ʻOkú Ke ʻIlo ha Fiemaʻu Tokoni?
1 Kuo fakamatalaʻi ʻa Sihova ko ha Tokoni mo e Hūfangaʻanga. ʻOku tau ʻilo ʻoku lava ke tau kole ha tokoni meiate ia ʻi he taimi ʻoku tau fiemaʻu tokoni aí pea te ne tokoniʻi kitautolu. (Sāme 18:2; 46:1) ʻOku lava ke tau faʻifaʻitaki ki he ʻulungaanga loto-ʻofa ko ʻení ʻaki ʻetau fai ha tokoni ki he niʻihi kehé ʻi heʻetau ʻilo ha fiemaʻu tokoní.
2 Ko e hā ʻokú ne ueʻi ha taha ke ne fai ha feinga makehe ke tokoni ki ha tokotaha kehe? Ko e tokolahi taha ʻo e kakaí ʻoku nau pehē ko ha anga-ʻofa fakaetangata ʻeni ke fai. Ko e moʻoni ʻoku fakalototoʻaʻi ia ʻe he Folofola ʻa e ʻOtua. (Loma 15:1) Naʻe enginakiʻi kitautolu ʻe Paula ke ʻoua ʻe taki taha ‘tokanga ki he ngaahi meʻa ʻaʻaná pē, ka ki he ngaahi meʻa ʻa e kakai kehé foki.’—Fili. 2:4.
3 Ko e meʻa ko ʻení ʻe lava ke tau maʻu kotoa ai ha fiefia ʻi hono fai. (Ng. 20:35) Naʻe fili ʻe Paula ʻa e talavou ko Tīmoté ko e faʻifaʻitakiʻanga ia ʻo ha tokotaha naʻá ne “lotomoʻua moʻoni ki hoʻomou ngaahi meʻa.” (Fili. 2:20) ʻOku leleí he ʻoku tau maʻu ʻa e kau talavou tokolahi ʻi he ngaahi fakatahaʻanga ʻi he ʻahó ni ʻoku nau anga pehē. Kae tatau ai pē pe ʻoku tau kei talavou pe taʻumotuʻa, ʻoku ʻi ai ʻa e ngaahi meʻa ʻoku lava ke tau fai kapau ʻoku tau ʻilo ha fiemaʻu tokoni.
4 Kuó ke ongoʻi ʻi ha taimi ʻe niʻihi ʻoku ʻi ai ʻa e ngaahi fiemaʻu tokoni ʻe lava ke fai ha tokanga lelei ange ki aí? Mahalo ko ha tokoua pe tuofefine naʻe ʻi he fale mahakí, pea naʻe tokosiʻi ʻa e Kau Fakamoʻoni naʻe ʻaʻahi ki aí; pe ko ha tokotaha kuo hoko ʻo ʻikai ke toe lava ʻo fai ha meʻa, ka naʻe ʻikai ha tokotaha ia ke fai ha tokoni kiate ia pe tokoni ʻi he ngaahi ngāue ʻi he ʻapí. ʻOku vakai ʻa Sīsū ki he faʻahinga ʻoku nau tauhi kia Sihová ko e ngaahi mēmipa ʻo ha fāmili ʻoku nau fetokangaʻaki moʻoni. (Mk. 3:33-35) ʻI he talanoa fakatātā ʻo e fanga sipí mo e fanga kosí, naʻá ne fakahā ai ko kinautolu ʻoku nau maʻu ʻa e hōifua ʻa e Tuʻí ʻi hono nima toʻomataʻú koeʻuhi ko ʻenau tokoni ki he ngaahi tokoua ʻo e Tuʻí.—Mt. 25:40.
5 ʻE Anga-Fēfē Haʻaku Tokoni? Ko e hā ʻe lava ʻo fai ke tokonaki ha tokoni ʻi he mahino ʻoku ʻi ai ha fiemaʻu tokoni? ʻOku lava ke tau ʻuluaki fai ha tokoni ʻi ha founga? Mahalo ko ha faʻahinga taʻumotuʻa ʻoku nau fiemaʻu ha fakalototoʻa, ka ʻoku ʻikai ke ʻi ai ha ngaahi kaumeʻa ofi ke tokoniʻi kinautolu. ʻOku ʻi ai nai ha kau talavou te nau fiemaʻu ha tokoni. ʻE haʻu nai ki he Kingdom Hall ha fāmili mahuʻingaʻia foʻou ʻoku tokolahi ʻena fānaú ka ʻoku ʻikai ke ʻi ai ʻa e tokotaha malanga ʻoku nau akó. Te na houngaʻia nai ke ʻi ai ha tokotaha ʻe pole ke tokoni kiate kinaua ki he fānaú.
6 ʻI heʻetau tupulekina ʻi he ʻofa ki he moʻoni mo e kautaha ʻa Sihová, ʻoku tau tupulekina foki ʻi he houngaʻia mo e tokanga ki he niʻihi kehe ʻi he fakatahaʻangá. Naʻe fakalototoʻaʻi ʻe Paula ke tau fano atu ʻi he meʻa ko ʻení. (2 Kol. 6:11-13) Naʻe fakamamafaʻi ʻe Sīsū ko ʻetau fakahā ʻa e feʻofaʻakí ko e founga tefito ia ʻoku tau fakahāhaaʻi ai ʻoku tau muimui moʻoni kiate ia.—Sione 13:35.
7 Ko ia ʻi heʻetau ʻilo ha fiemaʻu tokoni, ʻoku totonu ke ueʻi kitautolu ʻe he ʻofa moʻoni ki hotau ngaahi tokouá mo e fakatahaʻangá ke ʻuluaki fai ha meʻa mo tokoni ʻi ha founga pē te tau malavá. (Kal. 6:9, 10) Ko e tokanga ko ʻeni ki he niʻihi kehé ʻokú ne tohoaki fakataha vāofi kitautolu ʻi he haʻi ʻo e ʻofa mo e fāʻūtaha. (1 Kol. 10:24) ʻI he founga ko ʻení, ʻoku tau fai ai ʻa ʻetau tafaʻakí ke tokoni ki ha fiemaʻu ʻi he fakatahaʻangá.