Ko e Ngaahi Kaungāʻapi Leleí ko ha Meʻa ʻAonga
“Oku lelei hake ho kaugaabi be oku ofi, i ho tokoua ka oku ne mamao.”—Palovepi 27:10, “PM.”
KO HA mataotao ʻi he ʻuluaki senituli T.S. naʻá ne ʻeke kia Sīsū: “Ko hai nai hoku kaungaʻapi?” ʻI he tali ki aí naʻe tala ange ʻe Sīsū, ʻo ʻikai pe ko hai ʻa hono kaungāʻapí, ka ko e meʻa ʻokú ne ʻai ke hoko ha taha ko ha kaungāʻapi moʻoní. Ngalingali ʻokú ke maheni mo e talanoa fakatātā ʻa Sīsuú. ʻOku ʻiloʻi ia ʻe he tokolahi ko e pealapeli fekauʻaki mo e Samēlia anga-fakakaungāʻapí pea ʻoku lēkooti ia ʻi he Kōsipeli ʻa Luké. Ko e anga eni hono fai ʻe Sīsū ʻa e talanoá:
“Tokua naʻe ai ha tangata naʻe ʻalu hifo mei Selusalema ki Sielikō, pea ne toloto ʻi ha kaihaʻakau; ʻa ia naʻa nau toʻo hono kofu, pea ʻikai ngata ai, ka naʻa nau tāʻi ia, pea ʻi he tuku ia ʻo nau ʻalu, kuo ne kafo lahi, ʻo tei mate ʻi heʻenau ngaue. Pea feʻunga mo ia naʻe ʻalu hifo ha taulaʻeiki ʻi he hala ko ia: pea ʻi heʻene sio ki he tangata, naʻa ne halafaki ʻi he kauhala ʻe taha. Pehē foki mo ha motuʻa Livaite, naʻe hoko ki he potu ko ia, ʻo ne ʻalu atu ia ʻo mamata, pea toki halafaki ʻi he kauhala ʻe taha. Ka ʻi he fononga mai ha tangata Samelia, naʻa ne aʻu ki he tangata, pea ʻi heʻene sio ki ai naʻe langa hono fatu ʻi he ʻofa; ʻo ne ʻunuʻunu atu, ʻo tuluʻi hono ngaahi lavea ʻaki ʻa e lolo mo e uaine, mo ne haʻihaʻi; pea ne fakaheka ia ki heʻene manu, ka ne ʻalu ia ʻi lalo ʻo taki ki he faletalifononga, ʻo ne tauhi ia ʻi ai. Pea pongipongi hake, naʻa ne toʻo mai ha foʻi tenali ʻe ua, ʻo ne ʻange ki he motuʻa naʻe tauhi ʻa e faletalifononga, ʻo ne pehē, Ke ke tauhi pe ʻa e tangata ni; pea ka ʻoku siʻi ʻeni, pea ʻi heʻeku foki mai te u totongi ʻe au haʻo meʻa kuo mole ai. Ko hai ʻi he toko tolu ni, ʻi hoʻo poa, naʻe hoko ko e kaungaʻapi ʻo e siana naʻe moʻua ʻe he kaihaʻakau?”—Luke 10:29-36.
ʻOku hā mahino naʻe maʻu ʻe he mataotaó ʻa e poiní. ʻI he ʻikai toumouá naʻá ne fakahaaʻi totonu ʻa e tokotaha ʻa ia naʻe hoko ko ha kaungāʻapi ki he tangata kafó: “Ko ia naʻa ne fai ʻofa ki he tangata.” Naʻe tala ange leva ʻe Sīsū kiate ia: “ʻAlu, ʻo fai pehē mo koe foki.” (Luke 10:37) Ko ha talanoa fakatātā mālohi moʻoni ia fekauʻaki mo e meʻa ʻoku ʻuhinga ki ai ʻa e hoko ko ha kaungāʻapi moʻoní! ʻE aʻu nai ʻo fakaʻaiʻai kitautolu ʻe he pealapeli ʻa Sīsuú ke tau ʻeke hifo kia kitautolu tonu: ‘Ko e faʻahinga kaungāʻapi fēfē au? ʻOku hanga ʻe hoku puipuituʻa fakamatakalí pe fakafonuá ʻo tākiekina au ʻi hono fakapapauʻi pe ko hai ʻa hoku ngaahi kaungāʻapí? ʻOku hanga ʻe he ngaahi meʻa tefito ko iá ʻo fakangatangata ʻa hoku fatongia ke tokoniʻi ha kaungā faʻahinga pē ʻo e tangatá ʻoku ou sio ki ai ʻoku faingataʻaʻia? ʻOku ou fai ha feinga makehe ke hoko ko ha kaungāʻapi lelei?’
