Ko e ʻUluaki ʻŪmatá

ʻOKÚ KE ʻilo ʻa e ʻuluaki meʻa naʻe fai ʻe Noa ʻi heʻene hū ki tuʻa mo hono fāmilí mei he ʻaʻaké? Naʻá ne fai ha feilaulau pe foaki-ʻofa ki he ʻOtuá. ʻOkú ke lava ʻo sio ki hono fai ʻa e meʻá ni ʻi he fakatātā ʻi laló. Naʻe foaki atu ʻe Noa ʻa e meʻaʻofa ko eni ko e fanga manu ko e fakamālō ki he ʻOtuá ʻi heʻene fakahaofi hono fāmilí mei he fuʻu lōmakí.

ʻOkú ke pehē naʻe fiemālie ʻa Sihova ʻi he meʻaʻofa ko ʻení? ʻIo, naʻe pehē. Pea ko ia ai, naʻá ne talaʻofa kia Noa heʻikai te ne toe fakaʻauha ʻa e māmaní ʻaki ha lōmaki.

Naʻe vave ʻa e mōmoa ʻa e funga fonuá, pea kamata leva ʻa Noa mo hono fāmilí ha moʻui foʻou ʻi tuʻa mei he ʻaʻaké. Naʻe tāpuakiʻi kinautolu ʻe he ʻOtuá peá ne tala kiate kinautolu: ‘Kuo pau ke mou maʻu ha fānau tokolahi. Kuo pau ke mou tupu ʻo tokolahi kaeʻoua ke nofoʻi ʻe he tangatá ʻa māmani kātoa.’

Ka ki mui mai, ʻi he taimi ʻe fanongo ai ʻa e kakaí ʻo fekauʻaki mo e fuʻu lōmakí, te nau ilifia nai naʻa toe hoko mai ha lōmaki pehē. Ko ia naʻe ʻomai ʻe he ʻOtuá ha meʻa te ne fakamanatu ki he kakaí ʻene talaʻofa ʻo pehē heʻikai ke toe ʻai ha lōmaki pehē ki he māmaní kotoa. ʻOkú ke ʻilo pe ko e hā naʻá ne ʻai ke fakamanatu ʻaki kiate kinautolú? Ko e ʻūmata.

ʻOku tau faʻa sio ki he ʻūmata ʻi he langí ʻi he ulo mai ʻa e laʻaá ʻi he toki ʻosi ha ʻuha. ʻOku lahi ʻa e ngaahi lanu fakaʻofoʻofa ʻi he ʻūmatá. Kuó ke ʻosi sio ki he ʻūmatá? ʻOkú ke sio ki ai ʻi he fakatātaá?

Ko e meʻa eni naʻe tala ʻe he ʻOtuá: ‘ʻOku ou talaʻofa ʻe ʻikai ʻaupito toe fakaʻauhaʻaki ha lōmaki ʻa e kakaí mo e fanga manú. Te u ʻai ʻeku ʻūmata ʻi he ʻaó. Pea ʻi he ʻasi ʻa e ʻūmatá, te u mamata ki ai pea manatuʻi ʻa ʻeku talaʻofa ko ení.’

Ko ia ʻi haʻo sio ki ha ʻūmata, ko e hā ʻoku totonu ke ne fakamanatu kiate koé? ʻIo, ko e talaʻofa ʻa e ʻOtuá ʻo pehē heʻikai ʻaupito te ne toe fakaʻauha ʻa e māmaní ʻaki ha fuʻu lōmaki.