Fāʻūtaha Fiefia mo Sihova pea mo Hono ʻAló
Ko e Meʻa Mahuʻinga Taha ʻo e Taʻú ʻE Kātoangaʻi Ia ʻi Maʻasi 28
1 ʻI hono kātoangaʻi ʻa e Kai Efiafi ʻa e ʻEikí hili ʻa e tō ʻa e laʻaá ʻi Maʻasi 28, 2002, ʻoku tau fakahāhā ai ʻetau fāʻūtaha fiefia mo Sihova ko e ʻOtuá pea mo Sīsū Kalaisi. ʻI he kātoanga mātuʻaki makehe ko iá, ʻe fiefia ai ʻa e toenga ʻo e kau Kalisitiane paní ʻi he “feohi” makehe ʻoku nau kau ai mo e kau kaungāʻea kehe ʻo e Puleʻangá, fakataha mo e Tamaí pea mo hono ʻAló. (1 Sione 1:3; Ef. 1:11, 12) Ko e laui miliona ʻo e “fanga sipi kehe” te nau fakalaulauloto ki he monū laulōtaha ʻoku nau maʻu ʻi he fāʻūtaha mo Sihova pea mo hono ʻAló, hoko ʻo loto-taha mo fakakaukau taha mo kinautolu ʻi hono fakahoko ʻo e ngāue ʻa e ʻOtuá!—Sione 10:16.
2 Ngāue Fakataha ʻi ha Vahaʻangatae Vāofi: Ko Sihova mo Sīsuú ʻokú na fāʻūtaha fiefia maʻu pē. Naʻá na fiefia ʻi he feohi vāofi ʻi ha ngaahi vahaʻa taimi lōloa ki muʻa ke fakatupu ʻa e faʻahinga ʻo e tangatá. (Mai. 5:2) Ko ha haʻi loloto ʻo e ongoʻi ʻofa ʻa ia naʻe fakatupulekina ʻi hona vahaʻá. ʻI he fakasino ʻo e ʻofá, naʻe lava ke pehē ai ʻe he ʻAlo ʻuluaki fakatupú ʻi heʻene ʻi ai ki muʻa ke tangatá: “Naʻá ku hoko ko e tokotaha naʻá ne [Sihova] hōhōʻia tefito ai ʻi he ʻaho ki he ʻaho, ʻou fiefia ʻi hono ʻaó ʻi he taimi kotoa pē.” (Pal. 8:30, NW) Ko hono fakamoleki ʻa e ngaahi taʻu taʻefaʻalaua ʻi he feohi fekoekoeʻi mo e Matavai ʻo e ʻofá naʻe ʻi ai hono kaunga loloto ki he ʻAlo ʻo e ʻOtuá!—1 Sione 4:8.
3 ʻI he fakakaukau ki he fiemaʻu huhuʻi ʻa e faʻahinga ʻo e tangatá, naʻe fili ai ʻe Sihova ʻa hono ʻAlo tofu-pē-taha-ne-fakatupu, ʻa ia naʻe ʻofa tautefito ʻi he tangatá, ke ne tokonaki mai ʻa e feilaulau huhuʻi, ʻa ia ʻokú ne ʻomai ʻetau ʻamanakiʻanga pē tahá. (Pal. 8:31) Hangē ko e fāʻūtaha ʻa Sihova pea mo hono ʻAló ʻi hono fakahoko ʻo ha taumuʻa pē taha, ʻoku tau fāʻūtaha ai pē mo kinaua pea ʻiate kitautolu ʻi ha haʻi ʻo e ʻofa mālohi, ʻo fakahoko fiefia ʻa e finangalo ʻo e ʻOtuá.
4 Fakahaaʻi ʻEtau Houngaʻia Loto-Moʻoní: ʻI heʻetau ʻi ai ʻi he Fakamanatú pea fanongo lelei mo anga-fakaʻapaʻapá, ʻe lava ai ke tau fakahāhā ʻetau houngaʻia moʻoni fakatouʻosi ki he ʻofa ʻa Sihová pea mo e feilaulau ʻa hono ʻAló maʻatautolu. ʻE fakamamafaʻi ai ʻa e faʻifaʻitakiʻanga ʻofa ʻa Sīsuú, ko ʻene loto-tōnunga ki he mate ʻi hono tokonaki mai ʻa e huhuʻí, pea mo hono tuʻunga-pule ʻi he hoko ko e Tuʻi ʻo e Puleʻanga ʻa ia kuo ʻosi fokotuʻu ʻe he ʻOtuá, pea pehē ki he ngaahi tāpuaki ʻe ʻomai ʻe he Puleʻangá ki he faʻahinga ʻo e tangatá. ʻE toe fakamanatu mai ai kiate kitautolu ʻa e fiemaʻu ke hokohoko atu ʻa hono fakahāhā ʻetau tuí, ʻo ngāue faivelenga ʻo fehoanaki mo e finangalo ʻo Sihová ʻi he tuʻunga ko e “kaungāngaue . . . ki he moʻoni.”—3 Sione 8; Sem. 2:17.
