ʻOkú Ke Manatuʻi?
Kuó ke lau fakalelei ʻa e ngaahi ʻīsiu fakamuimui ʻo e Taua Leʻo? Sio angé pe ʻe lava ke ke tali ʻa e ngaahi fehuʻi ko ení:
ʻI he ʻuhinga fē ʻe lava ke hoko ai ʻa Solomone ko ha faʻifaʻitakiʻanga fakaefakatokanga kiate kitautolú?
Naʻe tāpuakiʻi pea ngāueʻaki ʻe he ʻOtuá ʻa Tuʻi Solomone. Kae kehe, lolotonga ʻene pulé, naʻe afe ʻa Solomone mei he akonaki fakaʻotuá. Naʻá ne mali mo e ʻofefine pangani ʻo Feló, naʻá ne maʻu ha ngaahi uaifi tokolahi, pea naʻá ne fakaʻatā ha kakai fefine pangani ke nau taki māmālie atu ia ki he lotu loí. ʻOku fiemaʻu ke tau fakaʻehiʻehi mei hono fakatupulekina māmālie ʻa e ngaahi fakakaukau pe ngaahi hehema halá. (Teu. 7:1-4; 17:17; 1 Tuʻi 11:4-8)—12/15, peesi 10-12.
ʻOku totonu ke mo māvae ʻi ha nofo mali ʻoku ʻikai fiefia?
ʻOku ʻikai fokotuʻu mai ʻe he Folofola ʻa e ʻOtuá ko e māvaé ko ha founga ia ke fakaleleiʻi ʻaki ʻa e ngaahi palopalema fakaemalí. Kae kehe, ʻi he ngaahi tuʻunga ʻoku fuʻu tōtuʻá, ʻe pau ke fili ai ha Kalisitiane pe ʻoku fakapotopoto ke māvae pe ʻikai.—1/1, peesi 10.
ʻE lava fēfē ke nofo ofi ha tamai ki hono fohá?
Fakakau ʻa e fohá ʻi he ngaahi ngāue fakaʻahó. Ko e fakatātaá, kapau ʻoku fai ha ngaahi ngāue, ʻai ke ne tokoni. ʻE kiʻi fuoloa ange nai ai ke ʻosiki ʻa e ngāué; ka ʻe fakamālohiʻi ai ʻa e haʻi ʻi hona vaá, pea ʻe akoʻi ai ʻe he tamaí ki hono fohá ha tōʻonga ngāue lelei. Tānaki atu ki aí, vaheʻi ha taimi ke vaʻinga fakataha ai. Lolotonga ʻa e taimi vaʻingá, ʻoku lava ke fakahāhā ai ʻe ha tamai ʻa e ʻofa ki hono fohá fakatouʻosi ʻi he leá mo e ngāué.—1/1, peesi 19.
Ko e hā ʻoku lava ke ako ʻe he fānaú fekauʻaki mo e ʻOtuá mei he meʻa naʻe hoko kia ʻŪtikó?
Ko e meʻa ʻe taha ko Sihova ʻe lava ke ne toe fakafoki mai ʻa e kau maté ke moʻui, ʻo kau ai ʻa e fānaú. ʻOku mahinoʻi mo ʻofaʻi ʻe Sihova ʻa e fānaú, ʻio, ʻo toe lahi ange ia ʻi heʻenau ongo mātuʻá. ʻI he taimi naʻe ʻi māmani ai ʻa Sīsuú, naʻá ne fakahaaʻi pe ʻoku fēfē ʻa e Tamaí ʻi heʻene puke ʻa e fanga kiʻi fānaú ʻo tāpuakiʻi kinautolu.—1/1, peesi 23.
Ko e hā ʻoku totonu ai ke tau filifili fakalelei ʻa e ngaahi kaumeʻá?
Ko hotau ngaahi kaumeʻá ʻoku nau tākiekina mālohi ʻa e ngaahi fakakaukau ʻoku tupu ʻi hotau lotó. Ko ia ai, ko ʻetau fili ʻo e ngaahi kaumeʻá ʻe lava ke ne tākiekina ʻa e faʻahinga tokotaha te tau hoko ki aí. ʻI he hangē ko e tokotaha-hiki Tohi Tapu ko Tēvitá, te tau loto ke filifili ʻa e ngaahi kaumeʻa te ne tokoniʻi kitautolu ke tauhi maʻu ʻetau anga-tonú ʻi he tuʻunga ko ha sevāniti ʻa e ʻOtuá.—1/1, peesi 24.
Ko e hā ʻokú ne fakahaaʻi ko e talu mei he ʻuluaki senitulí ʻo faai mai ai, kuo ʻi ai maʻu pē ha kau Kalisitiane pani moʻoni ʻe niʻihi ʻi he māmaní?
ʻI he pealapeli ʻa Sīsū fekauʻaki mo e “uité” pea mo e “teá,” ko e “tenga leleí” naʻe ʻuhinga ia ki he ‘ngaahi foha ʻo e Puleʻangá.’ (Māt. 13:24-30, 38) Ko e teá ʻe tupu fakataha hake ia mo e uité ʻo aʻu ki he utu-taʻú. Ko ia, neongo ʻoku ʻikai lava ke tau leaʻaki papau ko hai ʻa e faʻahinga ʻi he kalasi ko e uité, kuo pau pē kuo ʻi ai maʻu pē honau niʻihi ʻo aʻu mai ki hotau taimí.—1/15, peesi 7.
ʻE lava fēfē ke tau ngāue ke ikuʻi ha hehema ki he meheká?
eni ʻa e ngaahi sitepu ʻoku lava ke ne tokoniʻi kitautolú: Feinga mālohi ke fakatupulekina ʻa e ʻofá mo e ʻofa fakatokouá, feohi mo e kakai anga-fakaʻotuá, feinga ke failelei, “fiefia mo e faʻahinga ko ia ʻoku fiefiá.” (Loma 12:15)—2/15, peesi 16-17.
ʻI hono fai ha faleʻí, ko e hā ʻa e ngaahi tefitoʻi moʻoni ʻoku totonu ke tau tauhi maʻu ʻi heʻetau fakakaukaú?
ʻIloʻi ʻa e tuʻunga moʻoni ʻoku kau ki aí. Fakaʻehiʻehi mei he tali fakavavé. Ngāueʻaki anga-fakatōkilalo ʻa e Folofola ʻa e ʻOtuá. Kapau ʻoku malava, ngāueʻaki ha laipeli fakateokalati. Fakaʻehiʻehi mei hono fai ha ngaahi fili maʻá e niʻihi kehé.—3/15, peesi 7-9.