THUTO 55
Thusa Phuthego ya Lona
Mo lefatsheng lotlhe, batho ba le bantsintsi ba itumelela go obamela Jehofa mo diphuthegong tse di farologaneng. Ba lebogela thuto le kaelo e ba e newang koo, e bile ba iketleeleditse go thusa phuthego ka ditsela di le dintsi. A ke tsela e o ikutlwang ka yone ka phuthego ya lona?
1. O ka dirisa nako le maatla a gago ka ditsela dife go thusa phuthego?
Rotlhe re ka kgona go thusa mo phuthegong. Ka sekai, a mo phuthegong ya lona go na le bangwe ba ba godileng kgotsa ba ba bokoa? A o ka ba thusa gore ba kgone go nna gone kwa dipokanong? Kgotsa a o ka ba thusa ka ditsela tse dingwe, tse di jaaka go ba ela dishopong kgotsa go ba phepafaletsa ntlo? (Bala Jakobe 1:27.) Gape re ka ithaopela go phepafatsa le go tlhokomela Holo ya Bogosi. Ga go na ope yo o re pateletsang go dira dilo tseno. Go rata Jehofa le bakaulengwe ba rona go re tlhotlheletsa gore ‘re ithaope ka go rata.’—Pesalema 110:3.
Basupi ba ba kolobeditsweng ba ka kgona go thusa phuthego ka ditsela tse dingwe gape. Bakaulengwe ba ba tshwanelegang ba ka direla e le batlhanka ba bodiredi, mme fa nako e ntse e ya, ba bo ba nna bagolwane. Bakaulengwe le bokgaitsadi ba ka nna le seabe se se oketsegileng mo tirong ya go rera ka go nna babulatsela. Basupi bangwe ba ka thusa ka go ithaopela go aga mafelo a kobamelo kgotsa ka go fudugela kwa lefelong le le nang le phuthego e e tlhokang go thusiwa ka ditsela tse dingwe.
2. Re ka dirisa jang dilo tse re nang le tsone go thusa phuthego?
Re ka kgona go “tlotla Jehofa ka dilo tsa [rona] tse di tlhwatlhwakgolo.” (Diane 3:9) Re itumelela go ntsha madi le dilo tse dingwe tse re nang le tsone go thusa phuthego ya rona, le go ema nôkeng tiro ya go rera e e dirwang mo lefatsheng lotlhe. (Bala 2 Bakorintha 9:7.) Gape meneelo e re e ntshang e dirisiwa mo tirong ya namolo. Bakaulengwe le bokgaitsadi ba le bantsi ba tlhopha “go beela sengwe kwa thoko” ka metlha gore ba kgone go ntsha moneelo. (Bala 1 Bakorintha 16:2.) Re ka tsenya moneelo o re o ntshang mo mabokosong a moneelo kwa mafelong a re obamelang kwa go one, kgotsa re ka dirisa donate.jw.org mo Internet. Jehofa o re naya tshono ya go mmontsha gore re a mo rata ka tsela e re tlhophang go dirisa dilo tsa rona ka yone.
ITHUTE MO GO OKETSEGILENG
Ela tlhoko ditsela dingwe tse o ka thusang phuthego ka tsone.
3. Re ka dirisa dilo tse re nang le tsone
Jehofa le Jesu ba rata batho ba ba itumelelang go aba. Ka sekai, Jesu o ne a akgola motlholagadi mongwe wa mohumanegi yo o neng a na le madi a mannye thata, mme gone a bo a ntsha moneelo. Bala Luke 21:1-4, lo bo lo tlotla ka dipotso tseno:
A re tlhoka go ntsha madi a mantsi gore re itumedise Jehofa?
Jehofa le Jesu ba ikutlwa jang fa re ntsha moneelo ka go rata?
Fa o batla go bona gore meneelo ya rona e dirisiwa jang, tshameka BIDIO eno. Go tswa foo, lo bo lo tlotla ka potso e e latelang.
Meneelo e dirisiwa jang gore diphuthego di solegelwe molemo mo lefatsheng lotlhe?
4. Re ka ithaopela go thusa
Mo metlheng ya bogologolo, baobamedi ba ga Jehofa ba ne ba dira ka natla go tlhokomela mafelo a ba neng ba obamela mo go one. Seo se ne se sa akaretse go ntsha moneelo wa madi fela. Bala 2 Ditiragalo 34:9-11, lo bo lo tlotla ka potso eno:
Moiseraele mongwe le mongwe o ne a thusa jang go tlhokomela ntlo ya ga Jehofa kgotsa lefelo la kobamelo?
Fa o batla go bona gore Basupi ba ga Jehofa ba latela jang sekao seo se go buiwang ka sone mo Baebeleng, tshameka BIDIO eno. Go tswa foo, lo bo lo tlotla ka dipotso tse di latelang.
Ke eng fa go le botlhokwa gore Holo ya rona ya Bogosi e nne e le phepa e bile e le mo maemong a a siameng?
O ka thusa ka ditsela dife?
5. Bakaulengwe ba ka kgaratlhela go nna le maikarabelo a a oketsegileng
Baebele e kgothaletsa banna ba Bakeresete gore ba kgaratlhele go dira sotlhe se ba ka se kgonang gore ba thuse phuthego. Fa o batla go bona sekai sa seo, tshameka BIDIO eno. Go tswa foo, lo bo lo tlotla ka potso e e latelang.
Mo bidiong eno, Ryan o ile a dira eng gore a kgone go thusa phuthego ka mo go oketsegileng?
Baebele e tlhalosa dilo tse di lebeletsweng mo bakaulengweng ba ba direlang e le batlhanka ba bodiredi le bagolwane. Bala 1 Timotheo 3:1-13, lo bo lo tlotla ka dipotso tseno:
MONGWE A KA BOTSA A RE: “Basupi ba ga Jehofa ba tsaya kae madi a go tshegetsa tiro ya bone?”
O ka mo araba jang?
O ITHUTILE ENG?
Jehofa o lebogela thata maiteko a re a dirang go thusa phuthego re dirisa nako ya rona, maatla a rona le dilo tse re nang le tsone.
Poeletso
Re ka dirisa nako le maatla a rona jang go thusa phuthego?
Re ka dirisa jang dilo tse re nang le tsone go thusa phuthego?
O ka rata go thusa phuthego ka ditsela dife?
DINTLHA TSE DINGWE
Ithute gore ke eng fa Modimo a sa tlhole a lebeletse gore baobamedi ba gagwe ba ntshe ditsabosome.
“Baebele e a Reng ka go Ntsha Ditsabosome?” (Setlhogo se se mo website)
Baebele e file banna ba ba kolobeditsweng maikarabelo mangwe. Mme go tweng fa e le gore mosadi yo o kolobeditsweng o tshwanelwa ke go dira maikarabelo ao?
“Taolo e Bagolwane ba Nang le Yone mo Phuthegong” (Tora ya Tebelo, February 2021)
Utlwa ka bakaulengwe bangwe ba ba ithontshang dilo dingwe gore ba isetse badumedimmogo le bone dikgatiso.
Bona gore tsela e tiro ya rona e tshegediwang ka madi ka yone e farologana jang le ya madumedi a mangwe.
“Tiro ya Basupi ba ga Jehofa e Tshegediwa Jang ka Madi?” (Setlhogo se se mo website)