Ko ha Tohi mei he Kulupu Pulé
ʻI HEʻETAU tuʻu ʻi he hūʻanga ko ia ki he fokotuʻutuʻu foʻou ka hoko mai ʻo e ngaahi meʻá, ʻoku fiemaʻu fakavavevave ke tau hanganaki ʻamanaki kia Sihová. (Sef. 3:8) Naʻe pehē ʻe he palōfita ko Tanielá ko e “ʻOtua . . . ko ha Tokotaha-Fakaeʻa ʻo e ngaahi meʻa fakaliloliló, pea kuó ne fakaʻilo . . . ʻa e meʻa ʻe hoko ʻi he konga fakaʻosi ʻo e ngaahi ʻahó.” (Tan. 2:28, NW) He monū makehe moʻoni ia ke moʻui ʻi he ngataʻanga ʻo e vahaʻa taimi ko ia naʻe tomuʻa talá pea ke mahinoʻi ʻa e ngaahi fakalilolilo fakaʻotua ʻoku lolotonga ʻai ʻe Sihova ke ʻiloá!
Kuo fakaeʻa fakalakalaka ʻe Sihova fakafou ʻi he “tamaioeiki agatonu mo boto,” ʻa ʻene taumuʻa ke fakatahatahaʻi ha “fuʻu kakai lahi” fakavahaʻapuleʻanga ʻo e kau lotú ʻi he lolotonga ʻo e “kuonga fakamui” faingataʻa ko ení. (Mt. 24:45, PM; Fkh. 7:9; 2 Tim. 3:1) ʻOku fakamatalaʻi ʻe he Aisea 2:2, 3 (NW) ʻa e ngaʻunu fakaemāmani lahi ko ení ʻi heʻene hā “ʻi he konga fakaʻosi ʻo e ngaahi ʻahó.” ʻI he taʻu taki taha, ʻoku hokohoko atu ai ʻa e fakatahatahaʻi ko ení ʻi he lolotonga ʻo e moveuveu mo e fakamālohi ʻa ia ʻoku mafolalahia ʻi he māmani ko ení.
Lolotonga ʻa e taʻu 2004, kuo ʻai ai ke tau toe lāuʻilo lahi ange ki he fiemaʻu ke talangofua ki he ngaahi lea ʻa Sīsuú: “Ko ia ke mou leʻo . . . Ko ia ke toka teuteu ʻa kimoutolu foki.” (Mt. 24:42, 44) ʻOku moʻoni, ko e meʻa ʻoku lolotonga hoko ʻi he māmaní ʻoku ʻi ai ʻene ʻuhinga lahi fakaʻulia ki he kau Kalisitiané, ʻa kinautolu ʻoku nau lāuʻilo ki he “ngaahi fakaʻilonga kuonga” pea tali ʻo fakatatau ki ai. (Mt. 16:1-3) ʻI hono fakahoko ʻo ʻene Folofolá, ʻe hokohoko atu ʻa Sihova ke kau mo ʻene kakai kuo fokotuʻutuʻu fakateokalatí neongo ha fakafepaki pē te nau fetaulaki nai mo ia.
Neongo ʻa e ngaahi feinga ko ia ʻa e niʻihi ke fakafaingataʻaʻiaʻi pe taʻofi ʻa hono talaki ʻo e Puleʻangá, ʻoku hokohoko atu hotau fanga tokouá ke leaʻaki ʻa e moʻoní pea ke fakatahataha fakataha. (Ng. 5:19, 20; Hep. 10:24, 25) ʻI Lūsia ʻi he lolotonga ʻo Sune 2004, naʻe poupouʻi ʻe ha fakamaauʻanga tangi ʻi Mosikou ʻa e tuʻutuʻuni ʻa ha fakamaauʻanga māʻulalo ange ke tapui ʻa e ngaahi ngāue ʻa e Kau Fakamoʻoni ʻa Sihová pea ke fakataʻeʻaongaʻi ʻenau kautaha fakalao ʻi he kolo ko iá. Ka neongo ia, ʻoku ʻikai ke loto-siʻi ai ʻa e fanga tokouá; ʻoku nau ʻiloʻi ʻa e meʻa ʻoku fiemaʻu ʻe he ʻOtuá meiate kinautolú, pea nau talangofua kiate ia ko e Pulé kae ʻikai ki he tangatá. (Ng. 5:29) ʻOku tau tuipau ʻe tataki ʻe Sihova ʻene kau sevānití neongo ha ngāue fakalao fakafili pē.
