Ko ha Tokoni ʻOku Mātuʻaki Ofi
1. ʻE lava fēfē ke vaivai hoto tuʻunga fakalaumālié?
1 Ko Anna, ko ha tuofefine ʻoku maʻu husepāniti taʻetui pea maʻu mo ha taimi-tēpile ngāue femoʻuekina, naʻá ne ʻiloʻi ko ha meʻa faingataʻa kiate ia ke ne maʻu tuʻumaʻu ʻa e ngaahi fakataha faka-Kalisitiané, kau ki he ngāue fakafaifekaú, pea ako ʻa e Folofola ʻa e ʻOtuá. Neongo naʻá ne kei ʻofa kia Sihova, naʻá ne hoko ʻo ʻikai longomoʻui. Ko e meʻa fakafiefiá, naʻá ne maʻu ʻa e tokoni fakalaumālie mei he kau mātuʻa tokangá.
2. ʻI he founga fē ʻe lava ai ʻa e kau Kalisitiane kotoa ke fakamoʻoniʻi ko ha tokoni mātuʻaki ofi ia?
2 Ko hono tali ʻa e tokoni fakalaumālie ʻoku ʻomai fakafou ʻi he fakatahaʻanga Kalisitiané ʻoku fakahāhaaʻi ai ʻa e falala kia Sihová tonu. ʻI he faʻifaʻitaki ki he tokanga ʻofa ʻa Sīsū Kalaisí, ʻoku kumi ʻa e kau tangata matuʻotuʻa ʻi he fakatahaʻangá ki ha ngaahi faingamālie ke ʻoatu ai ha fakalototoʻa mo ha tokoni ʻaonga ki he faʻahinga ʻoku nau hokosia ʻa e faingataʻaʻia fakalaumālié. (1 Tes. 5:14) ʻOku faʻa hoko, ko ha lea anga-ʻofa ʻo e fakalototoʻa fakatefito ʻi he ngaahi kupu pau Fakatohitapú ʻa e meʻa tofu pē ʻoku fiemaʻú. Ko e tamuʻomuʻa ke tokoniʻi ʻa e faʻahinga ʻi ha tuʻunga vaivai fakataimí ʻoku kaunga ki ai ʻa e kau Kalisitiané kotoa, ʻo ʻikai ko e kau mātuʻá pē. ʻOku ʻikai ha veiveiua kuo hokosia ʻe he tokotaha taki taha ʻo kitautolu ʻa e mālohi ʻo ha “lea [fakakaukauʻi lelei] ʻoku leaʻaki ʻi hono taimi totonú.”—Pal. 25:11, NW; Ai. 35:3, 4.
3, 4. Ko e hā ʻoku kau ki hono tokoniʻi ʻo e niʻihi kehé, pea ʻe anga-fēfē nai ʻetau fai iá?
3 Tamuʻomuʻa: Ko hono fakahāhā ʻa e mahuʻingaʻia ʻofa ʻi he faʻahinga ko ia ʻoku fiemaʻu ki ai ʻa e tokoní ʻoku fiemaʻu ke tau tamuʻomuʻa ai, ʻo fakahāhā ʻa e kaungāongoʻi, pea ke tau tōtōivi. ʻI he hoko ʻa Sionatane ʻo lāuʻilo ki he tuʻunga faingataʻa ʻo Tēvitá, naʻá ne “tuʻu . . . ʻo ne ʻalu kia Tevita ki he vao, ʻo ne poupou hono nima.” (1 Sam. 23:15, 16) Ngāueʻaki ha fakalea fakaalaala ke tokoniʻi ʻa e niʻihi kehé. Ko e ngaahi lea ʻoku ueʻi ʻe he tokanga moʻoní ʻoku maʻu ai ʻa e ngaahi ola lelei tahá. ʻIkai ngata aí, naʻe fakatātaaʻi mahino ʻe Sīsū ko e feinga mohu taumuʻa tōtōiví ʻoku kaunga ia ki hono toe maʻu mai ʻo ha tokoua pe tuofefine fakalaumālie. (Luke 15:4) Ko hono maʻu ha holi tōtōivi ke tokoniʻi ha tokotaha kehé te ne ueʻi kitautolu ke tau kītaki ʻi hono fai ʻa e tokoní neongo kapau ʻoku ʻikai ke hā vave mai ha fakalakalaka ia.
