Mei he Kau Lautohí
ʻAʻake ʻa Noá mo e Foʻu ʻo e Vaká (ʻEpeleli-Sune 2007) Naʻá ku ʻosi ʻiloʻi pē naʻe lelei ʻaupito hono foʻu ʻo e ʻaʻaké, ka naʻe ʻikai te u mahinoʻi pe naʻe lelei fēfē. Naʻe fakamatalaʻi ʻi he kupu ko ení ha founga faingofua ke mahinoʻi ai ʻa e anga hono ʻai ʻe hono lōloá, māukupú mo e māʻolungá ke mātuʻaki feʻunga ki he folau tahí. Naʻá ku fili ai ke faʻu mo e kau talavou ʻi heʻemau fakatahaʻangá ha tatau ʻo e ʻaʻaké, ʻo ngāueʻaki ʻa e sīpinga naʻe ʻomaí. Naʻa mau ngaohi ha fanga manu mei he pepá ʻo ʻai kinautolu ki he ʻaʻaké pea tā ʻa e fakatātā ʻo Noa mo hono fāmilí. Naʻa mau ʻilo lahi ange ai ki he meʻa ko eni naʻe hoko ʻi he Tohi Tapú ʻi hono ʻai ke mau hokosia tonu hano konga. Fakamālō lahi atu.
T. A., Siapani
Ko hoku kiʻi foha taʻu onó ʻokú ne manako ʻi hono faʻu ha tatau ʻo ha meʻa. Naʻá ku fiefia mo ia ʻi heʻema maʻu ʻi he ngataʻanga ʻo ha kupu ʻi he ʻĀ Hake! ʻa e ngaahi fakahinohino ki he founga ke faʻu ai ha kiʻi vaka ʻo fakatatau ki he ʻaʻake ʻa Noá. Ko ha efiafi fakafiefia ia naʻá ma maʻú, ʻokú ma fakamālō atu ki hoʻomou kupu mālié! ʻI he māmani femoʻuekina ʻoku tau moʻui aí mo e ngaahi tenge ʻoku fehangahangai mo ʻetau fānaú ʻi he uike kotoa pē ʻi he ʻapiakó, ko ha tāpuaki moʻoni hono ʻomai ha meʻangāue hangē ko e ʻĀ Hake! ke tokoni ki he ngaahi mātuʻá ʻi hono tauhi hake ʻa e fānaú ʻi he ngaahi founga ʻa Sihová.
M. F., ʻAmelika
ʻOku ʻEke ʻe he Toʻutupú . . . Ko e Hā ʻOku Lahi Pehē Ai ʻa e Ngaahi Laó? (Sanuali-Maʻasi 2007) Kuó u ako eni ʻa e Tohi Tapú he taʻu ʻe ono. Neongo ʻoku fuʻu fefeka ʻa e ongo mātuʻá kiate kimautolu fānaú, ʻoku ou ʻiloʻi ʻokú na tokanga moʻoni kiate au. ʻI heʻeku lau ʻa e kupu ko ení, naʻe tokoniʻi ai au ke u mahinoʻi ʻa e tokanga ʻa ʻeku ongo mātuʻá pea ke u houngaʻia ʻi he tokanga fakafoʻituitui mai ʻa Sihova kiate aú.
K. T., Taileni
Naʻá Ku Hoko ko ha Foha Maumau Koloa (Sanuali-Maʻasi 2007) Kuó u ʻilo fekauʻaki mo Sihova talu mei he 1992. Ka naʻe ʻi ai ha taimi ia naʻá ku loto ai au ke moʻui ʻi ha tuʻunga kehe mei he founga ʻa Sihová. ʻI he hangē ko Meros Sunday, naʻá ku hokosia ʻa e ngaahi taimi fiefia mo e taimi mamahi, pea ʻi he hili ʻa e taʻu ʻe tolu mei heʻeku mamaʻo meia Sihová, naʻá ku kamata kole tokoni ai kiate ia. ʻOku ou toe foki eni ki “ʻapi”! Fakamālō atu ki hoʻomou ngāué.
D. K., ʻIukalaine
ʻOku ʻEke ʻe he Toʻutupú . . . Te U Kamata Faialeá Nai ʻAfē? (ʻEpeleli-Sune 2007) ʻOku ou taʻu 15. Lolotonga ʻeku ʻaʻahi ki hoku mehikitangá mo hono malí, naʻá ku fetaulaki ai mo ha tamasiʻi Fakamoʻoni taʻu 17. Naʻá ma kamata talanoa ʻi he ʻInitanetí, ʻo ʻikai hokohoko ʻi he ʻuluaki taimí. Kae kehe, naʻe iku ʻo ma talanoa ʻi he ʻaho kotoa pē, pea kamata ai ke ma femanakoʻaki. Ka ʻi heʻeku lau leva ʻa e kupu ko ení naʻá ku ʻiloʻi ai ko hono moʻoní naʻá ma faialea. ʻI he tokoni ʻa ʻeku ongo mātuʻá mo e kupu ʻi he ʻĀ Hake!, naʻá ku fai ʻa e fili lelei tahá—ke ʻikai toe hokohoko atu ʻa e vahaʻangatae mo e tamasiʻí. ʻOkú ma kei kaumeʻa pē, ka ʻoku ou fakamuʻomuʻa ʻa hoku vahaʻangatae mo Sihová. ʻOku ou fakamālō lahi ʻi hono tokoniʻi au ʻe he kupu ko ení ke u sio ki he tuʻunga moʻoni ʻo e ngaahi meʻá.
D. D., Kānata
Ko e Hā ʻOku Ou Pongia Aí? (Siulai-Sepitema 2007) Naʻe fakalototoʻa ke ʻiloʻi ʻoku ʻikai ko au pē toko taha ʻoku faingataʻaʻia ʻi he pongiá. Naʻe ʻai au ʻe he kupú ni ke u ongoʻi ʻo hangē naʻe lea hangatonu mai ʻa Sihova kiate au, ʻo pehē, “ʻOku ou ʻiloʻi ʻa e meʻa ʻoku hoko kiate koé, ko ia ʻoku ou ʻoatu heni ha fakalototoʻa.”
I. R., Matakesikā