“ʻAho ʻo e Fakangofua Fakalotu”
ʻI HE mahuʻingaʻia ʻi ha fetalanoaʻaki naʻá ne fai mo e Kau Fakamoʻoni ʻa Sihová, naʻe vaheʻi ai ʻe he pule ako fefine ʻo ha ʻapiako ʻi Pōlani ha “ʻAho ʻo e Fakangofua Fakalotu” maʻa ʻene ʻapiakó. Naʻá ne fokotuʻu ai ke ʻi ai ha kau pole ʻi he lotolotonga ʻo e kau akó—kau Katolika, kau Lotu Puta, mo e Kau Fakamoʻoni ʻa Sihová—ke nau teuteuʻi ha fanga kiʻi malanga nounou ke ʻai ke maheni ai ʻa e kau ako kehé mo ʻenau ngaahi tuí mo e ngaahi tōʻongafaí. Naʻe pole leva ki ai ha Kau Fakamoʻoni ʻa Sihova taʻu hongofulu tupu ʻe toko tolu.
ʻI he aʻu ki he ʻaho ko iá, ko e ʻuluaki ke leá ko e taʻu 15 ko Malwina. ʻI ha konga, naʻá ne fakamatala ai: “Ko e tokolahi ʻo kimoutolu naʻa mou ʻiloʻi kimautolu ki muʻa ke mau kamata kau mai ki he ʻapiako ko ení koeʻuhi he naʻa mau ʻaʻahi atu kiate kimoutolu ʻi homou ngaahi ʻapí. Mahalo pē ʻoku mou fifili ki he ʻuhinga ʻoku mau hokohoko fai ai ʻa e meʻa ko iá. Koeʻuhí he ʻoku mau muimui ki he faʻifaʻitakiʻanga ʻa Sīsū Kalaisí, ʻa ia ko e Tokotaha-Fokotuʻu ia ʻo e lotu faka-Kalisitiané. Naʻá ne malangaʻi ʻa e ongoongo lelei ʻo e Puleʻanga ʻo e ʻOtuá ʻi ha feituʻu pē naʻe lava ke maʻu ai ʻa e kakaí. Ko e kau ʻapositoló mo e muʻaki kau Kalisitiane kehé naʻa nau fai ʻa e meʻa tatau. ʻI he ngaahi feituʻu lahi, ʻoku kātekina ai ʻe he Kau Fakamoʻoni ʻa Sihová ʻa e ngaahi ʻahiʻahi faingataʻa ʻo e tuí, ka ʻoku mau fiefia he ʻi hotau ʻapiakó ʻoku mau maʻu ai ʻa e melino, ʻa ia ʻoku mou tokoni kotoa ki hono fakahoko iá. ʻOku mau fakamālō atu ʻi he meʻa ko iá!”
ʻI he fakaʻosinga ʻo ʻene malangá, naʻe pehē ai ʻe Malwina: “ʻOku toe ʻi ai ʻa e ʻuhinga ʻe taha ʻoku mau ʻaʻahi atu ai ki homou ʻapí. ʻOku mau tokanga kiate kimoutolu. ʻOku pehē ʻe he Tohitapú ʻe vavé ni ke hokosia ʻe he faʻahinga ʻo e tangatá ʻa e ngaahi meʻa mahuʻinga. Ko ia ko e taimi hono hoko te mau tukituki atu ai ʻi homou matapaá, kātaki ʻo vaheʻi ha taimi ke fanongo ai. Te mau saiʻia ke tala atu kiate kimoutolu ʻa e founga ʻe lava ke tau moʻui taʻengata fakataha ai ʻi ha palataisi ʻi he māmaní.”
Ko e tokotaha malanga hokó ko Mateusz, naʻe toe taʻu 15 mo ia foki. Naʻe fakahā ʻe Mateusz ki heʻene kau fanongó ʻo pehē ʻi he faai mai ʻa e ngaahi taʻú, kuo ngāueʻaki ai ʻe he Kau Fakamoʻoni ʻa Sihová ʻa e ngaahi founga kehekehe ke fakamafola ʻa e ongoongo leleí. Ko e fakatātaá, ʻi he 1914—lolotonga ʻa e kuonga ʻo e ngaahi faiva fakalongolongó—naʻe huluʻi ai ʻe he Kau Fakamoʻoní ʻa e “Tulama-ʻAta ʻo e Fakatupú,” ko ha heleʻuhila mo e fakahāhā silaiti ʻa ia naʻe kau ai ʻi he taimi tatau ʻa e leʻó.
