“Te Nau Fua Ai pe Heʻenau Motuʻa”

ʻOKU tokolahi ʻa e kakai ʻi he ngaahi fonua Metiteleniané ʻoku nau tō ʻa e paame teití ʻi honau ngaahi loto ʻapí. ʻOku ʻiloa ʻa e ngaahi ʻakaú ni ʻi heʻenau fakaʻofoʻofá mo e ifo honau fuá. ʻIkai ko ia pē, ʻoku nau fua ai pē ʻo aʻu ʻo laka ʻi he taʻu ʻe teau.

Ko Tuʻi Solomone ʻo ʻIsileli ʻo e kuonga muʻá naʻá ne fakamatalaʻi fakaemaau ʻa e lōloa ʻo ha taʻahine Sūnemi fakaʻofoʻofa ʻokú ne hangē ha fuʻu pāmé. (Hiva o e Hiva 7:7) ʻOku pehē ʻe he tohi ko e Plants of the Bible: “Ko e foʻi lea faka-Hepelū ki he paame teití ko e ‘tàmâr.’ . . . Naʻe hoko ia ko e fakaʻilonga ʻa e kau Siú ki he fakaʻofoʻofa mo e matamatalelei, pea naʻe faʻa uiʻaki ia ʻa e kakai fefiné.” Ko e fakatātaá, ko e tuofefine hoihoifua tamai-taha ʻo Solomoné naʻe ui ia ko Tema. (2 Samiuela 13:1) ʻOku kei fakahingoaʻaki pē eni ʻe he ngaahi mātuʻa ʻe niʻihi honau ngaahi ʻofefiné.

ʻOku ʻikai ko e kakai fefine hoihoifuá pē ʻoku fakatatau ki ha fuʻu pāmé. Naʻe hiva ʻa e tangata-tohi-sāmé: “ʻE toʻulu hange ha paame ʻa e maʻoniʻoni: Te ne tupu hange ha sita ʻi Lepanoni. Ko e kau to ʻi he fale ʻo Sihova, te nau toʻulu ʻi he ngaahi lotoʻā ʻo hotau ʻOtua. Te nau fua ai pe ʻi heʻenau motuʻa; te nau mohu huhuʻa mo laumata.”​—Sāme 92:​12-14.

ʻI he ʻuhinga fakaefakatātā, ko e faʻahinga ʻoku tauhi faitōnunga ki he ʻOtuá lolotonga ʻenau taʻumotuʻá ʻoku nau meimei hangē ai ha fuʻu paame matamataleleí. “Ko e ʻuluhina ko e kalauni matamatalelei ʻoku maʻu ʻi he hala ʻo e faitotonu,” ko e lau ia ʻa e Tohi Tapú. (Palovepi 16:31) Neongo ʻe hōloa nai honau mālohi fakaesinó ʻi heʻenau fakaʻaʻau ke motuʻá, ko e kau taʻumotuʻá ʻe lava ke nau kei tauhi maʻu honau mālohi fakalaumālié ʻaki ʻenau maʻu ivi mei hano ako tuʻumaʻu ʻa e Folofola ʻa e ʻOtuá, ʻa e Tohi Tapú. (Sāme 1:​1-3; Selemaia 17:​7, 8) Koeʻuhi ko ʻenau ngaahi lea fakaʻofoʻofá mo ʻenau faʻifaʻitakiʻanga leleí, ʻoku hoko ai ʻa e kau taʻumotuʻa faitōnungá ko e matavai lahi fau ʻo e fakalototoʻa ki he niʻihi kehé pea ʻoku nau fua ai pē ʻi he taʻu ki he taʻu. (Taitusi 2:​2-5; Hepelu 13:​15, 16) Hangē ko e paame teití, ko e kau taʻumotuʻá ʻe lava ke nau fua ai pē ʻi heʻenau motuʻá.