Ko Hono Ako ʻa e Tohi Moʻungaʻi Tangata Lahi Taha

¹ ʻI he māhina hoko maí, te tau kamata ako ai ʻa e tohi Moʻungaʻi Tangata Lahi Taha ʻi heʻetau ngaahi Ako Tohi ʻa e Fakatahaʻangá. Koeʻuhí ʻoku ʻikai ke ʻi ai ha peesi pe ngaahi fika ʻo e palakalafi ʻi he tohí, ʻe tokoni ha ngaahi fakahinohino ʻe niʻihi.

² Ko e taimi-tēpile ki he akó ʻoku fakahokohoko ai ʻa e ngaahi vahe ke akó, ʻa ia ʻoku meimei ki he vahe ʻe tolu pe fā ʻi he uike taki taha. Ko e vahe 35, 111, mo e 116 ʻoku fuʻu lōloa pea ʻe vahevahe ia ki he ako taki taha ʻe ua. ʻI he hili hono ʻai ha tokoua taau ke ne lau ha vahe fakalūkufua (pe ko ha kaveinga tokoni fakalūkufua), ʻe ʻeke ʻe he tokotaha faiako ʻo e akó ʻa e ngaahi fehuʻi ʻi he ngataʻanga ʻo e vahe ʻoku fehoanaki mo e vahe pe konga ne toki laú. Ko e ngaahi talí ʻoku ʻikai ke hokohoko maʻu pē ʻi he vahé. ʻOku totonu ke nounou pe hangatonu ʻa e ngaahi talí ʻo makatuʻunga pē ʻi he fakamatala ʻi he lēsoní.

³ ʻI he hili iá, fakatatau ki he taimí, ko e ngaahi konga Tohitapu kotoa pē ʻoku hiki ʻi he ngataʻanga ʻo e vahé ʻoku totonu ke lau. Ko e ngaahi konga Tohitapu ʻoku lōloá ʻe vahevahe nai ia ki he ngaahi konga iiki ke lava ai ʻa e kau malanga kehekehe ʻo vahevahe ʻi hono laú, pea ko e ngaahi talí leva ʻe lava ke fai ia ʻi he meʻa naʻe laú. Ko e ngaahi fehuʻi fakahangatonu ʻoku teuteu ʻe he tokotaha faiakó ʻe tokoni ia ke tohoaki mai ʻa e ngaahi tali mohu ʻuhinga ʻoku fakahaaʻi ai ʻa e founga ʻoku felāveʻi ai ʻa e ngaahi konga Tohitapu naʻe laú mo e meʻa ʻoku fakamatalaʻi ʻi he tohí. Ko e ngaahi fehuʻi mo e ngaahi tali kotoa pē ʻoku totonu ke tokoni ia ki he faʻahinga ʻoku nau ʻi aí ke fakahangataha ʻa e tokangá kia Sīsū Kalaisi, ko ʻene founga moʻuí, pea mo ʻene ngaahi faiakó.

⁴ ʻOku lāulea ʻa e tohi Moʻungaʻi Tangata Lahi Taha ki he moʻui ʻa Sīsū ʻo fakatatau ki he fakahokohoko ʻo e taimí. Ko e sioloto ki he ngaahi meʻá pea maʻu ʻi he ʻatamaí ʻa e feituʻu naʻe hoko aí ʻe lava ke tokoni moʻoni ia ki hono manatuʻi kinautolú. Ko ia ai, fakapapauʻi ke lāulea ki he ngaahi fakatātā fakaʻofoʻofá pea māʻunga fakamatala ki he mape ʻoku ʻasi hili pē ʻa e talateú.

⁵ ʻI he talateu ʻo e tohí, hili ʻa hono lau kotoa ʻa e ngaahi palakalafi ʻi he kaveinga tokoní, ʻe ʻeke ʻe he tokotaha faiakó ʻa e ngaahi fehuʻi kuó ne ʻosi teuteú. Ko e lahi ʻo e lavameʻa ʻi hono ako ʻa e fakamatalá ʻe makatuʻunga ia ʻi he lahi taha ʻo e teuteu ʻa e faʻahinga kotoa pē ʻoku kau ki aí. ʻOku totonu ke tautefito ki he tokotaha faiakó ʻa e teuteu lelei ʻi he uike taki taha koeʻuhí ke ne tokoniʻi ai ʻa e kulupú ke nau hoko ʻo maheni lelei ange mo e moʻungaʻi tangata lahi taha kuo moʻui maí, ʻa hotau ʻEiki mo e Fakamoʻui, ko Sīsū Kalaisí.