ʻI he Lepupilika ʻo Siōsiá lolotonga ʻa e ngaahi taʻu siʻi kuo maliu atú, naʻe hokosia ai ʻe he fanga tokouá ʻa e mole ʻo ʻenau koloá, faingataʻaʻia ʻi he fakamālohi mei he kakaí pea nau sio tonu ʻi hono tutu ʻo ʻenau ʻū tohí. Ka naʻe ʻikai siaʻa ha mahafu naʻe faʻu ke fai ʻaki ha kovi kiate kinautolu. (Ai. 54:17) Lolotonga ʻa e taʻu fakangāue 2004, naʻe toe tali fakalao ai ʻa e Kau Fakamoʻoni ʻa Sihová ʻi Siōsia. Naʻe fakahoko ai ʻa e ngaahi fakataha-lahí ʻo ʻikai ha fakahohaʻa, pea ʻoku hū tauʻatāina ʻa e ʻū tohí ki he fonuá. Naʻe līpooti ha tumutumu foʻou ʻi he kau malangá mo e maʻu Fakamanatú.
ʻI he Lepupilika ʻo Kōleá, Luanitā, Tekimēnisitani, ʻAmīnia mo ʻElitiliá, kuo tuku pilīsone ai ʻa e fanga tokouá koeʻuhi ko ʻenau tuí. Neongo hono ngaohikoviʻí, ʻoku nau ʻiloʻi ʻa e ʻuhinga Fakatohitapu ko ia ki honau ngaahi ʻahiʻahí, ʻa ia ʻoku tokoniʻi ai kinautolu ke nau tauhi maʻu ʻa e anga-tonú ʻi heʻenau hanga kia Sihova ki ha fakahaofí.—1 Pita 1:6; 2 Pita 2:9.
ʻI hoʻo sivisiviʻi ʻa e Līpooti Taʻu Fakangāue ki he 2004 ʻi he Taua Leʻo ʻo Fepueli 1, 2005, te ke fiefia ai ʻi he anga-lelei ʻa Sihová. (Sāme 31:19; 65:11) Ko ʻemau ʻamanakí ia ʻe fakalototoʻaʻi kimoutolu ʻe he līpooti ko ení ke hokohoko atu hoʻomou ʻaʻeva ʻi ha founga ʻoku fakahōifua ki he ʻOtuá.—1 Tes. 4:1.
Kuo hokohoko atu hono fakahoko ha ngaahi feinga lahi ke aʻu ai mo e moʻoní ki he faʻahinga kotoa pē ʻo e tangatá. Ko e fakatātaá, ko e ngaahi vitioó, DVD mo e ngaahi naunau kehe ʻi he lea fakaʻilongá pea mo e ngaahi tohi maʻá e kau kuí kuo teuteuʻi ke tokoniʻi fakalaumālie ʻaki e kau tulí mo e kau kuí. Ko e tokolahi ʻo e kau malanga ʻo e Puleʻangá kuo nau ako ʻa e ngaahi lea kuo leaʻaki ʻe he kau muli ʻoku nofo hili mai ʻi he feituʻu ʻo ʻenau fakatahaʻangá.
Tānaki atu ki ai, ʻoku laui teau ʻa e ngaahi kulupu mavahe kuo fokotuʻu ʻi he ngaahi feituʻu ʻoku faingataʻa ke aʻu ki aí. Ko e vaʻa ʻe taha ʻoku ʻi ai ʻa e ngaahi kulupu mavahe laka hake ʻi he 300 ʻoku faʻuʻaki ʻa e kau malanga laka hake ʻi he toko 7,000. ʻOku fakahaaʻi moʻoni heni ʻa e ngaahi malava ʻoku maʻu ʻe he ngaahi fakatahaʻanga foʻoú! ʻIkai ngata aí, ko e toko 16,760,607 ʻi he Fakamanatu ʻo e taʻu fakangāue ko ení, laka hake ai he toko 10 milioná naʻe ʻikai ko ha Kau Fakamoʻoni. Ko ha fakahaaʻi mālohi eni ʻo e utu-taʻu motuʻu ʻoku teʻeki ai ke utú.
ʻOku tau ʻoatu ʻa e fakamālō kia Sihova ki heʻene tāpuaki fakakoloá pea mo e founga ʻofa ʻa ia ʻokú ne tokanga mai ai kia kitautolu ʻi he ʻaho ki he ʻahó. (Pal. 10:22; Mal. 3:10; 1 Pita 5:7) ʻI heʻetau ngaʻunu fāʻūtaha atu ki muʻa lolotonga ʻa e “konga fakaʻosi [ko eni] ʻo e ngaahi ʻahó,” ko ʻetau tuipaú mo e falalá ʻoku ʻia Sihova. Tatau ai pē pe ko e hā ʻa e ngaahi palopalema te tau fetaulaki nai mo iá, ʻai ke tau tukulotoa ʻa e konga tohi fakataʻu ki he 2005: “Ko hoku tokoni ʻoku meia Sihova.” (Sāme 121:2) Kātaki ʻo fakapapauʻi ʻoku mau ʻofa atu mo lotu atu maʻa kimoutolu.
Ko homou fanga tokoua,
Kulupu Pule ʻo e Kau Fakamoʻoni ʻa Sihová