Kuo Pau Ke Ke Tui ki he Tolu-Tahaʻi-ʻOtuá ke Hoko Ai ko ha Kalisitiane?

Ko ha tohi ako ʻi he kolisí, ko e World Religions in Denmark, naʻe pulusi ʻi he 2007, naʻe fakamatalaʻi ai ʻa e Kau Fakamoʻoni ʻa Sihová ko ha kau Kalisitiane tokosiʻi ʻoku nau muimui ofi ʻi he Tohi Tapú. Ko hono moʻoní, ko e Kau Fakamoʻoni ʻa Sihová ko e kautaha lotu faka-Kalisitiane fika tolu ia ʻi he tokolahi tahá ʻi Tenimaʻake.

Kae kehe, naʻe fakaangaʻi lahi ʻe ha pīsope ʻo e Siasi Fakafonua ʻo Tenimaʻaké ʻa e fili ʻe he faʻu-tohí ke fakakau ʻa e Kau Fakamoʻoní ʻi he tohi akó. Ko e hā hono ʻuhingá? “Kuo teʻeki ai ke u fetaulaki mo ha teolosia ʻoku fakakaukau [ko e Kau Fakamoʻoni ʻa Sihová] ko e kau Kalisitiane,” ko e lau ia ʻa e pīsopé. “ʻOku nau fakaʻikaiʻi ʻa e Tolu-Tahaʻi-ʻOtuá, ʻa ia ko e foʻi mafu ia ʻo e lotu faka-Kalisitiané.”

Ko e faʻu-tohi ʻo e tohí, ko e sōsiolosia fakalotu ko Annika Hvithamar, naʻá ne fakahaaʻi ko e taimi ko ē ʻoku ʻeke ai ki he kakaí ʻa e ʻuhinga ʻoku nau fakakaukau ai ko e kau Kalisitiane kinautolú, ʻoku ʻikai ʻaupito haʻanau tali koeʻuhí ko ʻenau tui ko e ʻOtuá ko ha Tolu-Tahaʻi-ʻOtuá. ʻIkai ko ia pē, ko ha konga ʻi he tohi akó ʻoku fakakaveinga “Ko ha Kalisitiane Koe?” ʻoku fakamatala ai: “Ko e tokāteline Tolu-Tahaʻi-ʻOtuá ʻa e taha ʻo e palopalema faingataʻa taha ʻo e teolosia faka-Kalisitiané.” ʻOku toe pehē ai: “ʻI he taimi kotoa pē, ʻoku faingataʻa ai ke fakamatalaʻi ki he kau Kalisitiane taʻeakó ʻa e ʻuhinga ko e ʻOtua Kalisitiané ʻoku kei hoko pē ia ko e ʻotua ʻe taha ʻo ʻikai ko e ʻotua ʻe tolu.”

Ko e meʻa ʻoku akoʻi ʻe he Tohi Tapú fekauʻaki mo e ʻOtuá mo Sīsuú ʻoku mahino mo faingofua. ʻOku ʻikai faingataʻa ia ke mahinoʻi. Pea ko e foʻi lea “Tolu-Tahaʻi-ʻOtuá” pe ko e fakakaukau ko iá ʻoku ʻikai maʻu ia ʻi he Folofola ʻa e ʻOtuá. ʻOku fakahaaʻi mahino ʻe he Tohi Tapú ko Sīsū Kalaisí ko e ʻAlo ʻuluaki fakatupu ia ʻo e ʻOtuá. (Kolose 1:15) ʻOku toe fakahaaʻi ai ʻa e hoko ʻa Sīsū ko e “Fakalaloa ʻi he vahaʻa ʻo e ʻOtua mo e tangata.” (1 Timote 2:5) Fekauʻaki mo e Tamaí, ʻoku pehē ʻe he Tohi Tapú: “Ko ho huafa ko Sihova ʻoku hope atu ʻi mamani katoa.”—Sāme 83:18.

ʻOku tui ʻa e Kau Fakamoʻoni ʻa Sihová ʻoku mātuʻaki mahuʻinga ʻa e tui kia Sīsuú. (Sione 3:16) ʻI he ʻuhinga ko ení, ʻoku nau fakakaukau fakamātoato ki he fekau ʻa Sīsuú: “Kuo tohi, Ko e ʻEiki [pe Sihova] ko ho ʻOtua te ke lotu ki ai, pea ko ia pe toko taha te ke ʻotuaʻaki.” (Mātiu 4:10) Ko e moʻoni, ko ha taha ʻoku feinga ke talangofua ki he ngaahi fekau ʻa Sīsuú ʻe lava ke ui ia ko e Kalisitiane.