Mou Kofuʻaki ʻa e Anga-Fakatōkilaló
1 ʻOku falala ha tamasiʻi tauhi-sipi kia Sihova peá ne ikunaʻi ha fuʻu pāteʻi-tau mālohi. (1 Sam. 17:45-47) ʻOku kātekina anga-kātaki ʻe ha tangata koloaʻia ʻa e faingataʻá. (Siope 1:20-22; 2:9, 10) ʻOku fakahanga ʻe he ʻAlo ʻo e ʻOtuá ʻa e lāngilangi kotoa ʻi heʻene faiakó ki heʻene Tamaí. (Sione 7:15-18; 8:28) ʻI he ngaahi faʻifaʻitakiʻanga taki taha ko ení, naʻe fakahoko ai ʻe he anga-fakatōkilaló ha ngafa tefito. ʻI he tuʻunga tatau he ʻahó ni, ʻoku mātuʻaki mahuʻinga ʻa e anga-fakatōkilaló ʻi he ngaahi tuʻunga ʻoku tau fehangahangai mo iá.—Kol. 3:12.
2 ʻI he Taimi Malangá: ʻI he tuʻunga ko e kau faifekau faka-Kalisitiané, ʻoku tau vahevahe atu anga-fakatōkilalo ʻa e ongoongo leleí ki he kakai ʻo e faʻahinga kehekehe kotoa pē, ʻo ʻikai tomuʻa fakamāuʻi kinautolu makatuʻunga ʻi honau matakalí, anga fakafonuá, pe puipuituʻá. (1 Kol. 9:22, 23) Kapau ʻoku anga-taʻefakaʻapaʻapa ha niʻihi pe siʻaki loto-fieʻeiki ʻa e pōpoaki ʻo e Puleʻangá, ʻoku ʻikai te tau taliʻaki ʻi ha founga tatau ka ʻoku tau hokohoko atu anga-kātaki ʻa e kumi ki he faʻahinga tāú. (Mt. 10:11, 14) ʻI he ʻikai feinga ke ʻai ke maongo ki he niʻihi kehé ʻetau ʻiló pe tuʻunga fakaakó, ʻoku tau fakahanga ʻa e tokangá ki he Folofola ʻa e ʻOtuá, ʻi he ʻiloʻi ʻoku fakatupu fakalotoʻi ange ia ʻi ha meʻa pē nai te tau leaʻaki. (1 Kol. 2:1-5; Hep. 4:12) ʻI he faʻifaʻitaki kia Sīsuú, ʻoku tau ʻave ai ʻa e fakahīkihikí kotoa kia Sihova.—Mk. 10:17, 18.
3 ʻI he Fakatahaʻangá: Ko e kau Kalisitiané kuo pau foki ke nau ‘noʻo kotoa ʻaki kinautolu ʻa e fakakaukau fefakatōkilaloʻakí.’ (1 Pita 5:5, NW) Kapau ʻoku tau vakai ki he niʻihi kehé ʻoku nau māʻolunga ange ʻia kitautolu, te tau kumi ki he ngaahi founga ke tauhi ai ki hotau fanga tokouá kae ʻikai ʻamanekina ke nau tauhi kitautolu. (Sione 13:12-17; Fili. 2:3, 4) ʻE ʻikai te tau ongoʻi ʻoku tau māʻolunga ʻi he ngaahi ngāue ko ia hangē ko hono fakamaʻa ʻa e Fale Fakatahaʻangá.
4 ʻOku tokoniʻi kitautolu ʻe he anga-fakatōkilaló ke ‘fekatakiʻaki pe ʻi he ʻofá’ pea pouaki ai ʻa e melino mo e fāʻūtaha ʻi he fakatahaʻangá. (Ef. 4:1-3) ʻOkú ne tokoniʻi kitautolu ke tau anganofo ki he faʻahinga kuo fakanofo ke nau takimuʻá. (Hep. 13:17) ʻOkú ne ueʻi kitautolu ke tali ha faleʻi pe ko ha akonaki pē ʻoku ʻomai nai kia kitautolu. (Sāme 141:5) Pea ʻoku ueʻi kitautolu ʻe he anga-fakatōkilaló ke falala kia Sihova ʻi he taimi ʻoku tau tokangaʻi ai ha ngaahi monū pē ʻoku tau maʻu nai ʻi he fakatahaʻangá. (1 Pita 4:11) ʻI he hangē ko Tēvitá, ʻoku tau ʻiloʻi ʻoku fakatuʻunga ʻa e lavameʻá ʻo ʻikai ʻi he malava fakaetangatá ka ʻi he tāpuaki ʻa e ʻOtuá.—1 Sam. 17:37.
5 ʻI he ʻAo Hotau ʻOtuá: Hiliō he meʻa kotoa, ʻoku fiemaʻu ke tau ‘fakavaivaiʻi [“fakatōkilaloʻi,” NW] kitautolu ʻi he lalo nima mafimafi ʻo e ʻOtuá.’ (1 Pita 5:6) Kapau kuo pau ke tau fāinga mo e ngaahi tuʻunga faingataʻá, te tau fakaʻamu nai ki he fakanonga ʻa ia ʻe ʻomai ʻe he Puleʻangá. Ka ʻoku tau ngāueʻi fakatōkilalo ʻa e kātakí, ʻo tatali kia Sihova ke ne fakahoko ʻene ngaahi talaʻofá ʻi heʻene taimi kotofá. (Sem. 5:7-11) Hangē ko ia naʻe hoko ki he tokotaha tauhi anga-tonu ko Siopé, ko ʻetau tokanga muʻomuʻá ke “maloʻia ai pe ʻa e huafa ʻo Sihova.”—Siope 1:21.
6 Ko e palōfita ko Tanielá naʻá ne ‘fakavaivaiʻi [“fakatōkilaloʻi,” NW] ia ʻi he ʻao ʻo hono ʻOtuá’ pea naʻe tāpuakiʻi ia ʻaki ʻa e hōifua ʻa Sihová mo e ngaahi monū lelei lahi. (Tan. 10:11, 12) ʻOfa ke tau kofuʻaki tatau kitautolu ʻa e anga-fakatōkilaló, ʻi he ʻiloʻi “koe totogi oe agavaivai [“anga-fakatōkilaló,” NW] moe manavahe kia Jihova koe koloa, moe ogoogolelei, moe moui.”—Pal. 22:4, PM.