THUTO 57
O Tshwanetse go Dira Eng fa o Dirile Boleo jo bo Masisi?
Le fa gone o rata Jehofa fela thata e bile o leka ka natla go tila go dira dilo tse di tla mo utlwisang botlhoko, nako le nako o tla dira diphoso. Le fa go ntse jalo, diphoso tse dingwe di masisi thata go feta tse dingwe. (1 Bakorintha 6:9, 10) Fa o dirile boleo jo bo masisi, gopola gore Jehofa ga a tlogela go go rata; o iketleeleditse go go itshwarela le go go thusa.
1. Re tshwanetse go dira eng gore Jehofa a re itshwarele?
Batho ba ba ratang Jehofa ba utlwa botlhoko thata fa ba lemoga gore ba dirile boleo jo bo masisi. Mme ba gomodiwa ke tsholofetso eno e Jehofa a e neileng batho ba gagwe: “Le fa gone maleo a lona a le mahibidu, a tla dirwa masweu fela jaaka kapoko.” (Isaia 1:18) Fa re ikwatlhaya ka pelo yotlhe, Jehofa o tla re itshwarela a gololesegile. Re ikwatlhaya jang? Re swabela se re se dirileng, mme re tlogela go dira se se bosula re bo re kopa Jehofa gore a re itshwarele. Go tswa foo, re leka ka natla go fetola tsela e e sa siamang e re ntseng re akanya ka yone kgotsa re tlogela mokgwa o o sa siamang o o dirileng gore re leofe, re bo re leka go tshela ka melao ya ga Jehofa e e siameng.—Bala Isaia 55:6, 7.
2. Jehofa o dirisa bagolwane jang go re thusa fa re dirile boleo?
Fa re dirile boleo jo bo masisi, Jehofa o re bolelela gore re ‘bitse bagolwane ba phuthego.’ (Bala Jakobe 5:14, 15.) Bagolwane bano ba rata Jehofa e bile ba rata batho ba ba mo direlang. Ba rutilwe gore ba ka re thusa jang gore re boe re nne ditsala tsa ga Jehofa gape.—Bagalatia 6:1.
Bagolwane ba re thusa jang fa re dirile boleo jo bo masisi? Bagolwane ba le babedi kgotsa ba le bararo, ba tla dirisa Baebele go re bontsha gore ke eng fa se re se dirileng se le phoso. Gape ba tla re naya dikakantsho le kgakololo e e tla re thusang gore re se ka ra boeletsa boleo joo gape. Fa motho yo o dirileng boleo jo bo masisi a sa ikwatlhaye, bagolwane ba tla mo tlosa mo phuthegong gore a se ka a tlhotlheletsa ba bangwe ka tsela e e sa siamang.
ITHUTE MO GO OKETSEGILENG
Ithute gore o ka tlhaloganya jang kafa Jehofa a re thusang ka gone fa re dirile boleo jo bo masisi, le gore o ka lebogela seo jang.
3. Go ipolela maleo go re thusa gore re baakanye botsala jwa rona le Jehofa
Boleo bope fela jo re bo dirang bo utlwisa Jehofa botlhoko, ka jalo re tshwanetse go mmolelela gore re leofile. Bala Pesalema 32:1-5, lo bo lo tlotla ka potso eno:
Ke eng fa go le molemo gore re bolelele Jehofa maleo a re a dirileng go na le go leka go a fitlha?
Fa re kopa thuso mo bagolwaneng fa re sena go bolelela Jehofa maleo a re a dirileng, re tla ikutlwa botoka. Tshameka BIDIO eno, lo bo lo tlotla ka potso e e latelang.
Mo bidiong eno, bagolwane ba ne ba thusa Canon jang gore a boele kwa go Jehofa?
Fa re bua le bagolwane, re tshwanetse go ba bolelela sengwe le sengwe; ba iketleeleditse go re thusa. Bala Jakobe 5:16, lo bo lo tlotla ka potso eno:
Fa re bolelela bagolwane sengwe le sengwe, seo se ka dira jang gore ba kgone go re thusa?
