Ngaahi Fehuʻi mei he Kau Lautohí

Koeʻuhi naʻe fekauʻi ʻa e kau Siú ke ʻoua te nau kai “ha meʻa levani” lolotonga ʻa e Pāsová, ko e hā naʻe ngāueʻaki ai ʻe Sīsū ʻa e uainé​—ko ha meʻa ʻoku maʻu mei ha fakatoka ʻoku kau ai ʻa e lēvani​—ʻi he taimi naʻá ne kamata ai ʻa e Fakamanatu ʻo ʻene pekiá?​—Ekisoto 12:20; Luke 22:​7, 8, 14-20.

Ko e kātoanga ʻo e Pāsová, ʻi hono fakaʻilongaʻi ʻa e ʻEkisoto ʻa e fānau ʻa ʻIsilelí mei ʻIsipité, naʻe kamata ia ʻi he 1513 K.M. ʻI hono ʻoange ʻa e ngaahi fakahinohino ki hono kātoangaʻí, naʻe pehē ʻe Sihova: “ʻE ʻikai te mou momoʻi kai ha meʻa levani, ʻi homou ngaahi nofoʻanga kotoa pe te mou kai ma taʻelevani.” (Ekisoto 12:​11, 20) Ko e fakataputapui fakaʻotua ko ení naʻe ngāueʻaki pē ki he faʻahinga mā ʻe kai lolotonga ʻa e Pāsová. Naʻe ʻikai ha lave ia ai ki ha uaine.

Ko e ʻuhinga tefito ki he tapui ʻo e lēvaní he ko e mavahe ʻa e kau ʻIsilelí mei ʻIsipité naʻe fakavavevave. “Naʻe ʻave ʻe he kakai ʻenau takaonga ma kuo teʻeki levani,” ko e fakamatala ia ʻa e Ekisoto 12:​34, “kuo haʻi ʻenau ngaahi natuʻanga ma ʻi honau pulupulu, ʻo hilifaki ki honau uma.” Ko e ʻikai ʻi ai ha lēvani lolotonga ʻa e ngaahi kātoanga Pāsova naʻe hokohoko atu aí te ne hoko ko e fakamanatu ki he ngaahi toʻutangata ʻi he kahaʻú fekauʻaki mo e moʻoniʻi meʻa mahuʻinga ko ení.

ʻI he faai mai ʻa e taimí, naʻe faʻa hoko ʻo fai ai ʻa e vakai ki he lēvaní ko ha fakaʻilonga ia ʻo e angahala pe mele. Ko e fakatātaá, ʻi he lave fekauʻaki mo ha tokotaha ʻulungāanga taʻetaau ʻi loto ʻi he fakatahaʻanga Kalisitiané, naʻe ʻeke ʻe he ʻapositolo ko Paulá: “ʻIkai ʻoku mou ʻilo, ka lave ha meʻi levani ki he takaonga ma, ta ʻoku levani hono kotoa?” Peá ne toki pehē leva: “Mou tafi kituʻa ʻa e levani muʻa, ka mou hoko ko e takaonga ngaohi foʻou, ʻo tāu mo homou tuʻunga, ko e ngaahi foʻi ma taʻelevani: pea ʻasili he kuo feia foki hotau pasova, ko Kalaisi: ko ia ke tau fai ʻa e katoanga, kae ʻoua naʻa tau fai ʻaki ʻa e levani muʻa, ʻumaʻā ʻa e levani ko e loto kovi mo e ngaue pango; ka tau fai ʻaki ʻa e meʻa taʻelevani, ko e maʻa mo e moʻoni.” (1 Kolinito 5:​6-8) Ko e mā taʻelēvani pē naʻe lava ke hoko ko ha fakatātā ʻo e sino fakaetangata taʻeangahala ʻo Sīsuú.​—Hepelu 7:26.

Ko hono ngāueʻaki ʻo e uainé ʻi he kātoanga Pāsová naʻe toki tānaki mai ia ki mui ʻe he kau Siú. ʻOku ngalingali, naʻe tānaki mai ia hili ʻenau foki mei he fakaheeʻi ki Pāpiloné. ʻOku ʻikai ke lēkooti ʻi he Tohi Tapú ia hano taʻofi ʻo e tānaki mai ko ení, pea ko ia naʻe lava ai ʻe Sīsū ke ne ngāuetotonuʻaki ʻa e uainé ʻi he kai ʻo e Pāsová. Ko e moʻoni, ko e fakatoka fakanatula naʻe hoko ki he uaine ʻo e kuonga muʻá naʻe kehe ia mei he meʻa ʻoku fai felāveʻi mo e maá. ʻI he tuʻunga ʻo e takaonga mahoaʻá, ko e fakatoká naʻe fiemaʻu ki ai ha ʻīsite ia pe lēvani. Ko e uaine naʻe ngaohi mei he kālepí naʻe ʻikai fiemaʻu ha meʻa pehē ia ke tānaki ki ai. Ko e ngaahi nāunau ki he fakatoka uainé naʻe ʻosi ʻi he kālepí pē ia. Ko e huhuaʻi kālepi haohaoá naʻe ʻikai mei ala maʻu ia ʻi he Pāsová koeʻuhi heʻikai kei nofo taʻefakatoka ia ko e uaine mei he taimi utu-taʻú ʻi he taimi fakatōlaú ki he Pāsová ʻi he taimi failaú.

Ko ia ai, ko hono ngāueʻaki ko ia ʻe Sīsū ʻa e uainé ko ha nāunau fakaefakatātā ʻo e Fakamanatú ʻoku ʻikai fepaki ia ʻi ha faʻahinga founga mo e ngaahi fakahinohino ki he Pāsová fekauʻaki mo e lēvaní. Ko ha faʻahinga uaine kulokula pē ʻoku ʻikai ke tānaki ki ai ha suka, kava mālohi pe sipaisi, ʻoku feʻungamālie ia ke ngāueʻaki ko e fakatātā ʻo e “taataa maogooga” ʻo Kalaisí.​—1 Pita 1:​19, PM.