Ko Fē ke Kamata Aí?
Kapau ʻoku tau ongoʻi ʻa e fiemaʻu ke laka ki muʻa ʻi he meʻá ni, kuo pau ke tau kamataʻaki ʻetau fakakaukau fakaeʻatamaí. Ko ʻetau ngaahi tokangá ʻoku totonu ke fakatefito ia ʻi he hoko ko ha kaungāʻapi leleí. ʻE lava ke toe tokoni eni ki heʻetau maʻu ha ngaahi kaungāʻapi leleí. ʻI he meimei taʻu ʻe ua afe kuohilí, naʻe fakamamafaʻi ai ʻe Sīsū ʻa e tefitoʻi moʻoni mahuʻinga ko ia ʻo e ngaahi vahaʻangatae fakaetangatá ʻi heʻene Malanga ʻiloa he Moʻungá. Naʻá ne pehē: “Ko ia ʻilonga ha meʻa ʻoku mou loto ke fai ʻe he kakai kiate kimoutolu, fai pehe foki kiate kinautolu.” (Mātiu 7:12) Ko e tōʻongafai ki he niʻihi kehé ʻaki ʻa e fakaʻapaʻapa, ngeia, mo e anga-leleí ʻoku fakalotolahiʻi ai kinautolu ke nau tōʻongafai kiate koe ʻi he founga tatau.
ʻI he kupu ko e “ʻOfaʻi Ho Kaungāʻapí,” naʻe hā ʻi he makasini The Nation Since 1865, naʻe lave ai ʻa e fainusipepa mo e faʻu-tohi ko Lise Funderburg ki he niʻihi ʻo e ngaahi meʻa faingofua ʻa ia ʻe lava ke fai ke fakaʻaiʻai ʻaki ʻa e anga-fakakaungāʻapí. Naʻá ne tohi: “ʻOku ou fiemaʻu . . . ʻa e ngaahi meʻa ʻoku fai ai ʻa e fetuʻutakí ke fakahaaʻi ʻi he fanga kiʻi tōʻonga ʻofa iiki ʻoku fefaiʻaki ʻe he ngaahi kaungāʻapí—hangē ko hono ʻave ha ngaahi nusipepa, tokangaʻi ʻa e fānaú, mo hono fai ʻo ha fakatau. ʻOku ou fiemaʻu ʻa e vā ko ení ʻi ha māmani ʻoku fakautuutu ʻene fakamavahevahé ʻa ia ʻoku siʻi ai e malu ʻa e ngaahi feituʻú ʻi he manavaheé mo e faihiá.” ʻOkú ne toe tānaki mai: “Kuo pau ke ke kamata ʻi ha feituʻu. Pea mahalo nai ʻi ho kaungāʻapí.”
Ko e makasini Canadian Geographic naʻe toe ʻomai ai ha poini ʻaonga ʻa ia ʻe lava ke ne tokoniʻi ʻa e ngaahi kaungāʻapí ʻi hono fakatupu ha fakakaukau lelei fakaekinautolu. Ko e faʻu-tohi ko Marni Jackson naʻá ne pehē: “Ko e ngaahi kaungāʻapí, ʻoku hangē ko e fāmilí, ko e kakai ia ʻi hoʻo moʻuí ʻa ia ʻoku ʻikai maʻu pē ko koe ia ʻokú ke filí. ʻOku fiemaʻu ʻi he ngaahi vahaʻangataé ʻa e fakapotopoto, ko ha anga-fakaʻapaʻapa mo e kaungāongoʻi.”
