Ko ha Tōʻonga ʻo e Anga-Lelei Faka-Kalisitiane
ʻI HA kiʻi kolo ʻi Kusalati, ʻInitia, naʻe papitaiso ai ʻa e tamai ʻa John ko e taha ʻo e Kau Fakamoʻoni ʻa Sihová ʻi he konga ki mui ʻo e 1950 tupú. Ka ko John, ko hono fanga tokoua ʻe toko nima mo e fanga tuofāfiné, mo ʻenau faʻeé naʻa nau siasi Katolika Loma pea nau maʻu lotu ʻaupito. ʻI he ʻuhinga ko ení, naʻa nau fakafepakiʻi ʻa e tui ʻa e tangataʻeikí.
ʻI he ʻaho ʻe taha, naʻe kole ange ai ʻe he tamai ʻa John kiate ia ke ne ʻave ha sila ki ha tokoua ʻi he fakatahaʻangá. Ka ʻi he pongipongi ko iá naʻe lavea lahi ai ʻa e foʻi tuhu ʻo John ʻi heʻene hae ha fuʻu talamu kapa. Neongo ia, naʻá ne kei loto pē ke talangofua ki heʻene tamaí, ko ia naʻá ne haʻihaʻi ʻaki ha konga tupenu hono tuhu naʻe fetotoʻí peá ne ʻalu ke ʻave ʻa e silá.
ʻI he aʻu atu ʻa John ki he tuʻasilá, naʻá ne ʻoange ʻa e silá ki he mali ʻo e tokouá. Ko e taha ia ʻo e Kau Fakamoʻoni ʻa Sihová. Naʻá ne fakatokangaʻi ʻa e foʻi tuhu ʻo John naʻe laveá peá ne tala ange te ne tokoni ki ai. Naʻá ne toʻo mai ʻene puha faitoʻó, fufulu ʻa e laveá, pea haʻihaʻi ia. Peá ne ngaahi leva ha ipu tī mafana ʻo John. Naʻá ne talanoa anga-fakakaumeʻa kiate ia ʻi he taimi kotoa ko iá ʻo fekauʻaki mo e Tohi Tapú.
Koeʻuhi ko ʻene anga-leleí, naʻe kamata ke liliu ai ʻa e fakakaukau ʻa John ki he Kau Fakamoʻoní. Ko ia naʻá ne ʻeke ange kiate ia ʻa e foʻi fehuʻi ʻe ua fekauʻaki mo e tui ʻa e Kau Fakamoʻoni ʻa Sihová ʻa ia ʻoku kehe mei he tui ʻa e Siasi Katoliká. Naʻá ne ʻeke ange pe ko Sīsū ʻa e ʻOtuá pea ʻoku totonu nai ke lotu ʻa e kau Kalisitiané kia Malia. Naʻe ako ʻe he tuofefiné ʻa e lea faka-Kusalatí peá ne malava ke tali kia John ʻi heʻene leá tonu. Naʻá ne fakahaaʻi ange ʻa e talí mei he Tohi Tapú pea ʻoange kiate ia ʻa e kiʻi tohi “Koe ongoongo lelei ni ʻoe Puleʻanga.”
Ki mui ai, ʻi hono lau ʻe John ʻa e kiʻi tohí, naʻá ne ʻiloʻi ko e meʻa naʻá ne laú ʻoku moʻoni. Naʻá ne ʻalu ki he pātelé ʻo ʻeke kiate ia ʻa e ongo fehuʻi tatau. Naʻe ʻita lahi ʻa e pātelé peá ne tolongi ʻaki ia ha Tohi Tapu, mo kaila: “Kuó ke hoko ko Sētane! Fakahaaʻi mai ʻa e feituʻu ʻoku pehē ai ʻe he Tohi Tapú ʻoku ʻikai ko e ʻOtuá ʻa Sīsū. Fakahaaʻi mai ʻa e feituʻu ʻoku pehē ai ʻoku ʻikai totonu ke ke lotu kia Maliá. Fakahaaʻi mai!” Naʻe ʻohovale ʻa John ʻi he tōʻonga pehē ʻa e pātelé. Naʻá ne tala ange ki he pātelé heʻikai ʻaupito te ne toe ʻalu ki he siasi Katoliká. Pea naʻe ʻikai ʻaupito te ne fai pehē!
Naʻe kamata ako ʻa John mo e Kau Fakamoʻoní, tali ʻa e moʻoní, pea kamata tauhi kia Sihova. ʻI he faai atu ʻa e taimí, naʻe fai ʻe he ngaahi mēmipa kehe ʻi he fāmilí ʻa e meʻa tatau. ʻI he taʻu nai ʻe 60 ki mui ai, ko e patepate ʻi he foʻi tuhu ʻo John ʻoku kei fakamanatu ai kiate ia ʻa e tōʻonga anga-lelei faka-Kalisitiane naʻá ne ueʻi ia ke ne fakamoleki ʻa e kotoa ʻo ʻene moʻuí ʻi he tauhi kia Sihová.—2 Kol. 6:4, 6.