Naʻe lāulea ʻa Mateusz ki he ngafa ʻo e letioó ʻi hono fakamafola ʻa e pōpoaki ʻo e Puleʻangá pea toki fakamatalaʻi ʻa e sisitemi fakaʻilekitulōnika ʻomai-ʻata-fakaetaipe ʻi he ngaahi lea lahi (MEPS) fakakomipiuta naʻe faʻu ʻe he Kau Fakamoʻoni ʻa Sihová. Naʻá ne toe fakamatala ki he founga ʻo e tokoni ʻa e Kau Fakamoʻoni ʻa Sihová ke fakamatala ki he kau toketaá fekauʻaki mo e ngaahi founga faitoʻo ʻo ʻikai kau ai ʻa e totó. “ʻI he lolotongá ni, ʻoku fakamatala ʻi he leleiʻia ʻa e kau toketā Pōlani tuʻu-ki-muʻá ʻi heʻetau tuʻú pea fakamamafaʻi ko e taʻu taki taha ʻoku faitoʻo ai ʻa e kau mahaki tokolahi ange ʻoku ʻikai ko e Kau Fakamoʻoní ʻo ʻikai kau ai ʻa e totó,” ko ʻene leá ia.
Naʻe fakaʻosiʻaki ʻe Mateusz ʻaki ʻene talanoa fekauʻaki mo e langa ʻo e ngaahi Fale Fakatahaʻangá ʻo ne pehē: “Te mou saiʻia ke ʻaʻahi ki homau ngaahi Fale Fakatahaʻangá? ʻOku ʻikai ke totongi ʻa e huú, pea ʻoku ʻikai ke fai ha tānaki paʻanga ai.” ʻI he lea ʻo fekauʻaki mo e senitā fakataha-lahi ʻi Sosnowiec, naʻe pehē ʻe Mateusz: “ʻOku totonu ke mou sio ʻi he langa mo e tuʻunga fakaengāue lahi ko ení. Fēfē ke tau ō fakataha ki ai? ʻOku ʻi ai ʻemau fokotuʻu, pea ko homa kaumeʻa ko Katarzyna te ne talanoa atu ʻo fekauʻaki mo ia.”
Ko hono hokó, naʻe lea loto-māfana ai ʻa e taʻu 15 ko Katarzyna: “ʻOku talitali lelei kimoutolu ke mou haʻu ki Sosnowiec ki he fakataha-lahi fakavahe ʻa e Kau Fakamoʻoni ʻa Sihová. ʻE fai ʻa e lāulea ai ʻi he ngaahi kaveinga ʻa ia ʻoku fekauʻaki mo e toʻutupú.” Naʻe toe lave ʻa Katarzyna ki he kātoanga tefito ki he kau Kalisitiané—ko e Fakamanatu ʻo e pekia ʻa Sīsū Kalaisí. Naʻá ne fakalototoʻaʻi ʻa ʻene kau fanongó: “ʻI he taʻu kuo ʻosí ko e kakai ʻe toko 14 miliona tupu naʻa nau kau ki he fakamanatú. Fēfē ke mou kau fakataha mo kimautolu ʻi he taimi hoko maí?”
Hili ʻenau malangá, naʻe ʻoange ʻe Malwina, Mateusz, mo Katarzyna ki he kau faiakó ʻa e tohi Jehovah’s Witnesses—Proclaimers of God’s Kingdom fakataha mo e foʻi vitiō ʻe ua ʻa ia ʻoku lāulea ai ki he ngaahi tui mo e ngaahi ngāue ʻa e Kau Fakamoʻoni ʻa Sihová.a Naʻe tali loto-hounga ia ʻe he kau faiakó mo nau palōmesi ange ʻe ngāueʻaki ia ʻi he ngaahi kalasi hisitōliá.
ʻI he ngataʻanga ʻo e kongá, naʻe taaʻi ai ʻe he taʻu 12 ko Martyna ki he faʻahinga kotoa naʻe fakatahatahá ʻa e foʻi hiva ʻoku fakakaveinga ko e “ʻOku Mau Fakamālō Kiate Koe, Sihova.” Ko e Kau Fakamoʻoni kei siʻi ko ení ‘naʻa nau langaʻi ʻa e loto-toʻa fakafou ʻi honau ʻOtuá’ pea fai ʻa e fakamoʻoni lelei. (1 Tesalonaika 2:2, NW) Ko ha faʻifaʻitakiʻanga lelei ʻaupito ē ki he Kau Fakamoʻoni kei siʻí ʻi he feituʻu kotoa pē!
[Fakamatala ʻi lalo]
a Pulusi ʻe he Kau Fakamoʻoni ʻa Sihová.
[Fakatātā ʻi he peesi 26]
Ko Malwina ʻi heʻene teuteuʻi ʻa e malangá ʻi ha ngaahi ʻaho siʻi ki muʻa ke fai ia ʻi he ʻapiakó
[Fakatātā ʻi he peesi 26]
Ko Katarznya ʻi heʻene fili ʻa e ngaahi konga Tohitapu ki he malangá