Tlhopha Boitlosobodutu jo bo Itumedisang Jehofa

Jehofa ke “Modimo yo o itumetseng.” (1 Timotheo 1:11) O batla gore re itumele e bile re itumelele botshelo. O a itumela fa re ipeela nako kwa thoko mo ditirong tsa rona gore re ikhutse. Mo thutong eno, re tla bona gore re ka dirisa jang nako ya rona ya go itapolosa ka ditsela tse di itumedisang le tse di kgotsofatsang e bile gape di itumedisa Jehofa.

1. Re tshwanetse go nna re gopotse eng fa re tlhopha boitlosobodutu?

O rata go dira eng fa o itapolosa? Ba bangwe ba rata go dirisa nako ya bone ya go itapolosa ba le kwa gae ba bala buka, ba reeditse mmino, ba lebile filimi kgotsa ba lebile sengwe mo Internet. Ba bangwe ba rata go dira dilo tse di jaaka go thuma kgotsa go tshameka bolo ba na le ditsala tsa bone. Sengwe le sengwe fela se re se tlhophang gore re itlose bodutu, re tshwanetse go tlhomamisa gore a ‘Morena o a se amogela.’ (Baefeso 5:10) Go botlhokwa gore re dire jalo ka gonne boitlosobodutu jo batho ba bo lebelelang gone jaanong bo na le dilo tse Jehofa a di tlhoileng, tse di jaaka dintwa, boitsholo jo bo sa siamang jwa tlhakanelodikobo kgotsa bodimona. (Bala Pesalema 11:5.) Ke eng se se tla re thusang gore re tlhophe boitlosobodutu jo bo siameng?

Fa re tlhopha ditsala tse di ratang Jehofa, di ka re tlhotlheletsa ka tsela e e siameng e bile di ka re tlhotlheletsa go tlhopha boitlosobodutu jo bo siameng. Jaaka re ithutile mo thutong e e fetileng, “yo o tsamayang le batho ba ba botlhale o tla nna botlhale.” Ka fa letlhakoreng le lengwe, fa re fetsa nako e ntsi le batho ba ba sa rateng melao ya ga Jehofa, ‘dilo ga di na go re tsamaela sentle.’​—Diane 13:20.

2. Goreng go le botlhokwa go ela tlhoko gore re fetsa nako e kae re itlosa bodutu?

Tota le fa re itse gore Jehofa o amogela boitlosobodutu jo re bo tlhophang, re tshwanetse go ela tlhoko gore ga re fetse nako e ntsi re le mo go jone. Go seng jalo, ga re kitla re nna le nako e e lekaneng ya go dira dilo tse di botlhokwa thata. Baebele e re kgothaletsa gore re ‘dirise nako ya rona sentle.’​—Bala Baefeso 5:15, 16.

ITHUTE MO GO OKETSEGILENG

Ithute gore o ka dira jang ditshwetso tse di siameng tse di amanang le boitlosobodutu.

3. Tila boitlosobodutu jo bo sa siamang

Goreng re tshwanetse go tlhopha boitlosobudutu jwa rona ka kelotlhoko? Tshameka BIDIO eno, lo bo lo tlotla ka dipotso tse di latelang.

BIDIO: Ke Tshwanetse go Itlosa Bodutu ka Dilo Tse di Ntseng Jang? (4:39)

• Metshameko ya kwa Roma wa bogologolo e tshwana jang le boitlosobodutu jwa gompieno?

• Mo bidiong eno, Thuto o ithutile eng ka boitlosobodutu?

Bala Baroma 12:9, lo bo lo tlotla ka potso eno:

• Temana eno e ka go thusa jang gore o tlhophe boitlosobodutu jo bo siameng?

Dilo dingwe tse Jehofa a di tlhoileng ke dife? Bala Diane 6:16, 17 le Bagalatia 5:19-21. Fa lo sena go bala temana nngwe le nngwe, tlotlang ka potso eno:

• Ke dilo dife tse di umakiwang mo ditemaneng tseno tse di tlwaelegileng mo boitlosobodutung jwa gompieno?

Dipotso tse di ka go thusang go tlhopha boitlosobodutu ka botlhale

Ipotse jaana:

• Eng? A boitlosobodutu jono bo na le dilo tse Jehofa a di tlhoileng?

• Leng? A bo kgoreletsa dilo tsa botlhokwa thata?

• Mang? A bo dira gore ke atamalane kgotsa ke fetse nako e ntsi le batho ba ba sa rateng Jehofa?

Go botlhokwa thata gore o nnele kgakala le dilo tse di tla go tsenyang mo kotsing. Ke gone ka moo re tshwanetseng go tila boitlosobodutu jo re belaelang gore ga bo a siama

4. Dirisa nako ya gago ka botlhale

BIDIO: Ke Eng se se Laolang Nako ya Gago? (2:45)

• Le fa gone mokaulengwe yo o mo bidiong eno a ne a sa lebelele sepe se se sa siamang, bothata jwa gagwe e ne e le eng?

Bala Bafilipi 1:10, lo bo lo tlotla ka potso eno:

• Temana eno e ka re thusa jang go bona gore re fetsa nako e e kana kang re itlosa bodutu?

5. Tlhopha boitlosobodutu jo bo siameng

Le fa go na le boitlosobodutu jo bo sa itumediseng Jehofa, go na le dilo di le dintsi tse di kgatlhang tse di mo itumedisang. Bala Moreri 8:15 le Bafilipi 4:8, lo bo lo tlotla ka potso eno:

• Ke boitlosobodutu bofe jo bo siameng jo o bo ratang?

O ITHUTILE ENG?

Jehofa o batla gore re tlhophe boitlosobodutu jo bo siameng e bile re bo itumelele.

Poeletso

• Bakeresete ba tshwanetse go tila boitlosobodutu jo bo ntseng jang?

• Goreng re tshwanetse go ela tlhoko nako e re e fetsang mo boitlosobodutung?

• Goreng re tshwanetse go tlhopha boitlosobodutu jo bo itumedisang Jehofa?

DINTLHA TSE DINGWE

Ithute gore ke mang yo o nang le boikarabelo jwa go re tlhophela boitlosobodutu.

“A Basupi ba ga Jehofa ba Iletsa Difilimi, Dibuka Kgotsa Dipina Tse di Rileng?” (Setlhogo se se mo website)

Utlwa gore ke eng se se ka go thusang go dira ditshwetso tse di siameng malebana le boitlosobodutu.

“A Boitlosobodutu Jwa Gago bo go Solegela Molemo?” (Tora ya Tebelo, October 15, 2011)

Bala setlhogo se se reng “Ke Ile Ka bo Ka Fenya Letlhoo,” mme o utlwe gore ke eng se se dirileng gore monna mongwe a fetole boitlosobodutu jwa gagwe.

“Baebele e Fetola Matshelo a Batho” (Tora ya Tebelo, February 1, 2010)

Bona kafa mmê yono a dirang tshwetso e e siameng ka gone malebana le boitlosobosutu jo bo nang le bodimona.

Tila Boitlosobodutu jo bo Nang le Bodimona (2:02)