ʻOku Tokanga Mai ʻa e ʻOtuá Kiate Au?

Tali anga-mahení:

▪ “ʻOku fuʻu mahuʻinga ʻa e ʻOtuá ia ke fakakaukau mai ki heʻeku ngaahi palopalemá.”

▪ “ʻOku ʻikai te u tui au ʻokú ne tokanga mai kiate au.”

Ko e hā naʻe leaʻaki ʻe Sīsuú?

▪ “ʻIkai ʻoku fakatau ha fanga kiʻi misi ʻe toko nima ki ha konga seniti ʻe ua? pea ʻoku ʻikai tuku taʻe manatu hanau toko taha ʻi he ʻafio ʻa e ʻOtua. Ka naʻa mo e ngaahi tuʻoni louʻulu ʻomoutolu kuo ʻosi lau fakalāutelau. ʻOua te mou manavahe: ʻoku mou mahuʻinga ʻi ha fanga misi tokolahi.” (Luke 12:6, 7) ʻOku ʻikai ha veiveiua, naʻe akoʻi ʻe Sīsū ʻoku tokanga mai ʻa e ʻOtuá kia kitautolu.

▪ “ʻOua te mou lotomoʻua, ʻo mou pehe, Te tau kai ai e ha mo inu e ha? mo kofuʻaki ʻa e ha? he ko e ngāhi mea ko eni ʻoku hehenga ki ai ʻa Senitaile: pea ʻoku meaʻi ʻe hoʻomou Tamai Fakalangi ʻoku tāu mo kimoutolu ʻa e ngāhi meʻa ko ia kotoa.” (Mātiu 6:31, 32) Naʻe fakapapauʻi ʻe Sīsū ʻoku ʻafioʻi ʻe he ʻOtuá ʻetau ngaahi fiemaʻu fakafoʻituituí.

ʻOKU fakahaaʻi papau ʻe he Tohi Tapú ʻoku tokanga mai ʻa e ʻOtuá kia kitautolu. (Sāme 55:22; 1 Pita 5:7) Kapau ko ia, ko e hā leva ʻoku tau hokosia ai ʻa e faingataʻa lahi he ʻaho ní? Kapau ʻoku ʻofa mo mālohi fakaʻaufuli ʻa e ʻOtuá, ko e hā ʻoku ʻikai ai te ne fai ha meʻa ke fakangata ʻa e faingataʻá?

Ko e talí ʻoku kau ki ai ʻa e moʻoniʻi meʻa ʻoku ʻikai ʻiloʻi ʻe he tokolahi—ko Sētane ko e Tēvoló ʻa e pule ʻo e māmani fulikivanu ko ení. ʻI hono ʻahiʻahiʻi ʻo Sīsuú, naʻe tuʻuaki ange ʻe Sētane kiate ia ʻa e ngaahi puleʻanga kotoa pē ʻo e māmaní, ʻo ne pehē: “Te u foaki kiate koe ʻa e pule ki he ngaahi meʻa ni kotoa, mo hono nāunau: he kuo tuku ia kiate au; pea ʻilonga ha taha ʻoku ou loto ki ai ʻoku ou foaki ia ki ai.”—Luke 4:5-7.

Ko hai naʻá ne ʻai ʻa Sētane ko e pule ʻo e māmaní? ʻI he taimi naʻe talangofua ai ʻetau ʻuluaki ongo mātuʻá, ʻa ʻĀtama mo ʻIvi kia Sētane peá na sītuʻa ki he ʻOtuá, ko hono moʻoní, naʻá na fili ai ʻa Sētane ko hona pule. Talu mei he angatuʻu ko iá, naʻe fakaʻatā anga-kātaki ai ʻe he ʻOtua ko Sihová ʻa e taimi ke fakahaaʻi ai ko e tuʻunga-pule ʻa Sētané ʻoku taʻelavameʻa fakaʻaufuli. Kuo ʻikai fakamālohiʻi ʻe Sihova ʻa e kakaí ke nau tauhi kiate ia, ka kuó ne fakaʻatā ʻa e faingamālie ke nau foki ange ai kiate ia.—Loma 5:10.

Koeʻuhi ʻoku tokanga mai ʻa e ʻOtuá kia kitautolu, kuó ne fai ʻa e ngaahi fokotuʻutuʻu kia Sīsū ke ne fakatauʻatāinaʻi kitautolu mei he pule ʻa Sētané. ʻI he kahaʻu ofi maí, ʻe hanga ai ʻe Sīsū ʻo “fakakaʻanga ʻa e toko taha ʻa ia ʻoku aʻana ʻa e malohi ʻo e mate, ʻa ia ko e Tevolo.” (Hepelu 2:14) ʻI he fai peheé, te ne hanga ai ʻo “holoki ʻa e ngaahi ngaue ʻa e Tevolo.”—1 Sione 3:8.

ʻE toe fakafoki mai ʻa e palataisí ki he māmani ko ení. ʻI he taimi ko iá, ʻe hanga ai ʻe he ʻOtuá ʻo “holoholo ʻa e loʻimata kotoa pē mei honau mata [ʻo e kakaí]; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; [ʻe] mole ʻa e ngaahi meʻa muʻa.”—Fakahā 21:4, 5.a

[Fakamatala ʻi lalo]

[Fakatātā ʻi he peesi 8]

ʻE toe fakafoki mai ʻa e palataisí ki he māmani ko ení