Vakai ʻa e ʻOtuá Fekauʻaki mo e Kau Maté

KO E mate ʻa ha taha ʻofeiná ko e meʻa fakamamahi moʻoni ia. Ko e ongoʻi ngeʻesi, ko e līʻekina, mo e ongoʻi ʻo e molé ʻoku lahi fakaʻulia. Ko e mole ʻa ha taha ʻofeiná ʻe lava ke ne ʻai ha tokotaha ke ne ongoʻi taʻemalu, he tatau ai pē ʻa hono lahi ʻo e koloa, mālohi, pe tākiekina nai ʻokú ne maʻú, ʻoku ʻikai ha taha ʻi he māmaní he taimí ni ʻe lava ke ne fakafoki ha tokotaha mate ki he moʻuí.

Kae kehe, ko hotau Tokotaha-Fakatupú ʻoku kehe ʻene vakaí mai ʻaʻana ki he ngaahi meʻá. ʻI heʻene faʻu ʻa e ʻuluaki tangatá mei he efu ʻo e kelekelé, ʻokú ne toe malava foki ke toe fakatupu foʻou ha tokotaha mate. ʻI he ʻuhinga ko ení, ʻoku lava ke vakai mai ʻa e ʻOtuá ki he kau maté ʻo hangē ia ʻoku nau kei moʻuí. Fekauʻaki mo e kau sevāniti faitōnunga ʻo e kuonga muʻá ʻa ia kuo nau maté, naʻe pehē ʻe Sīsū: ‘Oku nau moui kotoabe ki he Otuá.’​—Luke 20:​38, PM.

Lolotonga ʻene ʻi māmaní, naʻe fakaivia ai ʻa Sīsū ke ne fokotuʻu hake ʻa e maté. (Sione 5:​21) Ko ia ai, ʻokú ne maʻu ʻa e vakai ʻa ʻene Tamaí ki he faʻahinga ko ia kuo nau mate faitōnungá. Ko e fakatātaá, ʻi he taimi naʻe mate ai hono kaumeʻa ko Lāsalosí, naʻe tala ange ʻe Sīsū ki heʻene kau ākongá: “Ko ʻeku ʻalu ni ke u fafangu ia.” (Sione 11:11) Mei ha vakai fakaetangata, naʻe mate ʻa Lāsalosi, ka kia Sihova mo Sīsū, naʻe mohe ʻa Lāsalosi.

ʻI he malumalu ʻo e pule ʻa e Puleʻanga ʻo Sīsuú, ʻe ʻi ai “ha toetuʻu ʻa e angatonu mo e angahala fakatouʻosi.” (Ngāue 24:15) ʻE faifai atu pē, ko e faʻahinga ʻe toetuʻú te nau maʻu ʻa e ako fakaʻotua pea maʻu ʻa e ʻamanaki ʻo e moʻui taʻengata ʻi he māmaní.​—Sione 5:​28, 29.

ʻIo, ko e mate ʻa ha tokotaha ʻofeiná ʻe lava ke ne fakatupunga ʻa e faingataʻa mo e mamahi lahi, ʻa ia ʻe toki ʻosi nai ʻi he laui taʻu. Neongo ia, ko e vakai ki he maté mei he tafaʻaki ʻa e ʻOtuá ʻe lava ke ne ʻomai kia kitautolu ʻa e fakafiemālie lahi pea fakafonuʻaki kitautolu ʻa e ʻamanaki.​—2 Kolinito 1:​3, 4.