Founga ʻo Hono Fakatauʻatāinaʻi Kitautolu ʻe he Moʻoní

¹ ʻI ha taimi ʻe taha, naʻe pehē ai ʻe Sīsū ki he kau Siu naʻe tui kiate iá: “ʻE faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.” (Sione 8:32) Naʻá ne lea fekauʻaki mo ha tauʻatāina ʻoku fakalaka ia ʻi he ngaahi tauʻatāina fakasiviliané, ko ha tauʻatāina ʻa ia ʻoku ala maʻu ki he tokotaha kotoa—koloaʻia pe masiva, ako pe taʻeako. Naʻe akoʻi ʻe Sīsū ʻa e moʻoni ko ia te ne ʻomai ʻa e tauʻatāina mei he haʻisia ki he angahalá mo e maté. Hangē ko ia naʻe fakamatala ʻe Sīsuú, “ʻilonga ʻa ia ʻoku fai angahala, ko e popula ia ʻa angahala.” (Sione 8:34) He fakaʻamua ē ʻe kitautolu ʻa e taimi ʻa ia ko e faʻahinga talangofua kotoa ʻo e tangatá “ʻe faifai pea fakaʻataʻata mei heʻene popula ki he ʻauha, kae fakahoko ia ki he tauʻataina fakalangi ʻa e fanau ʻa e ʻOtua”!—Loma 8:21.

² Ko e moʻoni fekauʻaki mo Sīsū mo hono ngafa ʻi hono ngāueʻi ʻa e taumuʻa ʻa e ʻOtuá ʻoku ʻomai ai ʻa e tauʻatāina peheé. ʻOku kau ai ʻa e ʻilo fekauʻaki mo e feilaulau huhuʻi naʻá ne foaki koeʻuhi ko kitautolú. (Loma 3:​24) Naʻa mo e taimí ni, ko hono tali pea fakamoʻulaloa talangofua ki he moʻoni faka-Tohitapú ʻoku ʻai ai ke tau malava ke maʻu ha tuʻunga ʻo e tauʻatāina mei he manavaheé, siva ʻa e ʻamanakí, mo e ngaahi faʻahinga tōʻonga fakatupu maumau kotoa pē.

³ Tauʻatāina mei he Manavahē mo e Siva ʻa e ʻAmanakí: ʻOku fiemaʻu ke ʻoua ʻe siva ʻetau ʻamanakí ʻi he ngaahi tuʻunga ʻo e māmaní koeʻuhi ʻoku tau mahinoʻi ʻa e ʻuhinga ʻoku ʻi ai ai ʻa e fulikivanú pea ʻoku tau ʻiloʻi ʻe vavé ni ke tafiʻi atu ia mei he māmaní. (Sāme 37:​10, 11; 2 Tim. 3:1; Fkh. 12:12) ʻIkai ko ia pē, ʻoku fakatauʻatāinaʻi kitautolu ʻe he moʻoní mei he ngaahi akonaki loi fekauʻaki mo e tuʻunga ʻo e kau maté. ʻOku tau ʻiloʻi ʻe ʻikai lava ke fakahohaʻasi kitautolu ʻe he kau maté, ʻoku ʻikai te nau faingataʻaʻia ʻi ha fakamamahi taʻengata, pea ʻoku ʻikai ʻave ʻe he ʻOtuá ʻa e kakaí ʻi he maté koeʻuhi pē ke nau ʻi hēvani fakataha mo ia ʻi he nofoʻanga laumālié.​—Koh. 9:5; Ng. 24:15.

⁴ Ko e moʻoni peheé naʻe fakaivia ai ha tamai mo ha faʻē ʻi he taimi naʻe mate ai ʻa ʻena tamá ʻi ha fakatuʻutāmaki. “ʻOku ʻi ai ʻa e ongoʻi ngeʻesi ʻi homa lotó ʻe ʻikai lava ke fakafonu kae ʻoua kuó ma toe sio ki homa fohá fakafou ʻi he toetuʻú,” ko e lea ia ʻa e faʻeé. “Ka ʻokú ma ʻiloʻi ʻoku fakataimi pē ʻema mamahí.”

