Faingataʻaʻia Fakasino—Ka ʻOku Fua Lahi
1 Kapau ʻokú ke ʻi he haʻohaʻonga ʻo e Kau Fakamoʻoni tokolahi ʻa Sihova ʻoku nau faingataʻaʻia fakasinó, ʻe kei lava pē ke ke maʻu ha ngāue fakafaifekau fua lahi. Ko hono moʻoní, ʻe ʻomai nai ʻi ho ngaahi tuʻungá ʻa e ngaahi faingamālie makehe kia koe ke ke fai ai ha fakamoʻoni pea fakalototoʻaʻi ʻa e niʻihi kehé.
2 Fai ʻo ha Fakamoʻoní: Ko e tokolahi ʻa ia kuo pau ke nau fāinga mo ha faingataʻaʻia fakasinó ʻoku nau kau kakato ʻi he ngāue fakafaifekaú. Ko e fakatātaá, ko e tuofefine ʻe taha ʻa ia naʻe uesia lahi ʻe ha tafa ʻa ʻene ʻalú mo ʻene leá naʻá ne ʻiloʻi ʻe lava ke ne kau ʻi he ngāue makasiní kapau ʻe tau ʻe hono husepānití ʻena kaá ʻo ofi ki ha ʻaluʻanga femoʻuekina. ʻI he taimi ʻe taha, naʻá ne tufa ai ha makasini ʻe 80 ʻi he houa pē ʻe ua! Ko ho ngaahi tuʻunga makehé ʻe toe ʻai nai ai koe ke ke fetuʻutaki mo e kakai ʻa ia ʻoku faingataʻa ke aʻu ki ai. Kapau ko ia, vakai kia kinautolu ko ho feituʻu ngāue makehe ia.
3 Ko hoʻo malangá ʻe lava ke ola lelei ʻaupito! ʻI he vakai ʻa e niʻihi kehé ki hoʻo loto-ʻalovilí mo e ola lelei kuo fai ʻe he moʻoni faka-Tohitapú ki hoʻo moʻuí, ʻe tohoakiʻi nai ai kinautolu ki he pōpoaki ʻo e Puleʻangá. ʻIkai ngata aí, ʻi hoʻo fetaulaki mo e kakai ʻoku nau tofanga ʻi he fakafilí, ko e meʻa ʻokú ke hokosia ʻi he moʻuí ʻe teuʻi nai ai koe ke ke ʻoange kia kinautolu ʻa e fakafiemālie mei he Folofola ʻa e ʻOtuá.—2 Kol. 1:4.
4 Fakalototoʻaʻi ʻa e Niʻihi Kehé: ʻIkai naʻe fakalototoʻaʻi koe ʻe he talanoa ki he moʻui ʻa Laurel Nisbet, ʻa ia naʻe nofo ʻi ha mīsini fakamānava feʻunga mo e taʻu ʻe 37 ka naʻá ne tokoniʻi ʻa e faʻahinga tāutaha ʻe toko 17 ke nau hoko ʻo maʻu ha ʻilo totonu ki he moʻoni ʻo e Tohitapú? ʻI he founga tatau, ko hoʻo faʻifaʻitakiʻangá ʻe lava ke ne tākiekina ʻa e kaungātuí ke nau fakafitefitaʻa ʻi he ngāue ʻa Sihová.—g93-E 1/22 p. 18-21.
5 Neongo kapau ʻoku taʻofi koe ʻe ho ngaahi tuʻungá mei he ʻalu ʻi he ngāue fakafaifekaú ʻi he lahi ʻokú ke saiʻia aí ʻe kei lava pē ke ke fakaivimālohiʻi ʻa e niʻihi kehé. Naʻe pehē ʻe ha tokoua ʻe taha: “Kuó u ʻilo naʻa mo ha tokotaha faingataʻaʻia fakasino lahi ʻe lava ke ne hoko ko e tokoni lahi ki he niʻihi kehé. Ko hoku uaifí mo au kuó ma hoko ko ha poupou ʻoku ala maʻu ki he faʻahinga kehekehe ʻi he fakatahaʻangá. Koeʻuhi ko homa ngaahi tuʻungá ʻokú ma ʻi ai maʻu pē, ʻo ala faingamālie maʻu pē.” Kae kehe, koeʻuhi ko hoʻo faingataʻaʻia fakasinó, ʻoku mahino ʻe ʻikai nai te ke malava maʻu pē ke ngāue ʻo fakatatau ki hoʻo faivelengá. Neongo ia, ʻi ha tokoni te ke malava nai ai ke kau longomoʻui ʻi he ngāue fakafaifekaú. Ko ia ai, kapau ʻokú ke fiemaʻu ha tokoni, ʻoua ʻe toumoua ke fakahā ʻeni ki he kau mātuʻá pe ko e niʻihi kehe ʻi he fakatahaʻangá ʻa ia ʻe lava ke nau tokoniʻi koé.
6 ʻOku ʻafioʻi ʻe Sihova ʻa e meʻa kotoa pē ʻokú ke fai koeʻuhi ke tauhi kiate iá, pea ʻokú ne hōifua ki hoʻo ngāue ʻaufuatoó. (Sāme 139:1-4) ʻI hoʻo falala kiate iá, ʻe lava ke ne fakaivia koe ke ke maʻu ai ha ngāue fakafaifekau fua lahi mo mohu ʻuhinga.—2 Kol. 12:7-10.