4 He fakalototoʻa ē ko e taimi ʻoku tau tamuʻomuʻa ai ke fakaafeʻi ʻa e niʻihi kehé, hangē ko e faʻahinga ʻi heʻetau ako tohí, ke kau fakataha mo kitautolu ʻi he ngāue fakafaifekaú! ʻI heʻetau tokoniʻi ha kaungā sevāniti ʻa Sihova ke kau ʻi he ngāue fakafaifekaú, ʻoku tau ngāueʻaki nai ʻa e faingamālié ke fakaivimālohiʻi ʻa e nima ʻo e tokotaha ko iá. Ko e ngaahi taimi fakafiefia pehē ʻoku fakamoleki fakataha ʻi he ngāue ʻa Sihová ʻoku tautefito ʻene fakalototoʻá ki he faʻahinga ko ia ʻoku nau toe foki ki heʻenau mafamafatatau fakalaumālié.
5. ʻI he ngaahi tuʻunga ʻe niʻihi, ko e hā ʻa e tokoni ʻe lava ke fai nai ʻe he kau mātuʻá?
5 Ko ha Tokonaki ʻOfa: Ko e faʻahinga ko ia kuo ʻikai ke nau kau ki he ngāue fakamalangá pe feohi mo e fakatahaʻangá ʻi ha taimí ʻoku fiemaʻu nai ki ai ha tokoni lahi ange ke langa hake ʻenau tuí. Ko ha ako Tohi Tapu fakafoʻituitui ʻi ha tohi hangē ko e Lotu ki he ʻOtua Moʻoni Pē Tahá,ʻUnuʻunu Ofi kia Sihova, pe Ko e Hā ʻOku Akoʻi Moʻoni ʻe he Tohi Tapú? ʻa e meʻa tofu pē nai ʻoku fiemaʻú. Koeʻuhi ʻoku ʻosi papitaiso ʻa e tokotahá, ʻoku ʻikai faʻa fiemaʻu ke toe hokohoko atu ʻa e akó ia ʻi ha vahaʻa taimi lōloa. ʻOku totonu ke tokanga ʻa e Kōmiti Ngāue ʻa e Fakatahaʻangá ke siofi ʻa e faʻahinga te nau maʻu ʻaonga nai mei he tokonaki ko ʻení.—Sio ki he ongo Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo Nōvema 1998 mo Nōvema 2000.
6. Naʻe anga-fēfē hono toe maʻu ʻe ha tuofefine ʻe taha ʻa e mālohi fakalaumālié?
6 Ko Anna, naʻe lave ki ai ʻanenai angé, naʻá ne tali loto-houngaʻia ʻa e ʻofa ange ʻa e kau mātuʻá ke ʻai ha tuofefine matuʻotuʻa fakalaumālie ke ne fakahoko ha ako Tohi Tapu mo ia. Naʻe feʻunga mo e konga ako pē ʻe fā ki hono tokoniʻi ia ke ne toe ʻunuʻunu ofi ai kia Sihová. Naʻá ne toe maʻu ʻa e ngaahi fakataha ʻa e fakatahaʻangá pea toe fakakake mo ʻene holi ke fakahīkihikiʻi fakahāhā ʻa Sihova ko e ʻOtuá. Naʻe toe tokoniʻi ia ʻe he tuofefine matuʻotuʻá ʻi he ngāue fakafaifekaú ʻaki hono ʻave ia ʻi heʻene ngaahi ako Tohi Tapú kae ʻoua leva kuó ne mālohi feʻunga ke malanga mei he matapā ki he matapā. Ko e meʻa pē naʻe fiemaʻu kiate iá ko ha nima fietokoni ke ne toe hoko atu!
7. Ko e hā ʻa e ngaahi ʻaonga ʻoku hoko mai mei hono fakaivimālohiʻi fakalaumālie ʻa e niʻihi kehé?
7 Ko hono fakaivimālohiʻi ʻa e faʻahinga ʻoku fiemaʻu tokoní ʻokú ne ʻomai ʻa e ngaahi tāpuaki ki he tokotaha kotoa. Ko e tokotaha ʻoku tokoniʻí ʻokú ne maʻu ʻa e fiefia ʻo e ʻunuʻunu ofi kia Sihová pea mo e hoko ʻo kau ʻi he ngaahi ngāue ʻa ʻEne kautahá. ʻOku fiefia ʻa e kau mātuʻá ʻi he sio ki he fakalakalaka fakalaumālie peheé. (Luke 15:5, 6) ʻOku tohoaki fakataha ʻa e fakatahaʻangá ke fāʻūtaha ʻi hono fakahāhā ʻe he tokotaha kotoa ʻa e fetokangaʻaki ʻofá. (Kol. 3:12-14) He ngaahi ʻuhinga lelei lahi ē ʻoku tau maʻu ke tau faʻifaʻitaki kia Sihova, ko ha tokoni ʻoku mātuʻaki ofi!—Ef. 4:32(5:1, PM).