THUTO 56
Lwelang Gore go Nne Go na Le Kutlwano mo Phuthegong
Fa re na le badumedimmogo le rona, re ikutlwa fela jaaka Kgosi Dafide a ne a ikutlwa fa a ne a re: “Ruri go molemo e bile go a itumedisa go bo batho ba Modimo ba nna mmogo ka kutlwano!” (Pesalema 133:1) Ga go itiragalele fela gore re tshele ka kutlwano. Mongwe le mongwe wa rona o leka ka natla gore kutlwano eo e tswelele e le teng.
1. Ke eng se se kgatlhang ka batho ba Modimo?
Fa o ya kwa dipokanong tsa rona kwa nageng e nngwe, gongwe o ka tswa o sa tlhaloganye puo e e buiwang koo, mme gone o tla ikutlwa o amogetswe e bile o ratiwa. Ka ntlha ya eng? Ka gonne re ithuta Baebele re dirisa dikgatiso tse di tshwanang gongwe le gongwe. E bile re leka ka natla go ratana. Go sa kgathalesege gore re nna kae, rotlhe re ‘bitsa leina la ga Jehofa, gore re mo obamele ka kutlwano.’—Sefania 3:9, ntlha e e kwa tlase.
2. O ka dira eng gore go nne le kutlwano?
“Ratanang ka pelo yotlhe.” (1 Petere 1:22) O ka dirisa jang kgakololo eno? Go na le go tlhoma mogopolo mo makoeng a ba bangwe, leka go bona dilo tse di molemo tse ba di dirang. O se ka wa fetsa nako fela le batho ba ba ratang dilo tse o di ratang, mme gape, leka go itse bakaulengwe le bokgaitsadi ba ba farologaneng le wena. Gape re ka leka ka natla go tlosa maikutlo a tlhaolele a re ka tswang re na le one.—Bala 1 Petere 2:17.a
3. O tla dira eng fa o na le kgotlhang le Mokeresete yo mongwe?
Le fa gone re tshela ka kutlwano, ga re a itekanela. Ka dinako tse dingwe re a swabisana kgotsa re utlwisana botlhoko. Ka jalo, Lefoko la Modimo le re bolelela gore re ‘tswelele . . . re itshwarelana,’ le bo le re: “Lo tshwanetse go itshwarelana fela jaaka Jehofa a ne a lo itshwarela.” (Bala Bakolosa 3:13.) Re utlwisa Jehofa botlhoko makgetlo a le mantsi, le fa go ntse jalo, o nna a re itshwarela. Ka jalo, o lebeletse gore le rona re itshwarele bakaulengwe ba rona. Fa o lemoga gore o utlwisitse yo mongwe botlhoko, tsaya kgato pele go rarabolola bothata.—Bala Mathaio 5:23, 24.b
ITHUTE MO GO OKETSEGILENG
Bona dilo tse o ka di dirang gore go nne le kutlwano le kagiso mo phuthegong.
O tla dira eng gore lo agisane?
4. Fenya tlhaolele
Re batla go rata bakaulengwe ba rona botlhe. Mme gone, go ka tswa go le thata gore re amogele motho yo go lebegang a sa tshwane le rona. Ke eng se se ka re thusang? Bala Ditiro 10:34, 35, lo bo lo tlotla ka dipotso tseno:
Jehofa o amogela batho ba mefuta yotlhe gore e nne Basupi ba gagwe. O ka mo etsa jang ka tsela e o ikutlwang ka yone ka batho ba ba farologaneng le wena?
Ke mefuta efe ya tlhaolele e e tlwaelegileng mo lefelong la lona e o batlang go e tila?
Bala 2 Bakorintha 6:11-13, lo bo lo tlotla ka potso eno:
O ka ithuta jang go rata bakaulengwe le bokgaitsadi ba gago botlhe?
