Ko ha Tangata Naʻe ʻOfa ʻi he Moʻuí mo e Kakaí

KO Daniel Sydlik, ko ha mēmipa ngāue fuoloa ia ʻo e Kulupu Pule ʻa e Kau Fakamoʻoni ʻa Sihová, naʻá ne ʻosiki hono ʻalunga fakaemāmaní ʻi he ʻaho Tūsite, ʻEpeleli 18, 2006. Naʻá ne taʻu 87 pea naʻá ne hoko ko ha mēmipa ʻo e fāmili Pēteli ʻi Brooklyn, Niu ʻIoke, ʻi he meimei taʻu ʻe 60.

Ko Tokoua Dan, ʻa ia ko hono hingoa ʻofeina ia naʻe uiʻaki ʻe hono ngaahi kaumeʻa ofí, naʻá ne hū ki he Pētelí ʻi he 1946. Ki muʻa ʻi he taimi ko iá, naʻá ne ngāue ko ha tāimuʻa makehe ʻi Kalefōnia peá ne fakamoleki foki ha taimi ʻi pilīsone lolotonga ʻa e Tau II ʻa Māmaní koeʻuhi ko ʻene tuʻu-ʻatā faka-Kalisitiané. Ko ʻene ngaahi hokosia lolotonga ʻa e taimi ko iá naʻe fakamatalaʻi mahino ia ʻi heʻene talanoa ki he moʻuí, ʻa ia ʻoku hā ʻi he Watchtower ʻo Sune 1, 1985 ʻi he kaveinga “He Taʻehanotatau Moʻoni ko e Kaumeʻa mo Koé, ʻE ʻOtua!”

Naʻe ʻiloa ʻa Tokoua Sydlik ko e tama anga-fakatōkilalo mo fakakaungāmeʻa. ʻI heʻene tataki ʻa e lotu pongipongí maʻá e fāmili Pētelí, ko ʻene fakakaukau fakatuʻamelie mo e ʻofa ʻi he moʻuí naʻe faʻa fakahaaʻi mai ia ʻi heʻene ngaahi lea kamatá: “He meʻa lelei moʻoni ia ke moʻui ʻo tauhi ki he ʻOtua moʻoni mo moʻuí.” ʻI heʻene fai ʻa e malanga maʻá e kakaí, naʻá ne fakalototoʻaʻi ʻa e fakakaukau ko ení ki he niʻihi kehé, ʻo ne fai ʻa e ngaahi malanga ʻi he ngaahi kaveinga hangē ko e “Monuʻiaā ka ko e Kakai ʻOku Nau ʻOtua ʻAki ʻa Sihova,” “Tapua Atu ʻa e Fiefia ʻa Sihová,” “Tauhi ke Moʻui ʻa e Afi ʻo e Laumālie ʻo e ʻOtuá,” pea mo e “ʻOku Teʻeki Hoko Mai ʻa e Meʻa Lelei Tahá.”

ʻI he 1970, naʻe mali ai ʻa Tokoua Sydlik mo Marina Hodson, mei ʻIngilani, ʻa ia naʻá ne fakamatalaʻi ia ko ha “meʻaʻofa mei he ʻOtuá.” Naʻá na tauhi fakataha kia Sihova ʻo laka hake ʻi he taʻu ʻe 35.

Lolotonga hono ngaahi taʻu ʻi he Pētelí, naʻe ngāue ai ʻa Tokoua Sydlik ʻi he ngaahi potungāue kehekehe, ʻo kau ai ʻa e ʻōfisi pulusí mo e Potungāue Faitohí. Naʻá ne toe ngāue foki ʻi he fale fakamafola lea WBBR. Pea ʻi Nōvema ʻo e 1974, naʻe fili ai ia ki he Kulupu Pulé ʻo iku mai ai pē ʻo ne ngāue fakataha mo e kōmiti Kau Ngāué mo e kōmiti Faitohí.

Laka hake ʻi he taʻu ʻe 30, ko e ngāue fakataha ʻa Tokoua Sydlik mo e Kōmiti Kau Ngāué naʻe fakaʻilongaʻiʻaki ia ʻene ʻofaʻi lahi ʻa e kakaí. Naʻá ne fakalototoʻaʻi ʻa e tokolahi ʻaki hono leʻo matolú, ʻo ne tohoakiʻi maʻu pē ʻa e tokangá ki he monū makehe ʻoku tau maʻu ko e tauhi kia Sihová. Naʻá ne fakamamafaʻi hokohoko ko e fiefia moʻoní ʻoku ʻikai ke fakatuʻunga ia ʻi he ngaahi meʻa fakatuʻasinó, ka ʻi hotau vahaʻangatae mo Sihová pea mo ʻetau vakai ki he moʻuí.

Neongo ʻa e ongo lahi ki he fāmili Pētelí ʻa e mole ʻa Tokoua Sydlik, ko ʻene faʻifaʻitakiʻanga ʻi he tuʻunga ko e tokotaha ʻoku ʻofa moʻoni ʻi he moʻuí mo e kakaí, ʻe hokohoko atu ʻene tākiekina ʻa e fāmili Pētelí. ʻOku tau loto-falala ʻokú ne kau ʻi he lotolotonga ʻo e faʻahinga ko ia ʻoku lea ki ai ʻi he Fakahā 14:13: “ʻOku monuʻia ʻa e pekia ʻoku pekia ʻi he ʻEiki. Pea ʻoku folofola ʻa e Laumalie, ʻIo, koeʻuhi te nau mālōlō mei heʻenau fakaongosia, he ko ʻenau ngaahi ngaue te nau muimui atu mo kinautolu.”