Ngaahi Kaungāʻapi Leleí —Ko e Kau Foaki Loto-Lelei
Ko e moʻoni, ko e tokolahi taha ʻo kitautolú ʻoku tau ongoʻi hohaʻa nai fekauʻaki mo e fakaofiofi ki he ngaahi kaungāʻapí. ʻE hā ngali faingofua lahi ange ke fakaʻehiʻehi mei he fetuʻutakí pea ke fakamavaheʻi kitautolu. Kae kehe, ʻoku pehē ʻe he Tohitapú “ʻoku te monuʻia lahi ʻi he fai ha foaki atu, ʻi heʻete maʻu ha foaki mai.” (Ngāue 20:35) Ko ia ai, ko ha kaungāʻapi lelei ʻoku feinga ia ke fai ha ngāue ke maheni ai mo e kakai takatakai ʻiate iá. Lolotonga ʻa e ʻikai fiemaʻu ke fakatupu ha ngaahi kaungāmeʻa ofi ʻa ia ʻoku ʻikai fiemaʻú, ʻokú ne fai ʻa e feinga ke kamata ha fetalanoaʻaki lelei ʻi he taimi ki he taimi, ʻaki ha malimali anga-fakakaumeʻa nai pe ko ha taʻalo.
Hangē ko ia naʻe fakahaaʻi ʻi ʻolungá, ko e “fanga kiʻi tōʻonga ʻofa lahi” ʻoku fefaiʻaki ʻe he ngaahi kaungāʻapí ʻa e meʻa moʻoni ʻoku mahuʻinga ʻi hono fokotuʻu mo tauhi maʻu ʻa e ngaahi vā fakakaungāʻapí. Ko ia, ʻoku lelei ke sio ki ha fanga kiʻi fakahāhā ʻo e anga-leleí ʻa ia ʻe lava ke ke fai ki ha kaungāʻapi, he ʻe faʻa pouaki ʻe he meʻá ni ha laumālie ʻo e fāitaha mo e fetokaʻiʻaki. ʻIkai ngata aí, ʻi hono fai iá, te tau muimui ai ʻi he enginaki faka-Tohitapu: “ʻOua te ke taʻofi ha lelei meiate kinautolu ʻoku ʻonautolu ia, ʻosi ʻoku mafai ʻe ho nima ke fai.”—Palovepi 3:27; Semisi 2:14-17.
Ngaahi Kaungāʻapi Leleí —Ko e Kau Tali Loto-Houngaʻia
ʻE lelei kapau ʻe lava ke tau pehē ʻoku maʻu ʻe he tokotaha kotoa ʻa e tokoni mo e ngaahi meʻaʻofa ʻi ha loto-houngaʻia. Ko hono pangó, he ʻoku ʻikai ke pehē maʻu pē ia. Ko e ngaahi foaki ʻo e tokoni mo e ngaahi meʻaʻofa ʻuhinga lelei lahi kuo talitali ia ʻi he founga mātuʻaki taʻehoungaʻia ʻo fakakaukau nai ai ʻa e tokotaha-foaki loto-moʻoní, ‘Ko e fakaʻosi ia haʻaku toe fai ʻa e meʻa ko iá!’ ʻI he taimi ʻe niʻihi, ko e kotoa hoʻo ngaahi feinga ʻaki ʻa e lea fakafeʻiloaki anga-fakakaumeʻa mo e taʻalo ki ho ngaahi kaungāʻapí ʻoku fakatupunga nai ai ha kiʻi kamo taʻeloto pē.
