Ko Hai Nai Te Ne Tali ha Ako Tohitapu?
1 Naʻe fakahā ʻe he palōfita ko ʻĒmosí ʻe ʻi ai ha honge ʻi he fonua ʻo ʻIsilelí, “ʻo ʻikai ko e honge meʻakai, pe ko e honge meʻainu, ka ko e honge ʻi he fanongo ki he folofola ʻa Sihova.” (Emosi 8:11) Ke ʻaonga ki he faʻahinga ko ia ʻoku fiekaia mo fieinua fakalaumālié, ʻoku tufaki ai ʻe he kautaha ʻa Sihová ha ngaahi tohi faka-Tohitapu lahi fakaʻulia ʻi māmani lahi.
2 ʻI he aʻu ki he taimí ni, kuo mau pulusi ai ʻa e ngaahi tohi ʻIlo ʻe 70 miliona mo e ngaahi polosiua Fiemaʻu ʻe 91 miliona. ʻI hono akoʻi ʻa e moʻoní, ʻoku mau houngaʻia ai ʻi he faingofua mo e ola lelei ʻo e ongo tohí ni. Kae kehe, tokolahi ʻa e kakai tonu ʻoku nau maʻu ʻetau ngaahi tohí kuo teʻeki ai ke nau ako ʻa e Tohitapú mo kitautolu. Ko e hā ʻe lava ke tau fai fekauʻaki mo e meʻá ni?
3 Ko e Ngaahi Tohi Taki Taha Kuo Tufá ko ha Ako Ia ʻe Ala Fai! Fakakaukau ki he meʻa naʻe hokosia ʻe ha tokotaha malanga ʻa ia naʻá ne tuʻuaki ha ako ki ha fefine ʻi he ʻuluaki taimi naʻá ne lea ai kiate ia ʻi he matapaá. Naʻá ne tali leva ia. Ki mui maí, naʻá ne tala ange kiate ia, “Ko koe ʻa e ʻuluaki tokotaha kuó ke tuʻuaki ke ako Tohitapu mo aú.” ʻI ho feituʻú, ko e kakai ʻe toko fiha kuo nau ʻosi maʻu ʻetau ngaahi tohí te nau leaʻaki nai ʻa e meʻa tatau? ʻOku ʻomai ʻe he ngaahi tohi taki taha kuo tufá ha faingamālie ki ha ngaahi toe ʻaʻahi pea mo ha ako Tohitapu ʻi ʻapi.
4 Koeʻuhi ko ʻetau faʻa fetaulaki mo e kakai kuo nau ʻosi maʻu ʻetau ngaahi tohí, ʻe lava fēfē ke tau langaʻi ʻenau mahuʻingaʻiá ʻi hono ʻilo ʻa e meʻa ʻoku ʻi heʻetau ngaahi tohí? Ko e Fakamoʻoni ʻe taha naʻá ne ʻeke hangatonu ki ha tokotaha-ʻapi pe ʻoku ʻi ai haʻane ngaahi fehuʻi faka-Tohitapu, ka naʻá ne pehē pē, “ʻIkai.” Naʻe kītaki pē ʻa e tuofefiné, “ʻOku pau pē ʻoku ʻi ai ha niʻihi.” Naʻe ʻi ai ʻa e fehuʻi ʻa e fefiné, pea naʻe kamata ha ako. Ko e hā ʻoku ʻikai ke ʻeke ai ki he tokotaha-ʻapí pe te ne saiʻia ke ako ʻa e anga ʻo e vakai ʻa e Tohitapú ki ha fehuʻi pe ko ha meʻa ʻokú ne hohaʻa ki ai? ʻAi ke mateuteu ke langaʻi hake ha fehuʻi mahuʻinga kapau ʻoku ʻikai lava ke ne fakakaukau ki ha fehuʻi. Ko e ngaahi fetalanoaʻaki peheé ʻoku fokotuʻu nai ai ha founga ki ha ako tuʻumaʻu ʻo e ngaahi moʻoni tefito ʻo e Tohitapú.
5 Ko e ngāue ako Tohitapú ko e uho ia ʻo ʻetau ngāue fakafaifekaú. Koeʻuhi ʻoku ʻikai ʻaupito ke tau ʻilo pe ko hai nai te ne tali ha ako, ʻoua ʻe toumoua ke tuʻuaki ange ha taha ki he tokotaha kotoa pē ʻokú ke fetaulaki mo iá. Tuku ʻa e meʻá kia Sihova ʻi he lotu, peá ke ngāue ʻo fehoanaki mo hoʻo ngaahi lotú. ʻE vave leva haʻo ʻilo ko e tokotaha ʻokú ke tuʻuaki ange ki ai ha akó te ne tali ia!—1 Sione 5:14, 15.