Ko e Ngāue Leleí ʻOku Fakalāngilangiʻi Ai ʻa e ʻOtuá
ʻI HEʻENAU ʻulungaanga leleí mo e ngaahi ngāue alafaʻifaʻitakiʻangá, ʻoku ʻoatu ai ʻe he kau Kalisitiane moʻoní ʻa e lāngilangi ki he ʻOtuá. (1 Pita 2:12) ʻOku lava ke hā ʻeni ʻi he meʻa naʻe hoko ʻi ʻĪtali ʻi he ngaahi taʻu ki muí ni maí.
ʻI Sepitema 1997, naʻe luluʻi ai ʻe ha mofuike lahi ʻa e konga kehekehe ʻo e feituʻu Marche mo Umbria, ʻo maumauʻi ai ʻa e meimei ʻapi nai ʻe 90,000. Naʻe ʻoatu fakavavevave ai ʻe he ngaahi kulupu ʻo e Kau Fakamoʻoni ʻa Sihová ha tokoni ki honau kaungātuí pea mo e niʻihi kehé. Naʻe tokonaki ha ngaahi taulani, moheʻanga kafu-sipa, sitou, mīsini-ʻuhila mo e meʻa kehe naʻe fiemaʻú. Ko e ngaahi ngāue tokoni ko ʻení naʻe ʻikai taʻefakatokangaʻi.
Naʻe līpooti ʻe he nusipepa Il Centro: “Ko e ʻuluaki aʻu mo e tokoní ki he ngaahi feituʻu naʻe maumauʻí ko e Kau Fakamoʻoni ʻa Sihova mei Roseto [ʻi he vahefonua ʻo Teramo] . . . Tuku kehe ʻa e fakataha maʻu pē ki he lotú, ʻoku ngāue ʻa e faʻahinga loto-tōnunga kia Sihová ʻi ha founga ʻaonga, ʻo ʻoatu ʻa e tokoni ki he faʻahinga ʻoku nau faingataʻaʻiá, ʻo ʻikai te nau tokanga pe ko e lotu fē ʻoku nau kau ki aí.”
Ko e pule kolo ʻo Nocera Umbra, ko e taha ʻo e ngaahi kolo naʻe uesia lahi tahá, naʻá ne tohi ki he Kau Fakamoʻoní: “ʻOku ou fakamālō loto-moʻoni mo fakafoʻituitui atu ki he tokoni naʻe fai ki he kakai ʻo Nocera. ʻOku ou fakapapauʻi ʻoku ou fakahaaʻi atu ai ʻa e ongoʻi ʻa e faʻahinga kotoa ʻo Nocera.” Tānaki atu ki ai, naʻe foaki ʻe he Potungāue Fakalotofonuá ki he Congregazione Cristiana dei Testimoni di Geova (Fakatahaʻanga Kalisitiane ʻa e Kau Fakamoʻoni ʻa Sihová) ha tohi fakamoʻoni pea mo ha mētali “ke fakamoʻoniʻiʻaki ʻa e ngāue kuo faí pea mo e tōtōivi kuo fai ʻi he ngaahi ngāue fekauʻaki mo e meʻa fakatuʻupakē naʻe malanga hake ʻi he feituʻu Umbria mo Marche.”
ʻI ʻOkatopa 2000, naʻe taaʻi ai ʻe ha tāfea fakalilifu ʻa e feituʻu Piedmont ʻi he fakatokelau ʻo ʻĪtalí. Naʻe toe ngāue fakavavevave ki ai ʻa e Kau Fakamoʻoní ʻi he teuteu ke fai ha tokoni. Ko e toe ngaahi ngāue lelei ko ʻení naʻe ʻikai ke taʻefakatokangaʻi. Naʻe foaki kiate kinautolu ʻe he Feituʻu Piedmont ha peleti fakamanatu ʻi heʻenau “ngāue pole maʻongoʻonga ʻi hono poupouʻi ʻa e kakai Piedmont naʻe uesia ʻe he tāfeá.”
Naʻe fakahinohinoʻi ʻe Sīsū Kalaisi ʻa ʻene kau ākongá: “Ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani.” (Mātiu 5:16) ʻOku fakalāngilangiʻi fiefia ʻe he Kau Fakamoʻoni ʻa Sihová ʻa e ʻOtuá, ʻo ʻikai ko kinautolu, ʻi hono fakahoko ha “ngāhi ngaue lelei” ʻa ia ʻe tokoniʻi fakalaumālie ai honau ngaahi kaungāʻapí pea ʻi ha ngaahi founga kehe.