ʻOku Poupouʻi ʻe he Ako Tohi ʻa e Fakatahaʻangá ʻa e Ngaahi Ngāue Fakaakó

¹ ʻOku ʻi ai ʻa e kaunga mātuʻaki mahuʻinga ʻa e Ako Tohi ʻa e Fakatahaʻangá ki he polokalama fakaako ʻa e Kautaha ʻa Sihová. ʻOku ʻi he ngaahi feituʻu kehekehe ʻa e ngaahi kulupu ako ʻi he tohí, ʻo ne ʻai ke faingamālie ki he faʻahinga kotoa ke nau ʻalu ki ai. ʻI he ʻi ai ha kulupu ʻi he feituʻu ko ia ʻoku nofo ai ʻa e kau fie fanongó, te nau fiemālie ange nai ke tali lelei ha fakaafeʻi ke nau ʻalu ange.

² ʻOku fai ha feinga ke ʻai ke siʻisiʻi ai pē ʻa hono lahi ʻo e ngaahi kulupu taki taha. ʻOku tokoni ʻeni ki he faiakó ke ne fai ha tokoni fakafoʻituitui ki he faʻahinga taki taha. ʻOku ʻikai ke vave tatau ʻa e ako ʻa e faʻahinga kotoa pē. Kapau ʻoku faingataʻa ki ha taha ke ne maʻu ʻa e mahino ki ha meʻa tefito ʻe taha neongo naʻá ne ako ʻa e lesoní ki muʻa, ʻe fai nai ha toe fakamatala ʻe he faiakó ʻi he ʻosi ʻa e akó. ʻIkai ke ngata aí, ka ʻoku ʻi ai ʻa e ngaahi faingamālie lahi ange ʻi ha kulupu siʻisiʻi ke fai ha ngaahi tali pea ke kau ki hono lau atu ʻo e ngaahi konga Tohi Tapú. ʻOkú ke tokoni ki he fetalanoaʻakí ʻaki hono fai maʻu pē ha ngaahi tali? ʻOkú ke feinga ke tali ʻi hoʻo ngaahi lea pē ʻaʻau? ʻE ʻaonga kiate koe mo e faʻahinga kehé ʻa hoʻo fie kau maʻu pē ki he akó. ʻI hoʻo fai ʻa e teuteú, ngāueʻaki ho mafai fakaefakakaukaú ke ke ʻiloʻilo pe ko e fē ʻa e founga te ke lava ke ngāueʻaki fakafoʻituitui ai ʻa e ngaahi meʻa tefito ʻe niʻihi mei he lesoní.​—Hep. 5:14.

³ ʻI hoʻo fakatokangaʻi ʻa e ngaahi founga ʻoku ngāueʻaki ʻe he faiakó ʻi hono fai ʻa e akó, te ke ako ai ki he founga ke fai ha ako Tohi Tapu ʻoku fakatupu tokanga mo fakamaama ange. ʻI he ʻosi hono lau ʻe ha tokoua alafua ʻa e ngaahi palakalafí, ʻoku fai ha fetalanoaʻaki ki he ngaahi fehuʻí. ʻOku fakalototoʻaʻi ʻe he faiakó ʻa e toko taha hono kotoa ke nau lea mai ʻaki ʻa e leʻo feʻunga. Fakatatau ki he taimí, te ne feinga ke maʻu ʻa e ngaahi tali ʻo kau ki he ngaahi konga Tohi Tapu ʻoku ʻasi kae ʻikai ke hiki fakaʻāuliliki maí ke tokoniʻi kitautolu ke ʻiloʻi honau kaungá. (Fakafehoanaki mo Nehemaia 8:8.) ʻI he taimi ʻe niʻihi te ne toe fai nai ha fakamatala fakamaʻalaʻala nounou pe ngāueʻaki ha toe ngaahi fehuʻi kehe ke fakahā mai ha meʻa tefito. ʻE tokoni nai ha fakatātā pe ha talanoa fakatātā kiate kitautolu ke sio pe ko e hā ʻa e kaunga ʻo e fakamatalá ki heʻetau moʻuí.

⁴ ʻI he ngaahi kulupu ʻe niʻihi ʻo e Ako Tohi ʻa e Fakatahaʻangá ʻoku faʻa tokosiʻi ʻa e faʻahinga ʻoku ʻalu ange. ʻOkú ke ʻalu maʻu pē ki ai? Kapau ʻoku ʻikai, kuo mole meiate koe ha tokonaki mahuʻinga. Ko e fokotuʻutuʻu ko eni ko e ako ʻi he tohí ko e taha ia ʻo e ngaahi founga ʻoku fakahāhā mai ai ʻe Sihova ʻene tokanga kiate kitautolú. (1 Pita 5:7) ʻOkú ne saiʻia ke tau laka ki muʻa ʻi he ʻiló mo e potó koeʻuhi ke tau mālohi fakalaumālie. ʻI he tafaʻaki ʻe tahá, ʻe saiʻia ʻa Sētane ke ne fakatuaiʻi ʻetau laka ki muʻa fakalaumālié pea ke fakavaivaiʻi kitautolu koeʻuhi ke siʻisiʻi ange ʻa ʻetau ʻaonga kia Sihova mo ʻEne kautahá. ʻOua ʻe tuku ke hoko ʻa e meʻa ko ʻení! ʻAi ʻa e feōngoaki anga-ʻofa ʻo e kulupu fekoekoeʻi ko ʻení ke aʻu ki ho lotó pea ke ueʻi ai koe ke ke fakamālō atu ai pē kia Sihova.​—Fakafehoanaki mo Sāme 111:1.

⁵ Kuo fokotuʻu ʻi he ngaahi feituʻu lahi taha ʻoku fai ai ʻa e ako ʻi he tohí ʻa e ngaahi fakataha ki he ngāue fakamalangá ʻa ia ʻoku faingamālie ki he kau malangá. Ko e ngaahi fakataha nai eni ki he ngāue fakamalanga ʻoku fai he lolotonga ʻo e uiké, he fakaʻosinga ʻo e uiké, pe ʻi he houa efiafí. ʻOku fakapapauʻi ʻe he faiako ʻo e ako ʻi he tohí pe ʻoku feʻunga ʻa e feituʻu ke ngāue ki aí pea ʻe ʻi ai ha toko taha te ne fai ʻa e taki ʻi he ngāue fakamalangá. ʻOku ʻikai totonu ke laka ʻa e ngaahi fakataha ki he ngāue fakamalangá ʻi he miniti ʻe 10-15. ʻE fai nai ʻe he toko taha faiakó ha lave nounou ki he potutohi fakaʻahó ʻo kapau ʻoku ʻi ai hano kaunga ki he ngāue fakamalangá pea mo ne fai ha fokotuʻutuʻu ʻe taha pe ua fekauʻaki mo e ngāue fakamalangá pe fai ha fakahāhā fuonounou ʻo e meʻa ʻoku lolotonga tuʻuakí.

⁶ ʻE feinga ʻa e faiakó ke ne ngāue fakataha mo e toko taha taki taha ʻi heʻene kulupú ʻi he faai atu ʻa e taimí, ʻo ne fai ʻa e fakalototoʻa mo e akonaki feʻunga mālie.​—Fakafehoanaki mo Maʻake 3:14; Luke 8:1.