⁵ Tauʻatāina mei he Ngaahi Tōʻonga Fakatupu Maumaú: Ko e moʻoni faka-Tohitapú ʻe lava ke ne liliu ʻa e fakakaukau mo e ʻulungaanga ʻo ha taha, ʻo iku ai ki he tauʻatāina mei he ngaahi palopalema taʻealakalofí. (Ef. 4:​20-​24) Ko e tōʻongaʻaki ʻa e faitotonú mo e ngāue mālohí ʻe lava ke tokoni ia ke fakasiʻisiʻi ʻa e masivá. (Pal. 13:4) Ko hono fakahāhā ʻa e ʻofa feilaulauʻi-kitá ʻokú ne fakaleleiʻi ʻa e vahaʻangatae mo e niʻihi kehé. (Kol. 3:​13, 14) Ko hono tokaʻi ʻa e tuʻunga ʻulu faka-Kalisitiané ʻoku fakasiʻisiʻi ai ʻa e ngaahi faingataʻa ʻi he fāmilí. (Ef. 5:33–​6:1) Ko e fakaʻehiʻehi mei he konaá, ʻulungaanga taʻetaau fakafehokotaki fakasinó, tapaká, mo e maʻukovia ʻe he faitoʻo kona tapú ʻoku tokoni ia ki he moʻui leleí.​—Pal. 7:​21-​23; 23:​29, 30; 2 Kol. 6:19 (7:1, PM).

⁶ Kuo ʻikai malava ha talavou ke fakangata ʻa e maʻunimā taʻu ʻe hiva ʻe he faitoʻo kona tapú. ʻI he ʻaho ʻe taha naʻá ne fetaulaki ai mo ha tokotaha malanga ʻoku kau ʻi he faifakamoʻoni he halá. Naʻá ne tali ʻa e ʻū tohí, pea naʻe fai ʻa e ngaahi fokotuʻutuʻu ke ʻaʻahi kiate ia ʻi hono ʻapí. Naʻe kamata ha ako Tohitapu. ʻI he māhina ʻe ua ki mui aí naʻe tuku ʻosi ʻe he tangatá hono ngāueʻaki ʻa e faitoʻo kona tapú, pea ʻi he hili ʻa e māhina ʻe valu ʻo e akó, naʻá ne papitaiso. ʻI he sio kiate ia kuó ne mavahe mei he maʻunimā ko iá naʻe ueʻi ai ʻa hono tokouá mo e tuofefine-ʻi-he-fonó ke na kamata ako ʻa e Tohitapú.

⁷ Tokoniʻi ʻa e Niʻihi Kehé Ke Nau Maʻu ʻa e Tauʻatāiná: Ko e faʻahinga ʻa ia ko e kau pōpula fuoloa ki he ngaahi akonaki loí te nau ʻiloʻi nai ʻoku faingataʻa ke mahinoʻi ʻa e tauʻatāina ʻoku ʻomai ʻe he Folofola ʻa e ʻOtuá. Ke aʻu ki honau lotó ʻe fiemaʻu nai ki ai ʻa e tōtōivi makehe mo e teuteu lelei ʻi he tafaʻaki ʻa e faiakó. (2 Tim. 4:​2, 5) ʻOku ʻikai ko e taimi eni ke māmālie hifo ai ʻi heʻetau ngāue ko hono ‘fanongonongo ʻa e tukuange ki he populá.’ (Ai. 61:1) Ko e tauʻatāina faka-Kalisitiané ʻoku mahuʻinga. Ko hono maʻu iá ʻoku ʻuhinga ia ko e moʻui taʻengata.​—1 Tim. 4:​16.