Ko e Fuʻu ʻAkau “Toʻí” pea mo Hono “Huhuʻa” Mohu ʻAongá
‘Toʻo pame maʻá e mamahí,’ ko e lau ia ʻa Selemaia 51:8. Ko ha fekumi ki he taha ʻo e ngaahi matavai ʻo e meʻa faitoʻo mo fakanonga lahi ko ení ʻokú ne ʻave ai kitautolu ki he motu ko Chios, ʻi he Tahi ʻĪsiní.
ʻI HE kamataʻanga ʻo e faʻahitaʻu māfaná, ʻoku teuteu ai ʻa e kau faama ʻi Chios ki he utu-taʻú ʻi ha founga kehe ʻaupito. Hili ʻenau tafi ʻa e kelekelé, ʻoku nau fakatoka leva ha kele hinehina takatakai ʻi he ʻulu ʻakau iiki lanu mata ʻoku ui ko e masitiká. ʻOku hifi leva ʻe he kau fāmá ʻa hono kilí, ʻo ʻai ai ʻa e ʻulu ʻakaú ke “toʻi.” ʻOku kamata ke toʻi māmālie mai ki tuʻa ha “huhuʻa” pikipiki lanu vaivai. Hili ʻa e uike ʻe ua pe tolu, ʻoku fatu ʻa e ngaahi tulutā ʻo e meʻa pikipiki ko ení, pea ʻoku tānaki leva ia ʻe he kau fāmá, ʻo ʻomai fakahangatonu mei he sinó pe mei he funga kele ʻi laló. Ko e “huhuʻa” ko ení, ʻoku ui ko e puluʻi masitika, kuo ngāueʻaki ia ke ngaohiʻaki ʻa e paʻamé.
Kae kehe, ki muʻa ʻi he utu-taʻú, ʻoku fiemaʻu ʻa e kātaki mo e ngāue mālohi. Ko e ngaahi sinoʻi ʻakau lanu-kulei pikopiko ko ení ʻoku tupu māmālie ʻaupito. ʻOku feʻunga mo e taʻu ʻe 40 ki he 50 ki ha fuʻu ʻakau ke aʻu ai ki he tuʻunga matuʻotuʻá—ʻa ia ʻoku mei he mita ʻe 2-3 hono māʻolunga anga-mahení.
Tuku kehe ʻa e ngāue ki hono hifi ʻo e sinó pea mo hono tānaki ʻo e “huhuʻá,” ʻoku fiemaʻu ʻa e ngāue lahi ange ke maʻu ai ʻa e masitiká. Hili hono tānaki ʻe he kau fāmá ʻa e “huhuʻa” masitiká, ʻoku nau sivi, fufulu pea vahevahe eni ʻo fakatatau ki hono lahí mo hono tuʻunga leleí. Ki mui ai, ʻoku toe fufulu ʻa e masitiká pea ʻe malava leva ke ngāueʻaki ia ki ha ngaahi meʻa kehekehe.
Ko e Hisitōlia ʻo ha ʻAkau Mahuʻinga
Ko e foʻi lea faka-Kalisi ki he “masitiká” ʻoku fekauʻaki ia mo e foʻi lea ʻa ia ʻoku ʻuhingá “ke ʻūtaki ʻa e nifó.” ʻOku fakahuʻunga mai ʻe he hingoá ni, ne ngāueʻaki mei he kuonga muʻá ʻa e puluʻi masitiká ko ha pululole ke fakanamulelei ʻaki ʻa e mānavá.
Ko e fakamatala motuʻa taha ki he masitiká ʻoku haʻu ia meia Helotōtasi, ko e faihisitōlia Kalisi ʻo e senituli hono 5 K.M. Ko e kau faʻu-tohi mo e kau toketā motuʻa kehé—kau ai ʻa Apollodorus, Dioscorides, Theophrastus mo Hippocrates—naʻa nau lave ki hono ngaahi ngāueʻaki fakafaitoʻo ʻo e masitiká. Neongo ʻoku tupu ʻa e masitiká ʻi he kotoa ʻo e Matāfonua Metiteleniané, talu mei he 50 T.S. nai mo e meimei fakangatangata pē ki Chios ʻa hono ngaohi ʻo e masitiká. Pea ko e masitiká ʻa e meʻa naʻe mahuʻinga tefito ki he faʻahinga naʻa nau ikunaʻi ʻa Chios mei he kau Lomá, ki mui ai ko e kau Genoa pea toki hoko ai ʻa e kau Toaké.
