Ko e Kakai Fiefia Taha ʻi he Māmaní
1 “Monuʻiaā [“fiefia,” NW] ka ko e kakai ʻoku ʻotua ʻaki ʻa Sihova!” (Sāme 144:15) ʻOku fakamatalaʻi ʻe he ngaahi lea ko iá ʻa e Kau Fakamoʻoni ʻa Sihová ʻi he tuʻunga ko e kakai fiefia taha ia ʻi he māmaní. ʻOku ʻikai ha fiefia ʻe lahi ange ka ko ia ʻoku haʻu mei he tauhi ki he ʻOtua moʻoni mo moʻui pē tahá, ko Sihova. Koeʻuhi ko ia ʻa e “ʻOtua fiefiá,” ʻoku tapua atu ʻe he faʻahinga ʻoku nau lotu kiate iá ʻa ʻene fiefiá. (1 Tim. 1:11, NW) Ko e hā ʻa e ngaahi tafaʻaki ʻe niʻihi ʻo ʻetau lotú ʻa ia ʻoku tokoni ki heʻetau hoko ʻo fiefia lahí?
2 Ngaahi ʻUhinga ki he Hoko ʻo Fiefiá: ʻOku fakapapauʻi mai ʻe Sīsū kia kitautolu, ʻoku haʻu ʻa e fiefiá mei he hoko ʻo “ʻiloʻi [ʻetau] fiemaʻu fakalaumālié.” (Mt. 5:3, NW) ʻOku fakafiemālieʻi ʻa e fiemaʻu ko iá ʻe hono ako hokohoko ʻa e Tohitapú pea mo hono maʻu kotoa ʻa ʻetau ngaahi fakataha faka-Kalisitiané. Ko hono ako ʻa e moʻoni ʻo e Folofola ʻa e ʻOtuá kuó ne fakatauʻatāinaʻi ai kitautolu mei he loi mo e hala fakalotú. (Sione 8:32) Kuo toe akoʻi kitautolu ʻe he ngaahi Konga Tohitapú ki he founga lelei taha ʻo e moʻuí. (Ai. 48:17) Koeʻuhi ko e meʻa ko iá, ʻoku tau maʻu ai ʻa e feohi faka-Kalisitiane lelei ʻi loto ʻi heʻetau feohi fakatokoua fiefiá.—1 Tes. 2:19, 20; 1 Pita 2:17.
3 ʻOku tau maʻu ʻa e fiemālie lahi mei he talangofua ki he ngaahi tuʻunga fakaeʻulungaanga māʻolunga ʻa e ʻOtuá, he ʻoku tau ʻiloʻi ʻoku maluʻi ai heni kitautolu pea ʻai ai ʻa Sihova ke fiefia. (Pal. 27:11) Naʻe fakatokangaʻi ʻe ha tokotaha faiongoongo nusipepa: “Neongo ʻa ʻenau ngaahi tuʻunga fefeká kotoa, ʻoku hā ko e Kau Fakamoʻoni ʻa Sihová ʻoku nau fiefia. ʻOku kehe ʻaupito. Ko e fānau īkí pea pehē ki he [faʻahinga taʻumotuʻa ʻia kinautolú] ʻoku hā ʻoku nau fiefia taʻehanotatau mo mafamafatatau lelei.” ʻE lava fēfē ke tau tokoniʻi ha niʻihi kehe ke kau ʻi heʻetau founga moʻui fiefiá?
4 Tokoniʻi ha Niʻihi ke Maʻu ʻa e Fiefiá: ʻOku fonu ʻa e māmaní ʻi he mamahi, pea ʻoku maʻu ʻe he kakaí fakalūkufua ha vakai fakapōpōʻuli ki he kahaʻú. Kae kehe, ʻoku tau maʻu ha vakai māʻalaʻala, ʻo ʻiloʻi ko e mamahí kotoa ʻe hoko ia ʻi ha ʻaho ko e meʻa pē ʻo e kuohilí. (Fkh. 21:3, 4) Ko ia ai, tau kau faivelenga ʻi he ngāue fakafaifekaú, ʻo kumi ʻa e faʻahinga loto-totonú ʻa ē te tau vahevahe atu ki ai ʻetau ʻamanakí pea mo ʻetau ngaahi tui fekauʻaki mo Sihová.—Isi. 9:4.
5 Naʻe pehē ʻe ha tuofefine tāimuʻa: “ʻOku ʻikai ha meʻa ʻe fakafiemālie lahi ange ka ko hono tokoniʻi ha kakai ke ʻilo ʻa Sihova pea mo ʻene moʻoní.” Tau fai ʻa e meʻa kotoa pē te tau malavá ke fakalototoʻaʻi ha tokolahi ange ke nau tali ha ngaahi ako Tohitapu ʻi ʻapi. Ko hono tauhi ʻa Sihova pea foaki atu kitautolu ke tokoniʻi ha niʻihi ke tauhi kiate iá ʻoku ʻomai ai ʻa e fiefia lahi tahá.—Ng. 2:35.