Ngaahi Fehuʻi mei he Kau Lautohí

Ko e hā naʻe ʻuhinga ki ai ʻa Paula ʻi heʻene pehē: “ʻIlonga haʻamou kai ʻa e ma ni mo inu ʻi he ipu”?

ʻI he lave ki hono fokotuʻu ʻo e Fakamanatu ʻo e pekia ʻa Sīsuú, naʻe tohi ʻe Paula: “ʻIlonga haʻamou kai ʻa e ma ni mo inu ʻi he ipu, ʻoku mou fakaha ʻa e pekia ʻa e ʻEiki kaeʻoua ke ne hoko mai.” (1 Kolinito 11:​25, 26) ʻOku tui ʻa e niʻihi ko e foʻi lea “ʻilonga” hení ʻokú ne fakahaaʻi ko e pekia ʻa Kalaisí ʻoku totonu ke fakamanatu tuʻo lahi ia, ʻi he ʻuhinga ki he taimi lahi. Ko ia ai, ʻoku nau kātoangaʻi ia ʻo faʻa laka hake ʻi he tuʻo taha he taʻú. Ko e meʻa ia naʻe ʻuhinga ki ai ʻa Paulá?

Ko e meimei taʻu eni ʻe 2,000 talu mei hono fokotuʻu ʻe Sīsū ʻa e Fakamanatu ʻo ʻene pekiá. Ko ia ai, ko hono kātoangaʻi ʻo e Fakamanatú naʻa mo e tuʻo taha he taʻú ʻoku ʻuhinga iá naʻe toutou kātoangaʻi mai ia talu mei he 33 T.S. Kae kehe, ʻi he potutohi ʻo e 1 Kolinito 11:​25, 26, naʻe lāulea ai ʻa Paula, ʻo ʻikai ki he founga ʻo hono faʻa faí, ka ki he founga ʻoku totonu ke faiʻaki ʻa e Fakamanatú. ʻI he muʻaki lea faka-Kalisí, naʻe ʻikai te ne ngāueʻaki ʻa e foʻi lea ko e pol·laʹkis, ʻa ia ʻoku ʻuhingá ko e “toutou” pe “tuʻo lahi.” ʻI hono kehé, naʻá ne ngāueʻaki ʻa e foʻi lea ko e ho·saʹkis, ʻa ia ʻoku ʻuhingá ko e “ʻilonga,” ko ha ʻitiome ko hono ʻuhingá ko e “ʻi ha taimi pē,” “taimi kotoa pē ʻoku.” Naʻe pehē ʻe Paula: ‘Ko e taimi kotoa pē ʻoku mou fai ai ení, ʻoku mou hokohoko fakahā ai ʻa e pekia ʻa e ʻEikí.’a

ʻOku totonu leva iá ke tuʻo lahi fēfē ʻa hono kātoangaʻi ʻo e Fakamanatu ʻo e pekia ʻa Sīsuú? ʻOku feʻungamālie ke kātoangaʻi ia ʻo tuʻo taha pē he taʻu. Ko ha fakamanatu moʻoni ia, pea ko e ngaahi fakamanatú ʻoku faʻa kātoangaʻi fakataʻu ia. Tānaki atu ki ai, naʻe pekia ʻa Sīsuú ʻi he ʻaho ʻo e Pāsova faka-Siú, ʻa ia naʻe fai tuʻo taha ia he taʻu. ʻOku feʻungamālie leva ʻa e lave ʻa Paula kia Sīsū ko “hotau pasova, ko Kalaisi,” koeʻuhi ko e pekia fakaefeilaulau ʻa Sīsuú naʻe fakaʻatā ai ʻa e hala ki he moʻuí ki he ʻIsileli fakalaumālié, ʻo hangē tofu pē ko e fakahaofi moʻui ʻi he ʻuluaki feilaulau Pāsová ʻa e ʻuluaki foha ʻo e kau ʻIsileli fakakakanó ʻi ʻIsipité pea fakaʻatā ai ʻa e hala ki hono fakatauʻatāinaʻi ʻa e puleʻangá mei he nofo pōpulá. (1 Kolinito 5:7; Kaletia 6:16) Ko e fehokotaki ko eni mo e Pāsova faka-Siu fakataʻú ko e toe fakamoʻoni ia ko e Fakamanatu ʻo e pekia ʻa Sīsuú ʻoku totonu ke kātoangaʻi tuʻo taha pē ia he taʻu.

ʻIkai ngata aí, naʻe fakafehokotaki ʻe Paula ʻa e pekia ʻa Sīsuú ki he toe kātoanga faka-Siu fakataʻu ʻe taha, ko e ʻAho ʻo e Fakaleleí. ʻI he Hepelu 9:​25, 26, ʻoku tau lau ai: “Kaeʻumaʻā naʻe ʻikai te ne hu [ʻa Sīsū] ke ne ʻoatu tuʻo lahi ia, ʻo hange ko e hu ʻa e kau taulaʻeiki-lahi ki he Potu Toputapu ʻi he taʻu kotoa pe [ʻi he ʻAho Fakaleleí] ʻaki ha toto kehe; . . . ka ʻi hono anga ko eni, kuo ta tuʻo taha ʻene ha ʻi he fakaʻosi ʻo e ngaahi kuonga, ke tamateʻi ʻa e angahala ʻaki ʻene feilaulau aʻana.” Koeʻuhi naʻe fetongi ʻe he feilaulau ʻa Sīsuú ʻa e feilaulau ʻi he ʻAho Fakalelei fakataʻú, ko e Fakamanatu ʻo ʻene pekiá ʻoku totonu ʻa hono kātoangaʻi fakataʻú. ʻOku ʻikai ha ʻuhinga Fakatohitapu ke kātoangaʻi ai ʻa e Fakamanatú ʻo tuʻo lahi ange ia he meʻa ko iá.

ʻI he fehoanaki mo e meʻá ni, ʻoku fakamatala ʻa e faihisitōlia ko John Laurence von Mosheim ʻo pehē ko e kau Kalisitiane ʻi he senituli hono uá ʻi ʻĒsia Mainá naʻa nau angamaheniʻaki ke kātoangaʻi ʻa e Fakamanatu ʻo e pekia ʻa Sīsuú “ʻi he ʻaho hono hongofulumāfā ʻo e ʻuluaki māhina faka-Siú [Nīsani].” Naʻe toki hoko mai pē ʻi he ngaahi taʻu ki muí ʻa e angaʻaki ʻi he Puleʻanga-Haʻa-Kalisitiané ke kātoangaʻi ia ʻo tuʻo lahi ange ʻi he tuʻo taha he taʻú.

[Fakamatala ʻi lalo]