Neongo ia, ʻi he ngaahi tuʻunga lahi ʻoku ʻikai moʻoni ke taʻehoungaʻia ʻa e tokotaha ʻokú ne maʻu iá, neongo ʻokú ne hā pehē mai nai. Mahalo pē ko hono puipuituʻa fakasivilaisé ʻokú ne ʻai ai ia ke ne toumoua pe mā pea fakatupunga ai ia ke ne fakahaaʻi ai ha tokanga siʻisiʻi, ʻo hā ngali ʻi ha founga taʻefakakaumeʻa. ʻI he tafaʻaki ʻe tahá, ʻi he māmani taʻehoungaʻia ko ení, ʻe ʻiloʻi nai ʻe he kakai ʻe niʻihi ʻoku ngalikehe ʻa hoʻo anga-fakakaumeʻá, pe aʻu nai ʻo nau huʻuhuʻu ʻi hoʻo ngaahi taumuʻá. Te nau fiemaʻu nai ha tuʻunga ke fakapapauʻiʻaki. Ko ia ai, ko hono fokotuʻu ha ngaahi vā fakakaumeʻá ʻe fiemaʻu nai ki ai ʻa e taimi mo e kātaki. Kae kehe, ko e ngaahi kaungāʻapi ʻoku nau ako ʻa e pōtoʻi ʻi he hoko ko e kau foaki leleí mo e kau tali loto-houngaʻiá te nau pouaki ai ha laumālie anga-fakakaungāʻapi ʻa ia ʻoku melino mo fiefia.
Taimi ʻOku Hoko Ai ʻa e Faingataʻá
Ko ha kaungāʻapi lelei ko ha meʻa ʻaonga mahuʻinga ia tautefito ʻi he hoko ha fakatamakí. Lolotonga ʻa e ngaahi taimi faingataʻá, ʻoku hā ai ʻa e laumālie moʻoni ʻo e anga-fakakaungāʻapí. ʻOku lahi ʻa e ngaahi fakamatala fekauʻaki mo e ngaahi ngāue taʻesiokita ʻa e ngaahi kaungāʻapí lolotonga ʻa e ngaahi taimi peheé. Ko e meʻa fakamamahi anga-mahení ʻoku hā ngali ke ne fakatupunga ʻa e ngaahi kaungāʻapí ke ākenoa pē ʻenau fāitaha pea ke fengāueʻaki fakaekinautolu. Naʻa mo e faʻahinga ʻoku ʻi ai ʻenau ngaahi fakakaukau fepakipakí te nau faʻa ngāue fakataha.
Ko e fakatātaá, ʻoku līpooti ʻi he New York Times ko e taimi ko ia naʻe taaʻi ai ʻe ha mofuike fakaefakaʻauha ʻa Toake ʻi he 1999, naʻe fakahaaʻi ai ʻe he ngaahi fili tukufakaholó ha tuʻunga anga-fakakaungāʻapi uouangataha. “Kuo akoʻi kimautolu ke mau fehiʻa ki he kau Toaké ʻi he laulaui taʻu,” ko e tohi ia ʻa ha tokotaha faʻu-kōlomu Kalisi ko Anna Stergiou ʻi ha nusipepa ʻAtenisi. “Ka ko ʻenau mamahi anga-kehé ʻoku ʻikai te ne ʻomai kia kimautolu ha fiefia. Naʻa mau mamahi ai, naʻa mau tangi ʻo hangē ia ne mole atu ʻa e tāufehiʻa motuʻá ʻi he mamata ki ha fanga kiʻi pēpē ne nau mate.” ʻI he taimi ne taʻofi fakaʻofisiale ai ʻa e ngaahi ngāue fakahaofí, naʻe fakafisi ʻa e ngaahi timi fakahaofi Kalisí ke tuku ʻa e kumi ki ha kau haó.