5 Tokoniʻi ʻa e Niʻihi Kehé ke Kau mo Kitautolu: ʻOku totonu ke fai ʻe he kulupu ʻo e kau mātuʻá ha feinga makehe ke fakalototoʻaʻi kotoa ʻa e Kau Fakamoʻoni ʻikai longomoʻui ʻi he feituʻu ngāué ke nau maʻu ʻa e Fakamanatu ʻo e pekia ʻa Kalaisí. (Mt. 18:12, 13) ʻAi ha lisi ʻo e faʻahinga ke ʻaʻahi ki aí koeʻuhi ke ʻoua naʻa liʻaki ha taha, pea fakaafeʻi fakafoʻituitui kotoa kinautolu.
6 ʻOkú ke ʻilo ha niʻihi te nau haʻu nai ki he Fakamanatú? Tomuʻa langa hake ʻa ʻenau houngaʻia ki he kātoanga ko ʻení. Fakaafeʻi loto-māfana kinautolu, pea ʻai ke nau ongoʻi ʻoku talitali lelei kinautolu. Tau fai ʻetau lelei tahá ke fakaafeʻi ki he meʻa mahuʻinga lahi taha ko ʻeni ʻo e taʻú ʻa e kotoa ʻo ʻetau kau ako Tohitapú pea mo ha kakai mahuʻingaʻia kehe, pea pehē ki he ngaahi mēmipa ʻo e fāmilí mo e ngaahi mahení. Ko e ngaahi ʻaonga ʻo e huhuʻí ʻoku kei ala maʻu ia ki he tokotaha kotoa pē ʻoku ako ki he “lelei lahi aubito oe ilo o Kalaisi Jisu.” (Fili. 3:8, PM) Ko e faʻahinga ʻoku nau ngāueʻi ʻa e tui ki he feilaulau ʻa Kalaisí ʻe lava ke nau maʻu ai ʻa e ʻamanaki papau ʻo e moʻui taʻengatá.—Sione 3:16.
7 ʻOua ʻaupito ʻe fakasiʻisiʻia ʻa e ʻaonga ʻo e Fakamanatú ki he faʻahinga loto-totonú. ʻI he taʻu ʻe ua kuohilí ʻi he motu ko Pāpua Niu Kiní, naʻe folau ai ha kau mahuʻingaʻia ʻe toko 11 ʻi ha kiʻi vaka ʻo feʻunga mo e houa ʻe 17 ʻi ha tahi hou koeʻuhi ke nau kau ki ai. Ko e hā hono ʻuhingá? Naʻa nau pehē: “Naʻa mau fiemaʻu ke kātoangaʻi ʻa e Fakamanatu ʻo Kalaisí fakataha mo e kaungālotu kia Sihová; ko ia naʻe tuha kotoa mo ia ʻa e folaú.” Fakakaukau atu ki he faivelenga naʻe fakahaaʻi ʻe he faʻahinga mahuʻingaʻia ko iá pea mo ʻenau houngaʻia ʻi he hoko ʻo fāʻūtaha fiefia mo Sihová, ko hono ʻAló pea mo e fetokouaʻaki faka-Kalisitiané!
8 Tuʻuaki ha ako Tohitapu ki he faʻahinga mahuʻingaʻia kotoa pē. Fakaʻaiʻai kinautolu ke nau maʻu maʻu pē ʻa e ngaahi fakataha ʻa e fakatahaʻangá pea ke vahevahe mo e niʻihi kehé ʻa e ngaahi moʻoni ʻoku nau akó. Tokoniʻi kinautolu ke nau ‘aeva i he māmá’ pea ke ‘fai ki he mooní’ ʻaki hono ngāueʻaki ʻa e ngaahi tefitoʻi moʻoni faka-Tohitapú ʻi heʻenau moʻuí. (1 Sione 1:6, 7, PM) Tokoniʻi kinautolu ke fakatupulekina ha vahaʻangatae vāofi mo Sihova pea ke hokohoko atu ʻenau tupulaki ʻi he houngaʻia ʻi he monū ko e fakahoko fāʻūtaha ʻa hono finangaló.
9 Ko ha monū fakaofo ē ke fāʻūtaha fiefia “i he loto be taha, o uouaga taha be, o feiga fakataha i he tui ki he ogoogolelei”! (Fili. 1:27, 28, PM) ʻAi ke tau fakatuʻotuʻa atu ki heʻetau feohi fakataha fiefia ʻi he Fakamanatú ʻi Maʻasi 28, ʻo fakamālō ai pē kia Sihova pea mo hono ʻAló!—Luke 22:19.