore o mo imetse ka sephiri seo? Selo sengwe se o ka se akanyetsang ke gore a e ka tswa e le wena o dirang gore o utlwisiwe botlhoko—gongwe ka go bua thata kgotsa go bua dilo tsa boeleele. (Diane 15:2) Fa go le jalo, ipotse, ‘A ke tlhoka go dira diphetogo dingwe gore tsala ya me e ntlotle?’

“A re Ka Bua Ka se Se Diregileng?”

Go tweng fa o ikutlwa gore o ka se kgone go tlogela kgang eo fela? Fa go le jalo, go ka nna molemo go bua le tsala ya gago ka yone. Mme gone o ele tlhoko gore o se ka wa dira jalo fa o sa ntse o galefile. Baebele ya re: “Motho yo o galefileng o tsosa manganga, mme yo o bonya go galefa o kokobetsa komano.” (Diane 15:18) Ka jalo, leta gore o wele makgwafo pele, e bo e le gone o lekang go rarabolola bothata.

Fa o ya go bua le tsala ya gago, se lebale gore boikaelelo jwa gago ga se go ‘busetsa bosula ka bosula.’ (Baroma 12:17) Go na le moo, ke go baakanya dilo le go namola botsala jwa lona. (Pesalema 34:14) Ka jalo mmulele mafatlha. O ka nna wa re: “Ga re bolo go nna ditsala. A re ka bua ka se se diregileng?” Fa o setse o itse gore ke eng se se bakileng bothata go ka nna motlhofo go namola botsala jwa lona. Tota le fa tsala ya gago e sa batle go bua ka kgang eo, o ka gomodiwa ke go itse gore o dirile sengwe go namola botsala jwa lona.

Mme gone, tlhomamisega gore le fa “go na le balekane ba ba sekametseng mo go senyaneng” gape “go na le tsala e e ngaparelang go gaisa morwarra motho.” (Diane 18:24) Tota le ditsala tse di ntshanang seinong di tle di nne le mathata. Fa seo se direga leka ka bojotlhe go namola botsala jwa lona. Aitsane, go iketleeletsa go rarabolola dikgotlhang ke bosupi jwa gore jaanong o a gola.

BALA GO YA PELE KA KGANG ENO MO BOLUMONG YA 1, KGAOLO 8

[Ntlha e e kwa tlase]

DITEMANA TSA BOTLHOKWA

“Fa go kgonega, kafa go ka kgonegang ka gone mo go lona, agisanang le batho botlhe.”—Baroma 12:18.

KAKANTSHO

Pele ga o kgotswela tsala ya gago, utlwa pele gore ene a reng.—Diane 18:13.

A O NE O ITSE GORE . . .  ?

Ditsala tse di molemo ga di nne di le mmogo ka dinako tsotlhe, di a itse gore mongwe le mongwe wa bone o tlhoka go tlwaelana le batho ba bangwe. (Diane 25:17) Go tsaya nako yotlhe ya tsala ya gago le go batla gore a age a na le wena fela, go ka senya botsala jwa lona.

SE KE SE IKAELETSENG!

Fa ke tshwanelwa ke go bolelela tsala ya me gore e nkutlwisitse botlhoko, ke tla simolola ka gore ․․․․․

Tota le fa ke utlwisitswe botlhoko ke se tsala ya me e ntirileng sone, ke tla namola botsala jwa rona ka go ․․․․․

Se nka ratang go se botsa batsadi ba me ka kgang eno ke gore ․․․․․

O AKANYANG?

● Ke ka ntlha yang fa ka dinako tse dingwe botsala bo fela ka bonya ka bonya?

● Ke dikgotlhang dife tse o ka didimalang fela ka tsone mme ke dife tse o ka ratang go di tlotla le tsala ya gago e e go utlwisitseng botlhoko?

● Go utlwisiwa botlhoko ke tsala go ka go ruta dilo dife tse di botlhokwa?

● Ke dilo dife tse o ka di dirang gore go se ka ga nna motlhofo go utlwisiwa botlhoko ke tsala ya gago?

[Mafoko a a mo go tsebe 95]

“Fa ke ne ke kgona go busetsa dilo morago, ke ne nka se lebelele gore botsala jwa rona e nne jo bo se nang mathata gotlhelele. Nkabo ke se kile ka tlhoma mogopolo thata mo makoeng a gagwe go na le moo, nkabo ke ile ka mo reetsa ka kelotlhoko le go mo ema nokeng. Jaanong ke lemogile gore, go rarabolola mathata le dikgwetlho ke gone go dirang gore botsala bo atlege.”—Keenon

[Setshwantsho mo go tsebe 94]

Fa ditsala di na le kgotlhang go ka tshwana le fa seaparo se gagogile—mme dilo tseno ka bobedi di ka baakanngwa