Tokoniʻi ʻa e Niʻihi Kehé ke Ako Fekauʻaki mo e ʻAlo ʻo e ʻOtuá, ʻa Sīsū Kalaisí
1 Koeʻuhi ko e tokolahi taha ʻo e kakai ʻi Tongá ni ʻoku taku ko e kau Kalisitiane, ʻoku nau mahuʻingaʻia kotoa ʻia Sīsū Kalaisi. Ko ia, ʻe feʻungamālie ʻi Fepueli ke tuʻuaki ʻa e tohi fakamuimui taha ʻi he lea faka-Tongá, ko e tohi Ko e Moʻungaʻi Tangata Lahi Taha Kuo Moʻui Maí. Koeʻuhí ko ha tohi mahuʻinga ʻeni, ʻoku totonu ke tau fakapapauʻi ko e tokotaha-ʻapí ʻokú ne mahuʻingaʻia moʻoni ʻi he ako lahi ange fekauʻaki mo e ʻAlo ʻo e ʻOtuá ki muʻa ke tau tuʻuaki atu ʻa e tohí. ʻE lava fēfē ke tau fai ia?
2 Feinga ke fakahangataha ki ha fetalanoaʻaki makatuʻunga ʻi he Tohitapú ʻa ia ʻe fakahanga ai ʻa e tokangá kia Sīsū.
Hili ʻa e fakafeʻiloaki ki he tokotaha-ʻapí, te ke leaʻaki nai ha meʻa hangē ko ʻení:
◼ “ʻI he ʻahó ni ʻoku mau ʻeke ki homau ngaahi kaungāʻapí pe ko e hā ʻenau fakakaukau ʻi he taimi ʻoku nau lau ai ʻi heʻenau Tohitapú ʻo fekauʻaki mo e moʻui taʻengatá. [Tuku ke ne tali.] ʻOku mahuʻinga makehé koeʻuhi ʻoku lāulea ʻa e Tohitapú fekauʻaki mo e malava ke hoko iá ʻo tuʻo 40 nai. Ko e hā nai ʻa e ʻuhinga kiate kitautolu ʻa e moʻui peheé? Fakatokangaʻi ʻa e meʻa ʻoku leaʻaki ʻe he Fakahā 21:4. [Lau.] Naʻá ke fakatokangaʻi ʻa e meʻa ʻokú ne talaʻofa maí? [Tuku ke ne tali.] ʻE lava fēfē ke tau maʻu ʻa e moʻui taʻengatá?” Lau ʻa e Sione 17:3, pea fakaeʻa ʻa e fiemaʻu ke maʻu ʻa e ʻiloʻi ʻo e ʻOtuá mo hono ʻAló, ʻa Sīsū Kalaisi. Kapau ʻoku fakahaaʻi nai ʻe he Tokotaha-ʻapí ha mahuʻingaʻia, fakahā ange kiate ia ʻa e tohi Moʻungaʻi Tangata Lahi Taha, ʻo ngāueʻaki ʻa e ngaahi kaveinga tokoni ʻi he talateú koeʻuhí ke langaʻi hake ai ʻa ʻene mahuʻingaʻiá.
3 Kapau ʻoku fakahaaʻi ʻe he tokotaha-ʻapí ha mahuʻingaʻia siʻisiʻi ʻi he ʻuluaki ʻaʻahí, tuʻuaki ʻa e ngaahi ʻīsiu lolotonga ʻo e Taua Leʻo mo e Awake! pe ko e tuleki, ʻE Kei Tuʻu ʻa e Māmani ko ʻEní? Fakahanga ʻa e tokangá ki ha taha pe ua ʻo e ngaahi poini tefito ʻi he tohi ʻoku fakaʻaliʻalí.
4 Tala ange te ke foki atu ʻi ha taimi faingamālie ke hoko atu ʻa e fetalanoaʻaki ʻi he kaveingá mo ia.
Ki ha tuʻuaki nounou maʻá e ngaahi ʻapi femoʻuekiná, ʻe lava ke ke pehē:
◼ “ʻI he ʻahó ni ʻoku mau ʻeke ki homau ngaahi kaungāʻapí pe ko e hā ʻenau fakakaukau ʻi he taimi ʻoku nau lau ai ʻi heʻenau Tohitapú ʻo fekauʻaki mo hono maʻu ʻa e moʻui taʻengatá. Ko e fakatātaá, fakatokangaʻi ʻa e meʻa naʻe leaʻaki ʻe Sīsū ʻi he Sione 17:3. [Lau.] Ke tokoniʻi ʻa e kakaí ke ako lahi ange fekauʻaki mo Sīsū Kalaisí pea mo e meʻa naʻá ne akoʻakí, kuo pulusi ai ʻa e tohi ko ʻení.” Fakaava ʻa e tohi Moʻungaʻi Tangata Lahi Taha ki ha ngaahi fakatātā fakaʻofoʻofa ʻe niʻihi. Huke ki he talateú, pea lau ʻa e palakalafi hono ua ʻi he kaveinga tokoni “ʻAonga ʻOku Maʻu ʻi he Ako Fekauʻaki mo Iá.” Kapau ʻoku mahuʻingaʻia ʻa e tokotaha-ʻapí, tuʻuaki ange kiate ia ʻa e tohí.
5 ʻI he taimi ʻoku toe foki ai ki he ngaahi tohi Moʻungaʻi Tangata Lahi Taha naʻe tukú, manatuʻi ke feinga ke kamata ha ako Tohitapu. ʻE feʻungamālie nai ke kamata ʻi he Lēsoni 3 ʻi he polosiua Fiemaʻu pe ko e vahe 4 ʻi he tohi ʻIlo. ʻI he ʻikai ke tala ange ki he tokotaha-ʻapí ha vahaʻa taimi kuo ʻosi tukupau ʻoku totonu ke fakamoleki ki ai ʻi he uike taki taha, tala ange ko e ngaahi miniti siʻi pē, te ne malava ai ke ako ha fakamatala mahuʻinga lahi ange fekauʻaki mo Sīsū Kalaisi mei he Tohitapú.
6 ʻOfa ke tau ngāueʻaki kotoa hotau ngaahi faingamālié ʻi he māhiná ni ke fakahangataha ʻa e tokangá ki he moʻoni fekauʻaki mo e ʻAlo ʻo e ʻOtuá, ʻa Sīsū Kalaisi, koeʻuhí ke tokoniʻi ʻa e niʻihi kehé ki he hala ki he moʻui taʻengatá.—Mt. 7:14.