5. Itshwarele o gololesegile e bile o dire kagiso
Jehofa o re itshwarela a gololesegile le fa gone a se kitla a tlhoka gore re mo itshwarele. Bala Pesalema 86:5, lo bo lo tlotla ka dipotso tseno:
Jehofa o itshwarela go le kana kang?
Goreng o lebogela tsela e Jehofa itshwarelang ka yone?
Ke maemo afe a a ka dirang gore go nne thata gore re utlwane le ba bangwe?
Re ka etsa Jehofa jang mme re tswelele re utlwana le bakaulengwe le bokgaitsadi ba rona? Bala Diane 19:11, lo bo lo tlotla ka potso eno:
Fa mongwe a go tena kgotsa a go kgopisa, o ka dira eng go tokafatsa boemo joo?
Ka dinako tse dingwe re kgopisa ba bangwe. Fa seo se direga, re tshwanetse go dira eng? Tshameka BIDIO eno, lo bo lo tlotla ka potso e e latelang.
Mo bidiong eno, ke eng se kgaitsadi a ileng a se dira gore ba agisane?
6. Tlhoma mogopolo mo dilong tse di molemo tse bakaulengwe le bokgaitsadi ba gago ba di dirang
Fa re itse bakaulengwe le bokgaitsadi ba rona botoka, re tla itse dinonofo tsa bone le makoa a bone. Re ka dira jang gore re tlhome mogopolo mo dilong tse di molemo tse ba di dirang? Tshameka BIDIO eno, lo bo lo tlotla ka potso e e latelang.
Ke eng se se ka go thusang gore o bone dilo tse di molemo tse bakaulengwe le bokgaitsadi ba gago ba di dirang?
Jehofa o tlhoma mogopolo mo dilong tse di molemo tse re di dirang. Bala 2 Ditiragalo 16:9a, lo bo lo tlotla ka potso eno:
Go itse gore Jehofa o tlhoma mogopolo mo dilong tse di molemo tse o di dirang, go dira gore o ikutlwe jang?
Tota le teemane e ntle e na le dikarolo tse di sa siamang, mme gone e sa ntse e le tlhwatlhwakgolo. Ka tsela e e tshwanang, bakaulengwe le bokgaitsadi ba rona botlhe ga ba itekanela, mme ba botlhokwa mo go Jehofa
BATHO BANGWE BA RE: “Pele ga ke itshwarela mongwe, o tshwanetse go berekela gore ke mo itshwarele.”
Ke eng fa re tshwanetse go iketleeletsa go itshwarela ba bangwe?
O ITHUTILE ENG?
O ka thusa gore go tswelele go na le kutlwano mo phuthegong ka go itshwarela le go rata bakaulengwe le bokgaitsadi ba gago botlhe.
Poeletso
O ka fenya tlhaolele jang?
O tla dira eng fa o na le kgotlhang le Mokeresete yo mongwe?
Goreng o batla go etsa sekao sa ga Jehofa sa go itshwarela ba bangwe?
DINTLHA TSE DINGWE
Ithute gore setshwantsho sengwe sa ga Jesu se ka re thusa jang gore re tile go atlhola ba bangwe.
A re tlhoka go kopa maitshwarelo le fa re akanya gore ga re a dira sepe se se phoso?
“Go Kopa Maitshwarelo—Tsela ya go Dira Kagiso” (Tora ya Tebelo, November 1, 2002)
Bona kafa bangwe ba ileng ba ithuta go se tlhaole batho ba bangwe ka gone.
Ithute gore o ka rarabolola jang dikgotlhang pele ga di ka baka mathata mo phuthegong.
“O ka Rarabolola Jang Dikgotlhang ka Lorato?” (Tora ya Tebelo, May 2016)
a Ntlha e e Kwa Bofelong ya 6 e bontsha kafa lorato lo tlhotlheletsang Bakeresete go tila go anamisa malwetse a a tshelanwang ka gone.
b Ntlha e e Kwa Bofelong ya 7 e tlotla ka ditsela tsa go rarabolola dikgang tsa kgwebo le tsa molao.