Puha Fehuʻi

◼ Ko fē ʻa e taimi ʻe feʻungamālie ai ke fokotuʻu ha toe kulupu Ako Tohi ʻa e Fakatahaʻangá?

Ko hono fokotuʻu ha kulupu foʻou ʻoku totonu ke fai ha fakakaukau ki ai ʻi he taimi ʻoku fiemaʻu aí koeʻuhí ke tauhi maʻu ʻa e kau maʻu akó ki he toko 15 nai pe tokosiʻi ange ai ʻi he ngaahi feituʻu faiʻanga ako tohi taki taha, kau ai ʻa e Fale Fakatahaʻangá. Ko e hā ʻoku feʻungamālie ai ʻení?

ʻI he taimi ʻoku tokosiʻi ai ʻa e ngaahi kulupu Ako Tohi ʻa e Fakatahaʻangá, ʻoku malava ke tokanga lelei ange ai ʻa e tokotaha faiakó ki he tokotaha taki taha ʻoku haʻu ki aí. Tānaki atu ki aí, ʻe maʻu ai ʻe he tokotaha kotoa pē ha faingamālie feʻunga ke ne fai ha tali ʻi ha tuʻunga ʻe malava ke tokoni ia ki hono fai ha talaki fakahāhā ʻo ʻenau tuí ki he kakaí. (Hep. 10:23; 13:15) ʻI hono maʻu ha ngaahi kulupu tokosiʻi ange ʻi ha ngaahi feituʻu kehekehe ʻi he kotoa ʻo e feituʻu ngāue ʻa e fakatahaʻangá ʻoku faingamālie ange ai ʻa hono maʻu ʻa e Ako Tohi ʻa e Fakatahaʻangá mo e ngaahi fakataha ki he ngāue fakamalangá. Ko e ngaahi fakatahaʻanga kuo nau fakalahi ʻa e ngaahi feituʻú kuo nau ʻilo ko e fakatahaʻi ʻo e kau maʻu ʻo e ako tohí ʻoku toe tupulaki mo ia.

ʻOku ʻi ai nai ʻa e ngaahi tuʻunga makehe ʻokú ne ʻai ke feʻunga ai ʻa hono fokotuʻu ʻo ha kulupu ʻe taha, neongo kapau ʻe tokosiʻi. ʻOku moʻoni nai ʻeni ʻi ha feituʻu mavahe pe ko ha ngaahi feituʻu ʻoku lolotonga tokolahi pe siʻi ai ʻa e tangutuʻangá. ʻI he taimi ʻoku fiemaʻu aí, ʻe lava ke fokotuʻu ha kulupu te nau fakataha he lolotonga ʻo e ʻahó koeʻuhí ke ʻaonga ki he faʻahinga taʻumotuʻá, kau ngāue poʻulí, pe fanga tuofāfine ʻoku ʻikai ko ha Fakamoʻoni ʻa honau ngaahi husepānití.

Ko e kulupu ako tohi taki taha ʻoku totonu ke vaheʻi ki ai ha kau malanga mālohi mo longomoʻui fakalaumālie pea pehē ki ha tokotaha faiako mo ha tokotaha lautohi taau. ʻOku totonu ki he fanga tokouá ke nau kakapa atu ke fakahoko ʻa e ngaahi fiemaʻu ko ʻení ʻi he fakatahaʻangá.

ʻOku lava ke poupouʻi ʻe he kau mātuʻá ʻa e laka ki muʻa ʻa e fakatahaʻangá ʻaki hono fakapapauʻi ko e ngaahi kulupu ako tohi ʻa e fakatahaʻangá ʻoku lahi feʻunga pea fai hono tokangaʻi lelei fakalaumālie, pea ʻoku nau fakataha ʻi ha ngaahi feituʻu ʻoku faingamālié. Kapau ʻe ʻaonga, ʻoku totonu ke fokotuʻu ha ngaahi kulupu foʻou koeʻuhí ke lava ʻa e tokotaha kotoa pē ʻo maʻu ʻa e ngaahi ʻaonga kakato ʻo e fokotuʻutuʻu fakalaumālie laulōtaha ko ʻení. ʻE lava ke ke fakaʻatā ho ʻapí ko ha feituʻu ki he ako tohí? Ko e faʻahinga kuo nau fai peheé kuo nau hokosia ha ngaahi tāpuaki fakalaumālie.