Ipolele boleo jo o bo dirileng, bolelela bagolwane sengwe le sengwe, e bile o amogele thuso e Jehofa a go e nayang
4. Jehofa o bontsha baleofi kutlwelobotlhoko
Fa motho yo o dirileng boleo jo bo masisi a gana go ikobela melao ya ga Jehofa, o tlosiwa mo phuthegong e bile ga re dirisane le ene. Bala 1 Bakorintha 5:6, 11, lo bo lo tlotla ka potso eno:
Fela jaaka sebediso se bedisa bupi jo bo dubilweng, go dirisana le moleofi yo o sa ikwatlhayeng go ka ama phuthego jang?
E re ka bagolwane ba etsa tsela e Jehofa a utlwelang baleofi botlhoko ka yone, ba tsaya matsapa gore ba thuse batho ba ba tlositsweng mo phuthegong. Batho ba le bantsi ba ba neng ba tlositswe ba ile ba boela mo phuthegong. Ka ntlha ya eng? Le fa go tlosiwa mo phuthegong go ne go le botlhoko, go ne ga ba thusa gore ba lemoge gore se ba neng ba se dirile se ne se le phoso.—Pesalema 141:5.
Tsela e Jehofa a dirisanang le baleofi ka yone e bontsha jang gore o a akanyetsa, o kutlwelobotlhoko e bile o lorato?
5. Jehofa o a re itshwarela fa re ikwatlhaya
Jesu o ne a dirisa setshwantsho se se re thusang go tlhaloganya kafa Jehofa a ikutlwang ka gone fa motho a ikwatlhaya. Bala Luke 15:1-7, lo bo lo tlotla ka potso eno:
Seno se go ruta eng ka Jehofa?
Bala Esekiele 33:11, lo bo lo tlotla ka potso eno:
Ke selo sefe sa botlhokwa se re tshwanetseng go se dira go bontsha gore re a ikwatlhaya?
Fela jaaka modisa, Jehofa o amega thata ka dinku tsa gagwe
BATHO BANGWE BA RE: “Ke tshaba gore fa nka bolelela bagolwane boleo jo ke bo dirileng, ba tla ntlosa mo phuthegong.”
O ka raya motho yo o ikutlwang ka tsela eo o reng?
O ITHUTILE ENG?
Fa re dirile boleo jo bo masisi mme re ikwatlhaya ka pelo yotlhe e bile re ikemiseditse go tlogela go dira se se bosula, Jehofa o tla re itshwarela.
Poeletso
Ke eng fa go le molemo gore re bolelele Jehofa maleo a re a dirileng?
Re tshwanetse go dira eng gore Jehofa a re itshwarele maleo?
Fa re dirile boleo jo bo masisi, ke eng fa re tshwanetse go kopa thuso mo bagolwaneng?
DINTLHA TSE DINGWE
Bona gore Jehofa o ile a bontsha monna mongwe kutlwelobotlhoko ya gagwe jang e e tlhalosiwang mo go Isaia 1:18.
Bagolwane ba leka jang go thusa batho ba ba dirang boleo jo bo masisi
“Bagolwane, Bontshang Gore lo Kutlwelobotlhoko le Gore lo e Lorato” (Tora ya Tebelo, August 2024)
Ela tlhoko kafa baleofi ba ba sa ikwatlhayeng ba bontshiwang lorato le kutlwelobotlhoko ka gone.
“Bagolwane ba ka Thusa Jang ba ba Tlositsweng mo Phuthegong?” (Tora ya Tebelo, August 2024)
Bala pego e e reng “Ke ne Ke Tshwanetse go Boela Kwa go Jehofa,” mme o utlwe gore ke eng fa monna mongwe yo o neng a tlogetse boammaaruri a dumela gore Jehofa o ne a mo gogela kwa go ene.
“Baebele e Fetola Matshelo a Batho” (Tora ya Tebelo, April 1, 2012)