Puha Fehuʻi
◼ ʻOku lava fēfē ke tokoniʻi ha tokotaha kuo ʻikai ke longomoʻui ʻi ha taimi fuoloa ke toe taau ke hoko ko ha tokotaha malanga ʻo e ongoongo leleí?
ʻI he taimi ʻoku ʻomai ai ʻe he tokotaha ʻikai longomoʻuí ha fakamoʻoni ʻokú ne maʻu ha holi loto-moʻoni ke tauhi ʻa Sihová, ʻoku fakatupunga fiefia ʻeni. (Luke 15:4-6) ʻOku hangehangē, naʻe fakaʻatā ʻe he tokotahá ʻa e fakafepakí pe ngaahi tenge ʻo e moʻuí ke ne kāsia ʻa ʻene ako fakafoʻituituí, maʻu fakatahá, pea mo e kau ʻi he ngāue fakamalangá. ʻOku lava fēfē ke fai ʻa e tokoni fakafoʻituituí ʻi he founga lelei tahá koeʻuhí ka ne fai ha fakalakalaka fakalaumālie?
ʻOku totonu kiate kitautolu kotoa ke tau tamuʻomuʻa ke fakapapauʻi ki he tokotaha ko ʻení ʻa ʻetau ʻofa faka-Kalisitiane moʻoni kiate iá. ʻE ngāue vave leva ʻa e kau mātuʻá ke fakapapauʻi ʻa ʻene ngaahi fiemaʻu fakalaumālie paú. (Sem. 5:14, 15) Kapau naʻe taimi nounou pē ʻa e ʻikai te ne longomoʻuí, ko e meʻa nai pē ʻe fiemaʻú ko ha tokoni mei ha tokotaha malanga taukei ke ʻai ke toe longomoʻui ʻa e tokotahá ʻi he ngāue fakamalangá. Kae kehe, kapau ko e tokotaha ʻikai ke longomoʻuí naʻe ʻikai ke toe feohi ia mo e fakatahaʻangá ʻi ha taimi fuoloa, ngalingali ʻe fiemaʻu ʻa e tokoni lahi ange. Ke langa hake ʻa e tuí mo ʻene houngaʻiá, ko ha ako Tohitapu fakafoʻituitui ʻi ha tohi feʻungamālie ʻe feʻunga nai. ʻI he tuʻunga ko iá, ʻe fokotuʻutuʻu ʻe he ʻovasia ngāué ha tokotaha malanga taukei ke ne fai ʻa e akó. (Hep. 5:12-14; sio ki he Puha Fehuʻi ʻi he ʻEtau Ngāue Fakafaifekau ʻo e Puleʻanga ʻo Nōvema 1998.) Kapau ʻokú ke ʻilo ha taha ʻokú ne fiemaʻu ha tokoni pehē, talanoa ki he ʻovasia ngāue ʻi hoʻo fakatahaʻangá.
Ki muʻa ke fakaafeʻi ha taha ʻikai longomoʻui fuoloa ke toe kau ʻi he ngāue fakafaifekaú, ʻoku feʻunga ki ha mātuʻa ʻe toko ua ke na fakataha mo ia ke sio pe ʻoku taau ke hoko ko ha tokotaha malanga ʻo e Puleʻangá. Te na muimui ki he founga meimei tatau ʻoku ngāueʻaki ʻi he taimi ʻoku fakataha ai mo e faʻahinga foʻou ʻoku nau kumi ke taau ʻo hoko ko e kau malanga ʻo e ongoongo leleí. (Sio ki he Taua Leʻo ʻo Sune 1, 1989, peesi 17.) ʻOku totonu ke maʻu ʻe he tokotaha ʻikai ke longomoʻuí ha holi fakamātoato ke ne vahevahe atu ʻa e ongoongo leleí ki he niʻihi kehé. ʻOku toe fiemaʻu ke ne aʻusia ʻa e ngaahi fiemaʻu tefito ʻoku fokotuʻu mai ʻi he tohi Our Ministry peesi 98-99 pea ke ne maʻu maʻu pē ʻa e ngaahi fakataha ʻa e fakatahaʻangá.
Ko hono maʻu ha founga-tuʻumaʻu fakalaumālie leleí te ne fai ʻa e meʻa lahi ʻi hono tokoniʻi ʻa e tokotaha ʻoku toe foki maí ke fakaivimālohiʻi pea tauhi maʻu hono vahaʻangatae mātuʻaki mahuʻinga mo Sihová pea ke ne hanganaki ʻaʻeva ʻi he hala ki he moʻui taʻengatá. (Mt. 7:14; Hep. 10:23-25) Ko ʻene feinga ke fakahoko hono “tukuingata” pea fakatupulekina ʻa e ngaahi ʻulungaanga faka-Kalisitiane ʻoku tuʻuloá te ne maluʻi ia mei haʻane toe hoko ʻo “fakapikopiko [“ʻikai ke longomoʻui,” NW] pe taʻefua” ʻi he tuʻunga ko ha ākonga Kalisitiané.—2 Pita 1:5-8.