Ko e Huhu Kona ʻa e Maté

Ko e maté ʻoku ʻikai ko ha kaveinga manakoa ia. ʻOku tokolahi ʻa e kakai ʻoku ʻikai ke nau fie talanoa fekauʻaki mo ia. Pe ʻoku vavé ni pe tuai, kuo pau ke tau fehangahangai mo ia. Ko e huhu kona ʻa e maté ʻoku langa pea uhu.

Heʻikai lava ʻe ha meʻa ke ne teuʻi kakato kitautolu ki ha mate ha mātuʻa, hoa mali pe ko ha kiʻi tama. Ko e fakatamakí ʻe lava nai ke hoko taʻeʻamanekina pe hoko ʻi ha vahaʻa taimi lōloa. Ko e hā pē ʻa e tuʻungá, ko e mamahi ʻi he maté heʻikai lava ia ke hao mei ai pea ko hono ikuʻangá ʻe lava ke fakatupu lōmekina.

Ko Antonio, naʻe mate ʻene tamaí ʻi ha fakatuʻutāmaki he halá, naʻá ne fakamatala: “ʻOku hangē ia ko ha tokotaha naʻá ne tāpuni malu ho falé pea ʻalu ia mo e kií. Heʻikai lava ke ke foki ki ʻapi, naʻa mo ha kiʻi taimi siʻi pē. Ko koe pē mo hoʻo ngaahi manatú. Ko e tuʻunga moʻoní ia. Neongo ʻokú ke feinga ke fakaʻikaiʻi—koeʻuhí ʻoku hā taʻetotonu—ka heʻikai lava ke ke fai ha meʻa.”

ʻI he fehangahangai mo ha mole meimei tatau, ko Dorothy naʻe hoko ko ha uitou ʻi hono taʻu 47 pea feinga ke maʻu ʻa e ngaahi talí. ʻI he hoko ko ha faiako lautohi faka-Sāpaté, naʻe ʻikai ʻaupito haʻane ongoʻi ko e maté pē ʻa e ngataʻangá. Ka naʻe ʻikai ke ne maʻu ha tali mahino. Naʻá ne ʻeke ki heʻene faifekau ʻIngilaní, “Ko e hā ʻoku hoko kia kitautolu ʻi heʻetau maté?” Naʻá ne tali ange, “ʻOku ʻikai ke ʻiloʻi moʻoni ia ʻe ha taha. Te tau tatali pē mo sio pe ko e hā e meʻa ʻe hokó.”

ʻOku haʻisia kitautolu ʻi he “tatali pē mo sio pe ko e hā e meʻa ʻe hokó”? ʻOku ʻi ai ha toe founga ʻe lava ke tau ʻiloʻi fakapapau ai ko e maté pē ʻa e ngataʻangá?