“ʻOkú Ke Moʻoni, ʻOku Fakafiefia ʻa e Moʻuí!”
TE KE saiʻia ke ako ki he ʻuhinga moʻoni ʻo e moʻuí? Naʻe tokoniʻi ʻe he taʻu hongofulumāvalu ko Magdalena, ko e taha ia ʻo e Kau Fakamoʻoni ʻa Sihová, ʻa ia ʻoku nofo ʻi Szczecin, Pōlani, ʻa hono kaungāako ʻi he akoʻanga māʻolungá ke ne fai ʻa e meʻa tofu pē ko iá. Ko Katarzyna ko ha tokotaha fakaʻikaiʻi-ʻOtua mahino ia, ka ʻi he taimi naʻe talanoa ai kiate ia ʻa Magdalena ʻo kau ki he Tohitapú, naʻe hā meiate ia ʻa e mahuʻingaʻia moʻoni.
Neongo naʻe saiʻia ʻa Katarzyna ʻi he meʻa naʻe vahevahe ange ʻe Magdalena kiate ia mei he Tohitapú, naʻe ʻikai lava ke ne tali kakato ia. ʻI heʻene talanoa mo Magdalena ʻo kau ki he ngaahi kaumeʻa moʻoní, naʻe tuʻo taha ʻa e pehē ʻe Katarzyna: “ʻOkú ke maʻu ʻa e Tohitapú; ʻokú ke ʻilo ʻa e ngaahi tefitoʻi moʻoni ke muimui ki aí pea mo e feituʻu ke kumi ai ki ha ngaahi kaumeʻá. Kae fēfē ʻa e faʻahinga ʻa ia naʻa mo e taimí ni, ʻoku ʻikai lava ke nau tali ʻa e ngaahi tefitoʻi moʻoni ko iá?”
Naʻe hoko ha liliu mahuʻinga ʻi he taimi naʻe folau ai ʻa Katarzyna ki Lonitoni, ʻIngilaní. Naʻá ne ʻaʻahi ki he ʻōfisi vaʻa ʻa e Kau Fakamoʻoni ʻa Sihova ʻi aí, pea naʻe ueʻi ia ʻi he anga-ʻofa naʻe fakahaaʻi kiate iá. Ko e fanga kiʻi ngāue faingofua hangē ko hono fakaava ʻa e matapaá kiate iá pea mo e fakahaaʻi ʻa e mahuʻingaʻia moʻoni ʻi he meʻa naʻá ne leaʻakí naʻe fakamānako ia kiate ia.
ʻI he kamata ʻa e taʻu fakaako foʻoú ʻi Sepitema 2001, naʻe fili ai ʻe Katarzyna ke tali ha ako Tohitapu tuʻumaʻu. ʻOkú ne fakatupulekina ʻa ʻene mahuʻingaʻia ʻi he ngaahi tefitoʻi moʻoni faka-Tohitapú pea kuo kamata ke ne ngāueʻaki ia ʻi heʻene moʻui fakaʻahó. Ki muí ni, naʻá ne fakahā ʻi he loto-falala kia Magdalena: “ʻOku ou ongoʻi ʻo hangē ʻoku ou kamata ha moʻui foʻoú.” ʻOkú ne toe ʻoatu kiate ia ha pōpoaki nounou ʻo fakafou ʻi he telefoni selulaá: “Fakamālō lahi atu ki heʻeta ako he ʻaho ní! ʻOkú ke moʻoni, ʻoku fakafiefia ʻa e moʻuí! ʻOku lelei lahi ke ʻiloʻi ʻa e tokotaha ke tau fakamālō ki aí koeʻuhi ko e meʻa ko iá.”