Masitika Mohu ʻAonga
Ko e kau toketā ʻIsipite ʻo e kuonga muʻá naʻa nau ngāueʻaki ʻa e masitiká ke faitoʻo ʻaki ʻa e ngaahi fokoutua kehekehe, ʻo kau ai ʻa e fakalelé mo e langa huí. Naʻa nau toe ngāueʻaki ia ko ha ʻinisēnisi pea ʻi he fakatolonga ʻo e maté. Ko e fuʻu masitiká naʻe hoko nai ia ko e taha ʻo e ngaahi matavai ʻo e ‘pame ʻo Kiliatí,’ ʻa ia ʻoku lave ki ai ʻa e Tohitapú ki hono ngaahi tuʻunga fakafaitoʻó pea mo hono ngāueʻaki ʻi he ngaahi meʻa teuteú mo e fakatolonga ʻo e maté. (Selemaia 8:22; 46:11) Kuo aʻu ʻo pehē, ko e ʻakau naʻe fua sitakití, ʻa e taha ʻo e ngaahi meʻa naʻe ngaohiʻaki ʻa e ʻinisēnisi tapu namu kakala ʻa ia naʻe fakangatangata pē ki hono ngāueʻaki ki he meʻa toputapú, ʻoku kau nai ia ki he faʻahinga ʻo e masitiká.—Ekisoto 30:34, 35.
ʻI he ʻahó ni, ʻoku maʻu ʻa e masitiká ʻi he ngaahi vānisi ko ia ʻokú ne maluʻi ʻa e ngaahi tā-valivali loló, naunau falé mo e ngaahi meʻaleá. ʻOku ngāueʻaki ia ko ha meʻa maluʻi mei he mafaná mo e vaí, pea ʻoku vakai ki ai ko e taha ia ʻo e fakalanu taumaʻu lelei taha ki he fakalanu ʻoku ngāueʻaki ki he tupenú mo e vali ʻa e kau tā-valivalí. Kuo ngāueʻaki foki ʻa e masitiká ʻi he ngaahi meʻa fakapipikí pea ʻi hono ngaohiʻaki ʻa e letá. Koeʻuhi ko ʻene namu leleí mo hono ngaahi tuʻunga kehé, ʻoku ngāueʻaki ai ʻa e masitiká ʻi he koá, ngaahi meʻa teuteú mo e ngaahi meʻa fakanamuleleí.
Kuo fakamatalaʻi ʻa e masitiká ʻi he lisi ʻo e ngaahi faitoʻo ʻe 25 kuo fakamafaiʻi ʻi māmani lahi. ʻOku kei ngāueʻaki lahi pē ia ʻi he ngaahi faitoʻo tukufakaholo ʻi he māmani ʻAlepeá. ʻOku toe ngāueʻaki foki ʻa e masitiká ʻi hono ngaohi ʻo e meʻa fakafonu nifó pea mo e tafaʻaki ki loto ʻo e kofukofu ʻo e ngaahi foʻiʻakau efuefú.
ʻI he hoko ko e matavai ʻo e paʻamé, ko e “huhuʻa” mohu ʻaonga ʻo e “toʻi” ʻa e fuʻu masitiká kuo fai fakanonga mo fakamoʻui ia ʻi he laui senituli. ʻOku ʻuhinga lelei leva ʻa e pehē ʻe he kikite ʻa Selemaiá: ‘Toʻo pame maʻá e mamahí.’
[Fakatātā ʻi he peesi 31]
Chios
Ko hono hifi ʻo e masitiká
ʻOku tānaki fakaalaala ʻa e “huhuʻa” masitiká
[Maʻuʻanga]
Chios mo e tā fakatātā ʻo e utu-taʻú: Courtesy of Korais Library; ngaahi meʻa kehe kotoa: Kostas Stamoulis