Līpooti ʻa e Kau Fanongonongo ʻo e Puleʻangá
Tokoni ki Hono Tauhi Maʻu ʻa e Toputapu ʻo e Totó
ʻI HE kotoa ʻo e māmaní kuo fakahāhā ai ʻe he kau sevāniti ʻa Sihová ʻa e mateaki ki he ʻOtuá ʻi he fekauʻaki mo e toputapu ʻo e totó. (Ngāue 15:28, 29) Ko e tokoni ki he fetokouaʻaki faka-Kalisitiané kuo tokonaki mai ia ʻe he kalasi tamaioʻeiki anga-tonu mo potó. (Mātiu 24:45-47) Tau sio angé ki he ngaahi ola naʻe ʻi he ʻOtu Motu Filipainí.
ʻOku līpooti ʻa e vaʻa ʻi he ʻOtu Motu Filipainí: “ʻI he 1990 naʻe fakahaaʻi mai ai kia kitautolu ko e kau fakafofonga mei he Pēteli Brooklyn te nau fai ha seminā ʻi heni ʻi he ʻOtu Motu Filipainí. Naʻe fakaafeʻi ki ai ʻa e fanga tokoua mei he ngaahi vaʻa ʻĒsia lahi, ʻo kau ai ʻa Kōlea, Taiuani, mo Hongo Kongo. Ko e taumuʻá ke fokotuʻu ha Ngaahi Potungāue Fakahinohino Fakafalemahaki ʻi honau ngaahi vaʻá pea pehē foki ke fokotuʻutuʻu ʻa e ngaahi Kōmiti Fetuʻutaki Fakafalemahaki. ʻI he ʻOtu Motu Filipainí naʻe ʻuluaki fokotuʻu ʻa e ngaahi kōmití ʻi he ngaahi kolo lalahi ʻe fā.” ʻE feinga ʻa e ngaahi kōmití ke kumi ʻa e kau toketā ʻoku nau loto-lelei ke ngāue fakataha mo kimautolu ʻi he fekauʻaki mo e tuʻu ʻa e Kalisitiané ki he totó. Te nau toe tokoniʻi ʻa e fanga tokouá ʻi he taimi ʻoku malanga hake ai ʻa e ngaahi faingataʻa fekauʻaki mo e totó.
Naʻe fili ʻa Remegio ke ngāue ʻi he Kōmiti Fetuʻutaki Fakafalemahaki ʻi Baguio. ʻI he faai mai ʻa e taimí, naʻe kamata ke fakatokangaʻi ʻe he kau toketaá ʻa e ngāue ko ení. ʻOku manatuʻi ʻe Remegio ʻa e taimi ʻe taha naʻe fiemaʻu ai ʻe ha kau toketā tokolahi naʻe fakataha mo ha Kōmiti Fetuʻutaki Fakafalemahaki ke nau ʻiloʻi ʻa e founga ke faitoʻo ai ha kau mahaki Fakamoʻoni ʻoku nau fakafisingaʻi ʻa e totó. Naʻe pehē ʻe Remegio: “Naʻe kamata ke ʻeke ʻe he kau toketaá ʻa e ngaahi fehuʻi lahi, ka naʻá ku ongoʻi faingataʻaʻia koeʻuhí ko e ngaahi fehuʻí naʻe mātuʻaki fakatekinikale.” Naʻá ne lotu kia Sihova ki ha tokoni ʻi he ngāue ki he pole ko ení. Naʻe hoko atu ʻa Remegio: “Hili ʻa e fehuʻi taki taha, naʻe hiki hake ʻe he kau toketā kehé honau nimá pea fakahā ʻa e anga ʻo ʻenau fekuki mo ha tuʻunga meimei tatau.” Naʻe fiefia ʻa Remegio ʻi he tokoní, tautefito he ko e vahaʻa taimi ʻo e fehuʻi mo e talí naʻe hokohoko atu ia ʻo feʻunga mo e houa ʻe ua.
ʻOku ʻi ai ʻa e kōmiti ʻe 21 he taimí ni ʻi he kotoa ʻo e fonuá, fakataha mo e fanga tokoua fakakātoa ʻe toko 77 ʻoku nau ngāue ai. Ko Danilo, ko ha Fakamoʻoni ia ʻa ia ko ha toketā fakafaitoʻo, ʻokú ne pehē: “ʻOku ʻiloʻi ʻe he kau toketaá ko ʻenau kau mahaki Fakamoʻoní ʻoku poupouʻi ia ʻe ha kautaha ʻoku tokanga ʻofa kia kinautolu.” Naʻe ʻuluaki toumoua ha toketā ʻe taha ke fakahoko ha tafa ki ha tokoua ʻo taʻekau ai ʻa e huhu totó. Kae kehe, naʻe tuʻumaʻu ʻa e tokouá ʻi hono tuʻungá. Naʻe fakahoko ʻa e tafá pea naʻe lavameʻa. ʻOku līpooti ʻe he Ngaahi Potungāue Fakahinohino Fakafalemahakí: “Naʻe ofo pē ʻa e toketaá ʻi he fakaakeake ʻa e tokouá. Naʻá ne pehē: ‘Makatuʻunga ʻi he meʻa naʻe hoko hení, ka ʻi ai ha niʻihi ʻo hoʻomou kau mēmipá te ne fiemaʻu ke fai kiate ia ʻa e faʻahinga tafa ko eni taʻekau ai ʻa e totó, te u fiefia ke fai ia.’”