Ko e kau ʻi he ngāue fakahaofi moʻui hili hano taaʻi ʻe ha ngaahi fakatamakí ko ha ngāue anga-fakakaungāʻapi fakaʻeiʻeiki mo fakaetoʻa moʻoni ia. Naʻa mo ia, ke fakahaofi ha moʻui ʻa ha kaungāʻapi ʻaki ʻa e fakatokanga kiate ia ki muʻa ʻi ha faingataʻa, ʻe lava moʻoni ke vakai ki ai ko ha ngāue anga-fakakaungāʻapi ia ʻoku toe mahuʻinga ange. Ko e meʻa fakamamahí, ʻoku fakahaaʻi ʻe he hisitōliá ko e faʻahinga ʻoku nau fakatokanga ki he ngaahi kaungāʻapí fekauʻaki mo e ngaahi fakatamaki ka hoko maí ʻoku ʻikai ke faʻa talitali lelei kinautolu, koeʻuhi ʻi he taimi ʻo e fakatokangá, ko e fakatamaki ʻoku tuʻunuku maí ʻoku teʻeki lava ke ʻiloʻi ia. Ko e faʻahinga ko ia ʻoku nau fakaongo atu ha fakatokangá ʻoku nau faʻa fetaulaki mo e taʻetui. ʻOku fiemaʻu ʻa e kīvoi mo e feilaulauʻi-kita lahi ʻi he tafaʻaki ʻa ha faʻahinga pē ʻoku nau feinga ke tokoniʻi ʻa e faʻahinga tāutaha ko ia ʻoku ʻikai te nau lāuʻilo fekauʻaki mo honau tuʻunga taʻepaú.
Ko e Ngāue Fakakaungāʻapi Lahi Tahá
ʻI he ʻahó ni, ʻoku nānāfaki mai ʻa e meʻa mahuʻinga mamaʻo ange ki he faʻahinga ʻo e tangatá ʻi ha fakatamaki fakanatula. Ko e ngāue ia ʻa e ʻOtua Māfimafi-Aoniú ne tomuʻa tala ʻa ia te ne toʻo mei he māmaní ʻa e faihiá, fulikivanú mo e ngaahi palopalema fekauʻaki mo iá. (Fakahā 16:16; 21:3, 4) Ko e meʻa mahuʻinga ko ení ʻoku ʻikai ko ha meʻa ia ʻe ʻikai pau ʻene ala hokó ka ʻoku pau! ʻOku vēkeveke ʻa e Kau Fakamoʻoni ʻa Sihová ke vahevahe atu ʻa e ʻilo ʻoku fiemaʻu ke hao ai ʻi he meʻa mahuʻinga ko eni ʻoku tuʻunuku maí ki he tokolahi taha ʻo e kakai ʻe ala lavá. Ko e ʻuhinga ia ʻoku nau kau mātuʻaki kīvoi ai ʻi heʻenau ngāue fakamalanga ʻiloa ʻi he kotoa ʻo e māmaní. (Mātiu 24:14) ʻOku nau fai loto-lelei eni, ʻi he ʻofa ki he ʻOtuá pea mo e kaungāʻapí.
Ko ia ai, ʻoua ʻe tuku ʻa e tomuʻa fehiʻá, pe loto-ʻitá ke ne taʻofi koe mei he fanongo ʻi he taimi ʻoku ʻalu atu ai ʻa e Kau Fakamoʻoní ki ho matapaá pe fakaofiofi atu ʻi ha feituʻu pē kiate koé. ʻOku nau feinga ke hoko ko e ngaahi kaungāʻapi lelei. Ko ia ai, tali ʻenau tuʻuaki atu ke ako Tohitapu mo koé. Ako ki he founga ʻoku fakapapauʻi mai ai ʻe he Folofola ʻa e ʻOtuá kia kitautolu ʻoku ofi ke hoko ha kahaʻu fakafiefia ʻi he vahaʻa ʻo e ngaahi kaungāʻapí. ʻI he taimi ko iá, ʻe ʻikai ha fakafaikehekehe fakamatakali, fakalotu, pe fakakalasi te ne maumauʻi ʻa e vahaʻangatae mātuʻaki mahuʻinga ʻoku holi moʻoni ki ai ʻa e tokolahi taha ʻo kitautolú.
[Fakatātā ʻi he peesi 6, 7]
ʻOku lelei ke fai ha ngaahi ngāue anga-lelei ʻi ho feituʻu kaungāʻapí
[Maʻuʻanga]
Kolope: Mountain High Maps® Copyright © 1997 Digital Wisdom, Inc.