Ngaahi Fehuʻi mei he Kau Lautohí

ʻOku totonu ke fēfē ʻetau mahinoʻi ʻa e lea ʻa Paula ʻo pehē kuo pau ke hoko ha uitou “ko e uaifi ʻo e tangata pe taha” koeʻuhi ke ne taau ai ki ha tokoni mei he fakatahaʻanga Kalisitiané?​—1 Timote 5:9.

Koeʻuhi naʻe lea ʻa e ʻapositolo ko Paulá ʻo fekauʻaki mo ha uitou, ko e kupuʻi lea “ko e uaifi ʻo e tangata pe taha” ʻoku pau moʻoni ko e ʻuhinga iá ki hono tuʻunga ki muʻa ke ne hoko ko ha uitoú. ʻE ʻuhinga nai eni ko e uitoú kuo pau naʻá ne mali tuʻo taha pē? Pe ʻoku lava ke ʻuhinga ʻa e lea ia ʻa Paulá ki ha meʻa kehe?a

Kuo fakahuʻunga ʻe he niʻihi naʻe lea ʻa Paulá fekauʻaki mo e kau uitou ʻa ia ne nau mali tuʻo taha peé. Ko e moʻoni ʻi he ngaahi anga fakafonua mo e sōsaieti lahi, ko ha uitou naʻe nofo taʻemali ai pē naʻe vakai tefito ki ai ʻokú ne ʻulungāanga lelei. Kae kehe, ko ha vakai pehē ʻoku kehe ia mei he ngaahi lea ʻa Paula he ʻū tohi kehé. Ko e fakatātaá, naʻá ne fakamahino ki he kau Kalisitiane ʻi Kolinitoó neongo ko ʻene fakakaukaú ʻe fiefia ange ha uitou kapau naʻá ne nofo taʻemali ai pē, “oku ataatā ia ke mali kiate ia oku ne loto ki ai; kae i he Eiki be.” (1 Kolinito 7:​39, 40, PM; Loma 7:​2, 3) Tānaki atu ki ai, ʻi heʻene tohi kia Tīmoté, naʻe pehē ai ʻe Paula: “Ko hoku loto ki he kau uitou [kei siʻí], ke nau toe mali.” (1 Timote 5:14) Ko ia ai, naʻe ʻikai fakaangaʻi ha uitou ʻo kapau naʻá ne fili ke toe mali.

ʻOku totonu leva ke fēfē ʻetau mahinoʻi ʻa e ngaahi lea ʻa Paula kia Tīmoté? Ko e kupuʻi lea “ko e uaifi ʻo e tangata pe taha” ʻoku hā ia ʻi he foʻi veesi pē ko ení. ʻI he muʻaki leá, ʻoku ʻuhinga fakafoʻileá ko e “fefine ʻa e tangata pē taha.” ʻOku mālié he ko e kupuʻi leá ni ʻoku meimei tatau ia mo ia naʻe ngāueʻaki tuʻo lahi ʻe Paula ʻi heʻene ʻū tohí, ʻi heʻene pehē, “ko e husepaniti ʻo ha fefine pe taha,” pe “tangata ʻo ha fefine pē taha” ʻi he muʻaki leá. (1 Timote 3:​2, 12; Taitusi 1:6) Naʻe ngāueʻaki ʻe Paula ʻa e husepāniti ʻo ha fefine pē tahá ʻi heʻene fakahokohoko ʻa e ngaahi tuʻunga taau ki he kau ʻovasia mo e kau sevāniti fakafaifekau Kalisitiané. ʻI he potutohi ko iá, ʻoku ʻuhinga tefito ʻa e fakamatalá ke taau ha tangata ki he fatongia ʻi he fakatahaʻanga Kalisitiané, kapau ʻokú ne mali, kuo pau ke ne faitōnunga mo mateaki ki hono uaifí pea taʻemele fakaeʻulungāanga.b ʻI heʻene peheé, ko e kupuʻi lea ʻi he 1 Timote 5:9 ʻoku hā ngali ʻuhinga tatau: Ki ha uitou ke taau ki ha tokoni mei he fakatahaʻangá, kuo pau naʻá ne hoko ko ha uaifi līʻoa mo mateaki ʻa ia naʻe faitōnunga ki hono husepānití lolotonga ʻene moʻuí pea kuo pau ke ʻatā mei ha mele fakaeʻulungāanga pē. Ko e toe ngaahi fiemaʻu naʻe fakahokohoko ʻe Paulá ʻoku tuhu kotoa ia ki ha tokotaha pehē.—1 Timote 5:10.

[Fakamatala ʻi lalo]