Ko e Hā e ʻUhinga ʻOku Lotu Ai ʻa e Kakaí?

Ko e lotú ko e konga ia hoʻo moʻuí? ʻOku pehē ʻa e kakai tokolahi, naʻa mo e niʻihi ʻo e kau fakaʻikaiʻi-ʻOtuá. Ka ko e hā e ʻuhinga ʻoku lotu ai ʻa e kakaí? Fakatatau ki ha savea ʻi Falanisē, ko e vaeua ʻo e kakai Falaniseé ʻoku nau lotu pe fakalaulauloto ʻi ha ngaahi taimi “ke ongoʻi fiemālie ange.” Hangē ko e kau ʻIulope tokolahi, ko ʻenau lotú ko e ō pē ki fale lotu. ʻI hono kehé, ʻoku nau feinga ki he “ngaahi ola fakafiemālie ʻo e lotú.” ʻI he tafaʻaki ʻe tahá, ko e kau lotu ʻe niʻihi ʻoku nau hanga pē ki he ʻOtuá ʻi he taimi ʻoku nau fiemaʻu aí, pea ʻamanekina ha tali vave ki heʻenau ngaahi kolé.—ʻAisea 26:16.

Fēfē koe? ʻOkú ke pehē ko e lotú ko e founga pē ia ke fakatonutonu ai hoʻo ngaahi fakakaukaú? Kapau ʻokú ke tui ki he ʻOtuá, ʻokú ke vakai ki he ngaahi ʻaonga ʻo e lotú ʻi hoʻo moʻuí? Pe ʻoku hā ngali ʻoku ʻikai tali hoʻo ngaahi lotú? ʻOku lava ke tokoniʻi koe ʻe he Tohi Tapú ke ke vakai ki he lotú ʻoku ʻikai ko ha faitoʻo fakafiemālie, ka ko ha monū maʻongoʻonga ia ke ʻunuʻunu ofi ai ki he ʻOtuá.