Fakamanatu ʻa e Huhuʻí ʻi he Houngaʻia

1, 2. Ko e hā ʻa e ngaahi ʻuhinga ke tau houngaʻia ai ʻi hono fakamanatu ʻa e huhuʻí?

¹ ʻI he talangofua ki he fekau ʻa Sīsuú, ʻe fakatahataha ai ʻa e kau Kalisitiane takatakai ʻi he māmaní hili e tō ʻa e laʻaá ʻi he Tokonaki, Maʻasi 22, 2008, ke fakamanatu ʻa e pekia ʻa Sīsū Kalaisí. (Luke 22:19; 1 Kol. 11:23-26) ʻOku ueʻi kitautolu ke tau fai pehē ko ʻetau houngaʻia lahi ki he kotoa ʻo e meʻa naʻe hoko ʻi he ʻaho ko iá ʻi he taʻu ʻe 1,975 kuohilí. ʻI hono tauhi maʻu ʻa e anga-tonu haohaoa ʻi ha langa mamahi ʻo e pekia he ʻakau fakamamahí, naʻe fakamāʻoniʻoniʻi ai ʻe Sīsū ʻa e huafa ʻo ʻene Tamaí, ʻo ʻoatu ai ʻa e tali lelei taha ki he ngaahi manuki ʻa Sētané.—Siope 1:11; Pal. 27:11.

² Naʻe fakapapauʻi ʻe he taʻataʻa ʻo Sīsū ne lilingí ʻa e fuakava foʻoú, ʻo ʻai ai ʻa e tangatá ke nau hoko ko e ngaahi foha ʻo e ʻOtuá fakataha mo e ʻamanaki ko e pule fakataha mo Kalaisi ʻi heʻene Puleʻanga fakahēvaní. (Sel. 31:31-34; Mk. 14:24) ʻIkai ko ia pē, ko e ʻofa lahi ʻa e ʻOtuá ki he faʻahinga ʻo e tangatá naʻe fakahaaʻi mahino ia ʻi hono foaki ʻa hono ʻAlo ʻofeiná ʻi he feilaulaú, ʻo hangē ko ia naʻe fakamatalaʻi ʻe Sīsū tonu kia Nikotīmasí.—Sione 3:16.

3. ʻE maʻu ʻaonga fēfē ʻa e faʻahinga te nau maʻu ʻa e Fakamanatú?

³ Fakaafeʻi ʻa e Niʻihi Kehé: Ko e ʻīsiu ʻo ʻEtau Ngāue Fakafaifekau ʻo e Puleʻanga ʻo Sanualí ʻoku fokotuʻu mai ai ke ʻai ha lisi ʻo e ngaahi mahení pea fai ha ngaahi fakaafe fakahangatonu fakafoʻituitui. Kuó ke kamata fakaafeʻi ha niʻihi ʻi hoʻo lisí? Kuó ke fokotuʻutuʻu ke kau kakato ki he feingangāue ʻe kamata ʻi Maʻasi 1 ke fakaafeʻi ʻa e kakaí ki he Fakamanatú? Ko e faʻahinga ʻe kau ki aí te nau fanongo ai ki ha fakamatala Fakatohitapu ʻe lava ke langa hake ai ʻenau tui ki he huhuʻí, ʻa ia ʻe taki atu ki he moʻui taʻengatá.—Loma 10:17.

4. Ko e hā ʻoku totonu ai ke tau aʻu tōmuʻa ki he Fakamanatú?

⁴ Ko kinautolu kotoa te nau malavá ʻoku totonu ke nau palani ke aʻu tōmuʻa ki ai ʻo talitali māfana ʻa e faʻahinga ʻoku nau tali ʻa e fakaafe makehé. ʻOku ʻai ʻe he tokolahi ʻo e kau maʻu Fakamanatú ke mātuʻaki mahuʻinga kia kitautolu ke tau tokanga tefito ki he faʻahinga foʻoú pea pehē ki he faʻahinga ʻoku nau maʻu ʻa e ngaahi fakatahá ʻi he taimi ʻe niʻihi.

5. ʻE anga-fēfē nai hoʻo teuteu ho lotó ki he kātoanga ko ʻení?

⁵ Teuteu Ho Lotó: ʻOku ʻi ai ʻa e taimi-tēpile ʻi he Ko Hono Vakaiʻi Fakaʻaho ʻa e Tohi Tapú—2008 mo e 2008 Calendar ki he lau Tohi Tapu makehe ki he Fakamanatú ʻa ia ʻoku kamata ʻi Maʻasi 17. Ko e fakakaukau ki he ngaahi meʻa mahuʻinga ko ia naʻe hoko he lolotonga ʻo e ngaahi ʻaho fakaʻosi ʻo e moʻui ʻa Sīsū ʻi he māmaní ʻe tokoniʻi ai koe ke teuteu ho lotó ki he kātoanga Fakamanatú. (Esela 7:10) Ko e fakakaukauloto faʻa lotu ki he ngaahi fakamatala Fakatohitapu ko ʻení ʻe fakalahiʻi ai ʻetau houngaʻia ki he ʻofa ʻa Sihova mo hono ʻAló ʻi hono tokonaki mai ʻa e huhuʻí.—Sāme 143:5.

6. ʻE anga-fēfē ke tau maʻu ʻaonga mei hono fakatupulekina ʻa e houngaʻia ʻi he huhuʻí?

⁶ ʻI he ofi ange mai ʻa e Fakamanatú, ʻofa ke tau teuteu lelei atu ki ai pea tokoniʻi ʻa e niʻihi kehé ke nau mateuteu ki he kātoanga mahuʻinga ko ʻení. Ko e fakamanatu ʻa e huhuʻí ʻi he houngaʻiá ʻe fakaivimālohiʻi ai hotau vahaʻangatae mo Sihová pea mo hono ʻAló. (2 Kol. 5:14, 15) ʻE toe ueʻi ai kitautolu ke faʻifaʻitaki kia kinaua ʻi hono fakahāhā ʻa e ʻofa feilaulauʻi-kita ki he niʻihi kehé.—1 Sione 4:11.