Koví—Heʻikai Lava ke Taʻofi Ia?
ʻOku toʻo hake ʻe ha kiʻi tamasiʻi fieʻilo ha meʻa ʻi he loto ʻataʻataá—ko ha foʻi maina—pea ʻoku fakakuihi ai ia pea konga hono sinó ʻi he kotoa ʻo ʻene moʻuí. ʻOku liʻaki ʻe ha faʻē ʻene pēpē toki fāʻeleʻí, ʻo fufū ia ʻi he taha ʻo e ngaahi kapa veve he veʻehalá. ʻOku toe foki ha tokotaha naʻe fakanofo mei he ngāué ki he ngāueʻanga naʻá ne ʻi aí, ʻo fana ʻa e tokotaha kotoa pē ʻokú ne sio ki aí, peá ne tāmateʻi leva mo ia. Ko ha tangataʻifonua ʻoku fakaʻapaʻapaʻi ʻokú ne pāʻusiʻi ʻa e fānau ʻoku ʻikai hanau maluʻí.
KO E meʻa fakamamahí he ko e ngaahi līpooti ʻo e ngaahi tōʻonga kovi peheé kuo hoko ia ko e meʻa mātuʻaki anga-maheni ʻi hotau taimí. ʻOku toe fakamamahi angé, he ko e ngaahi līpooti ko ení ʻoku faʻa fakapuliki ia ʻe he ngaahi fakamatala fekauʻaki mo e fakaʻauha fakafaʻahingá pea mo e tautoitoí. “Ko e kovi tahá, he ko e senituli eni ia ʻo Sētane,” ko e lau ia ʻa e ʻētita ʻi ha tohi naʻe pulusi ʻi he 1995. “Kuo teʻeki ai fakahaaʻi ʻi ha kuonga ki muʻa ʻe he kakaí ha pōtoʻi pe holi lahi pehē ke tāmateʻi ʻa e laui miliona ʻo e kakai kehé koeʻuhi ko e matakalí, lotú pe tuʻungá.”
ʻI he taimi tatau, ʻoku ʻuliʻi ʻe he tangatá ʻa e ʻeá, ʻuliʻi ʻa e foʻi māmaní, fakaʻauha ʻa ʻene koloa fakanatulá pea tāmateʻi ʻo meimei ʻosi ʻaupito ʻa e faʻahinga taʻefaʻalaua ʻo e fanga manú. ʻE lava ke ikuʻi ʻe he faʻahinga ʻo e tangatá ʻa e ngaahi kovi kotoa ko ení pea ngaohi ʻa e māmaní ke hoko ko ha feituʻu lelei ange mo malu ange? Pe ʻe hangē ʻa e feinga ke fai peheé ko e feinga ke tafi fakafoki ʻaki ha taufale ʻa e huʻa mai ʻa e tahí? Naʻe pehē ʻe ha palōfesa kuo lahi ʻene tohi fekauʻaki mo e tuʻunga-lea ki he koví: “Kuó u maʻu ha holi mālohi ʻaupito ke fai ha liliu lahi ki he māmaní, ke fakaleleiʻi ʻa e māmaní. Ka ko e māmaní ʻoku ʻikai hā haʻane laka ki muʻa.” Mahalo ʻokú ke maʻu ʻa e ongoʻi meimei tatau.
Ko e anga ʻo e huʻu ʻa e māmaní ʻoku lava ke fakatatau ia ki ha vaka ʻoku folau ʻi ha tahi ʻoku hou tuʻu mo fakatuʻutāmaki ange ʻi he ʻaho taki taha. Neongo ʻoku ʻikai fie folau ha taha ʻi he feituʻu ko iá, ko e ngaahi feinga kotoa ke liliu ʻa hono ʻaluʻangá ʻoku taʻelavameʻa. ʻOku ngaʻunu hangatonu atu pē ʻa e vaká ia ki he afā fakatupu maté ʻo ʻikai lava ke taʻofi.
ʻI ha tuʻunga, ko e tōlalo fakautuutu ko ení ʻoku lava ke tukuakiʻi ia ki he taʻehaohaoa ʻa e tangatá. (Loma 3:23) Neongo ia, ko e tuʻunga ʻo e koví, ko hono lahí, mo ʻene taʻehōloá ʻoku hā ngali lahi ange ia ʻi he kovi ʻa ia ʻoku lava ke tupu mei he tangatá. ʻOku malava ke pehē ʻoku puleʻi ʻa e faʻahinga ʻo e tangatá ʻe ha ivi taʻehāmai ʻoku mālohi mo kovi? Kapau ko ia, ko e hā ia, pea ʻe lava fēfē ke tau maluʻi kitautolu mei ai? Ko e kupu hoko maí ʻe lāulea ai ki he ongo fehuʻi ko ení.
[Maʻuʻanga ʻo e Tā ʻi he peesi 3]
© Heldur Netocny/Panos Pictures