Ko Hai ʻe Fanongo ki Heʻetau Pōpoakí?
1 Kuo ʻikai ha toe taimi ki muʻa ʻi he hisitōlia ʻo e faʻahinga ʻo e tangatá, ʻoku lōmekina ai ʻa e kakaí ʻaki ʻa e fakamatala, ko e lahi taha aí ko e launoa pea aʻu ʻo fakatupu tākihalaʻi. Ko hono nunuʻá, ʻoku ongoʻi taulōfuʻu ai ʻa e tokolahi, pea ʻoku hoko ia ko ha pole kiate kitautolu ke ʻai kinautolu ke fanongo ki he pōpoaki fekauʻaki mo e Puleʻanga ʻo e ʻOtuá. ʻOku ʻikai te nau houngaʻia ʻi he ola lelei ʻe lava ke hoko kiate kinautolu ʻi heʻenau fanongo ki he Folofola ʻa e ʻOtuá.—Luke 11:28.
2 ʻOku tau fiefia koeʻuhi ʻi he ngaahi feituʻu lahi ʻo e māmaní, ʻoku laui mano ai ʻa e kakai ʻoku fanongo ki he pōpoaki ko iá pea tali ʻa ʻetau tuʻuaki ʻo e ngaahi ako Tohitapu ʻi ʻapí. Kae kehe, ʻi he ngaahi feituʻu ʻe niʻihi, ʻoku ʻikai pē ke fuʻu lahi ai hono talí. Ko e lahi taha ʻo e ngaahi ʻaʻahi ʻoku tau fai ʻi he ngāue fakafaifekaú ʻoku ʻikai ha ngaahi ola lelei, pea ʻoku tau fifili nai pe ko hai ʻe fanongo ki heʻetau pōpoakí.
3 Kuo pau ke tau fakaʻehiʻehi mei he hoko ʻo loto-siʻí. Naʻe fakamatalaʻi ʻe Paula: “He ʻilonga ʻa ia ʻe tautapa ki he huafa ʻo e ʻEiki ʻe fakamoʻui. Ka te nau lava fefe ke tautapa ki ha toko taha ʻoku teʻeki . . . ke nau fanongo ki ai? pea fefe haʻanau fanongo ʻoka ʻikai ha taha ke malanga? . . . ʻo hange ko ia kuo tohi, Hono ʻikai fakaʻofoʻofa siʻi vaʻe ʻo e kakai ʻoku ongoongo mai ha ngaahi meʻa lelei!” (Loma 10:13-15) Kapau te tau tōtōivi hono tō ʻa e tenga ʻo e Puleʻangá, ʻe ʻai ia ʻe he ʻOtuá ke tupu ʻi he loto ʻo e faʻahinga loto-totonú.—1 Kol. 3:6.
4 Ko e Kií ko Hono Fai Maʻu Pē ha Ngaahi Toe ʻAʻahi: ʻI he ngaahi feituʻu ʻoku ngalingali ʻoku ʻi ai ha tokosiʻi ʻoku fanongo ai ki heʻetau pōpoakí, ʻoku fiemaʻu ke tau tokangataha ki hono fakatupulekina ha mahuʻingaʻia pē te tau maʻú, ʻo tatau ai pē pe te tau tufa ha ngaahi tohi pe ʻikai. Ko e hā ka fakavave ai ke fakaʻosiʻaki ʻo pehē ʻoku ʻikai pē ha meʻa ia ʻe lava ke fakahoko? ʻI he taimi ʻoku tau tō ai ʻa e tengá, ʻoku ʻikai te tau ʻilo pe ko fē ʻe fua leleí. (Koh. 11:6) Kapau te tau toe foki ki ai ʻo mateuteu ke vahevahe atu ha meʻa ʻe niʻihi mei he ngaahi Konga Tohitapú, naʻa mo e kiʻi taimi nounou pē, te tau malava nai ke aʻu ki he loto ʻo e tokotahá. ʻE lava ke tau tuku ha tuleki pe tuʻuaki ʻa e ngaahi makasini lolotongá. Faifai atu pē, te tau lava nai ke fakaʻaliʻali ha ako Tohitapu. Te tau hoko ʻo ʻohovale ʻi he fiefia ke sio ki he lahi ʻo hono tāpuakiʻi ʻe Sihova ʻetau ngaahi feingá.—Sāme 126:5, 6.
5 Naʻe tuku ha tuleki ʻi ha fefine naʻá ne fakahāhā ha mahuʻingaʻia. Naʻe ʻikai ke toe maʻu atu ia ki hono ʻapí pea ʻi hono maʻu atu he māhina ʻe ua ki mui aí, naʻá ne fuʻu femoʻuekina ke fai ha talanoa. Naʻe toe tuku atu pē kiate ia ha tuleki tatau. Neongo ʻa e ngaahi feinga kīvoi ʻa e tokotaha malangá ke aʻu kiate ia ʻi hono ʻapí, naʻe feʻunga mo e toe māhina ʻe tolu kehe ke fetuʻutaki ai mo iá, ʻo toki maʻu atu pē ʻokú ne puke. Naʻe toe ʻaʻahi atu ʻa e tuofefiné ʻi he uike hoko maí, pea naʻe fakahoko ai ha fetalanoaʻaki nounou fekauʻaki mo e tulekí. ʻI he taimi naʻe toe foki atu ai ʻa e tuofefiné ʻi he uike hono hokó, naʻe fakahā ʻe he fefiné ha mahuʻingaʻia moʻoni ʻi he pōpoaki ʻo e Puleʻangá. Ko ha liliu ʻi he ngaahi tuʻunga ʻo ʻene moʻuí naʻá ne ʻai ia ke ne ʻiloʻi ʻa ʻene fiemaʻu fakalaumālié. Naʻe kamata ha ako Tohitapu, pea hili iá naʻá ne loto-māfana ke ako ʻi he uike kotoa pē.
6 ʻI ha ngaahi meʻa pē ʻoku tau fiemaʻu ke sio ʻoku tupu, tatau ai pē pe ko ha matalaʻiʻakau, vesitapolo, pe mahuʻingaʻia ʻi he pōpoaki ʻo e Puleʻangá, ʻoku fiemaʻu ke ngāueʻi. ʻOku fiemaʻu ki ai ha taimi, feinga, mo ha faʻa tokanga, pea mo fakapapauʻi ke ʻoua ʻe foʻi. ʻI he taʻu kuo ʻosí, laka hake ʻi he vahe tolu ʻe taha ʻo e taha milioná ʻa e kakai naʻe tupu ai ʻa e tenga ʻo e Puleʻangá naʻa nau papitaiso! Kapau te tau hanganaki malanga, te tau fakapapauʻi ʻe maʻu ha toe tokolahi ange ʻa ia te nau fanongo ki heʻetau pōpoakí.—Fakafehoanaki mo Kalētia 6:9.