ʻOku Tali ʻe he ʻOtuá ʻa e Founga Lotu Kotoa Pē?

Tali anga-mahení:

▪ “Ko e lotu kotoa pē ko e ngaahi hala ia ʻoku aʻu ai ki he ʻOtuá.”

▪ “ʻOku ʻikai mahuʻinga ʻa e meʻa ia ʻokú ke tui ki aí kapau ʻokú ke loto-moʻoni.”

Ko e hā naʻe leaʻaki ʻe Sīsuú?

▪ “Mou hu ʻi he matapa fāsiʻi: he ʻoku fālahi ʻa e matapa, pea ʻatā ʻa e hala, ʻoku fakatau ki mala, pea toko lahi ʻa e kakai ʻoku hū atu ai: koeʻuhi ʻoku fāsiʻi ʻa e matapa, pea ʻefiʻefi ʻa e hala, ʻoku fakatau ki he moʻui; pea tokosiʻi ʻa e kakai ʻoku ʻilo ia.” (Mātiu 7:13, 14) Naʻe ʻikai tui ʻa Sīsū ia ʻoku taki atu ʻa e hala kotoa pē ki he ʻOtuá.

▪ “Ko e tokolahi te nau lea mai ʻi he ʻaho kó é, ʻo pehe, ʻEī, ʻEī, ʻikai ko ho huafa naʻa mau palofisai ai? pea ko ho huafa naʻa mau kapusi tevolo ai? pea ko ho huafa naʻa mau feia ai ʻa e ngāhi mana lahi? Pea te u toki vete kiate kinautolu hoku loto, ʻo pehe, Teʻeki te u ʻiloa kimoutolu: ʻalu meiate au, ʻa e kau maumau lao.” (Mātiu 7:22, 23) ʻOku ʻikai tali ʻe Sīsū ʻa e faʻahinga kotoa ʻoku nau taukaveʻi ʻoku nau muimui ʻiate iá.

ʻOKU koloaʻaki ʻe he kakai lotu tokolahi ʻenau tuí mo e talatukufakaholó. Ka ko e hā ʻoku hokó kapau ko e ngaahi akonakí ni ʻoku ʻikai feongoongoi mo e meʻa ʻoku maʻu ʻi he Folofola ʻa e ʻOtuá, ʻa e Tohi Tapú? Naʻe fakahaaʻi ʻe Sīsū ʻa e fakatuʻutāmaki ʻo e muimui ʻi he ngaahi talatukufakaholo faʻu ʻe he tangatá ʻi heʻene pehē ki he kau taki lotu ʻi hono ʻahó: “Kuo mou fakataeʻaongaʻi ʻa e lao ʻa e Otua ʻaki hoʻomou lau fakaeonoʻaho.” Naʻá ne hoko atu leva ʻo lave ki he folofola ko eni ʻa e ʻOtuá: “Ko e kakai ni ʻoku nau fakaʻapaʻapa kiate au ʻaki honau loungutu, ka ko honau loto ʻoku fakamamaʻo. Ko e kula noa ʻenau lotu mai; ʻoku nau ako ʻaki ha ngāhi tokateline ʻa ia ko e ngāhi tuʻutuʻuni pe ʻa e tangata.”—Mātiu 15:1-9; Aisea 29:13.

ʻOku toe mahuʻinga foki ʻa e ʻulungāangá ʻo ʻikai ko e tuí pē. ʻOku lau ʻa e Tohi Tapú ki he faʻahinga ʻoku nau taukaveʻi ʻoku nau lotu ki he ʻOtuá: “ʻOku nau lau ʻoku nau ʻilo ʻa e ʻOtua, ka ʻi heʻenau ngaahi ngaue ʻoku nau fakaʻikaiʻi ia.” (Taitusi 1:16) Ko hono moʻoní, ʻoku lau ʻa e Tohi Tapú ki he faʻahinga ʻoku moʻui ʻi hotau taimí: “Ko e kau ʻofa ki he malie ʻo ʻikai ʻofa ki he ʻOtua, ko e kakai ʻoku maʻu ʻa e ngeʻesi ʻo e lotu, ka kuo nau liʻaki hono kakano: ke ke fulituʻa ki he kakai pehe foki.”—2 Timote 3:4, 5.

ʻOku fiemaʻu ʻa e loto-moʻoní, ka ʻoku fiemaʻu ʻa e meʻa lahi ange. Ko e hā hono ʻuhingá? Koeʻuhi ʻoku lava ke loto-moʻoni ha taha ka ʻoku hala. Ko ia ko e ʻilo totonu fekauʻaki mo e ʻOtuá ʻoku mātuʻaki mahuʻinga. (Loma 10:2, 3) Ko hono maʻu ʻa e ʻilo ko ení pea ngāue ʻo fehoanaki mo e meʻa ʻoku leaʻaki ʻe he Tohi Tapú ʻe ʻai ai ke malava ʻo tau fakahōifua ki he ʻOtuá. (Mātiu 7:21) Ko ia ai, ko e moʻoni, ko e lotu moʻoní ʻoku kau ki ai ʻa e taumuʻa totonu, tui totonu mo e ngāue totonu. Pea ko e ngāue totonú ʻoku ʻuhingá ko hono fai fakaʻaho ʻa e finangalo ʻo e ʻOtuá!—1 Sione 2:17.

Kapau te ke saiʻia ke ʻilo lahi ange fekauʻaki mo e meʻa ʻoku tala mai ʻe he Tohi Tapú fekauʻaki mo e ʻOtuá, fetuʻutaki ki he Kau Fakamoʻoni ʻa Sihová ki ha ako Tohi Tapu taʻetotongi ʻi ʻapi.

[Fakatātā ʻi he peesi 9]

Ko e lotu moʻoní ʻoku kau ki ai ʻa e taumuʻa totonu, tui totonu, mo e ngāue totonu