Naʻá Ne ʻOfa ʻi he Anga-Leleí
KO MILTON G. HENSCHEL, ko ha mēmipa taimi lōloa ʻo e Kulupu Pule ʻa e Kau Fakamoʻoni ʻa Sihová, naʻe ʻosi ʻa ʻene moʻui ʻi he māmaní ʻi he Tokonaki, ʻaho 22 ʻo Maʻasi, 2003. Naʻá ne taʻu 82.
ʻI heʻene kei talavoú, naʻe kau ai ʻa Milton Henschel ki he kau ngāue ʻa e ʻuluʻi ʻapitanga ʻo e Kau Fakamoʻoni ʻa Sihová pea ngāue faitōnunga ai ʻo laka hake ʻi he taʻu ʻe 60. Naʻá ne hoko ʻo ʻiloa vave ʻi heʻene fakafuofua leleí mo ʻene mahuʻingaʻia loto-moʻoni ʻi he ngāue malangaʻi ʻo e Puleʻangá. ʻI he 1939 naʻá ne hoko ai ko e sekelitali kia N. H. Knorr, ʻa ia ko e ʻovasia ia he taimi ko iá ʻo e fale pulusi ʻi Brooklyn ʻa e Kau Fakamoʻoni ʻa Sihová. ʻI he taimi naʻe kamata takimuʻa ai ʻa Tokoua Knorr ʻi he haʻohaʻonga ʻo e Kau Fakamoʻoni ʻi māmani lahí ʻi he 1942, naʻá ne tauhi maʻu ʻa Tokoua Henschel ko hono tokoni. Naʻe mali ʻa Tokoua Henschel mo Lucille Bennett ʻi he 1956, pea naʻá na kaungā ʻinasi fakataha ʻi he ngaahi fiefia mo e ngaahi faingataʻa ʻo e moʻuí.
Naʻe ngāue vāofi ʻa Tokoua Henschel mo Tokoua Knorr ʻo aʻu ki he mate ʻa Knorr ʻi he 1977. ʻI heʻene faʻa fakataha mo Tokoua Knorr, naʻe fononga ai ʻa Tokoua Henschel ki he ngaahi fonua laka hake he 150, ʻi he ʻaʻahi mo hono fakalototoʻaʻi ʻa e Kau Fakamoʻoni ʻa Sihova takatakai ʻi he māmaní, tautefito ki he kau misinalé mo e faʻahinga ko ia ʻi he ngaahi ʻōfisi vaʻá. Ko e ngaahi fononga ko iá naʻe faingataʻa ʻi he taimi ʻe niʻihi, pea aʻu ʻo fakatuʻutāmaki. ʻI he 1963 ʻi heʻene ʻaʻahi ki ha fakataha-lahi ʻi Laipīlia, naʻe hoko ai ʻa Tokoua Henschel ʻo maʻukovia ʻe ha fakatanga anga-fakamamahi ʻi heʻene fakafisi ke kau ʻi ha kātoanga mamahiʻi fonua.a ʻI he taʻemanavaheé, naʻe toe foki ʻa Tokoua Henschel ki Laipīlia ʻi ha ngaahi māhina siʻi pē ki mui ai ke feʻiloaki mo e palesiteni ʻo e fonuá pea ke kumi ki ha tauʻatāina lahi ange ʻo e lotú maʻá e Kau Fakamoʻoni ʻa Sihova ʻi aí.
ʻI he ngāue ki he ngaahi palopalema mo e ngaahi pole faingataʻá, naʻe ʻiloa ʻa Tokoua Henschel ʻi heʻene ngāue ʻaonga, ʻo ngaofengofua mo fakaʻatuʻí. Ko hono kaungāngāué naʻa nau mahuʻingaʻia tautefito ʻi heʻene māú, ko ʻene anga-fakanānaá, mo ʻene fakakatá. ʻI heʻene maʻu ha manatu anga-kehé, naʻá ne ʻai ke fiefia ʻa e kau misinale tokolahi takatakai ʻi he māmaní ʻi he vave ʻene manatuʻi honau hingoá, ko ha kupuʻi lea ʻe taha pe ua ʻi he lea fakalotofonuá, pea mo ha foʻi lea fakakata—ʻa ia naʻá ne fakahoko fakataha mo ha fofonga fiefia.
ʻOku fakamanatu mai kia kitautolu ʻe he Maika 6:8 (NW) ke tau “ʻofa ʻi he anga-leleí.” ʻE manatua ʻa Milton Henschel ʻi heʻene fokotuʻu ha faʻifaʻitakiʻanga ʻi he meʻa ko iá. Neongo ʻa hono fatongia mafatukitukí, naʻá ne kei fotungofua, anga-fakaalaala, mo anga-lelei ai pē. Naʻá ne manako ʻi he lea, “ʻI he taimi ʻo e veiveiuá, manatuʻi ko e meʻa anga-leleí ʻa e meʻa ʻoku totonú.” Lolotonga ʻoku tau mamahi ʻi he mole ʻa e tokoua ʻofeina ko ení, ʻoku tau fiefia ʻi heʻene kātaki faitōnunga ʻo aʻu ki he ngataʻangá, ʻo fakapapauʻi ʻa ʻene maʻu ʻa hono palé, ko e “kalauni ʻo e moʻui.”—Fakahā 2:10.
[Fakamatala ʻi lalo]
a Sio ki he 1977 Yearbook of Jehovah’s Witnesses, peesi 171-7.
[Fakatātā ʻi he peesi 31]
Ko M. G. Henschel mo N. H. Knorr
[Fakatātā ʻi he peesi 31]
Mo hono uaifí, ʻa Lucille