Failelei pea Foaki ki he Niʻihi Kehé
1 Ko Toakasé “naʻe mohu ʻi he ngaahi ngaue lelei, mo e fai ʻofa ki he tuʻutamaki.” (Ng. 9:36, 39) Ko ʻene laumālie loto-fiefoakí naʻe ʻofaʻi ai ia fakatouʻosi ʻe he kakai naʻa nau ʻiloʻi iá pea mo Sihova ko e ʻOtuá. ʻOku pehē ʻe he Hepelu 13:16 (PM): “Ka koe fai lelei, moe foaki, ke oua naa galo: he koe gaahi feilaulau behe oku leleiia ai ae Otua.” ʻE lava fēfē ke tau fai lelei mo foaki ki he niʻihi kehé ʻi he ʻahó ni?
2 Ko e founga ʻe taha ʻe lava ke tau ʻai ai ke maʻu ʻaonga ʻa e niʻihi kehé ko hono foaki ʻetau “koloa.” (Pal. 3:9) Ko ʻetau ngaahi tokoni fakapaʻanga ki he ngāue ʻi māmani lahí ʻoku ʻai ai ke malava ʻo langa ʻa e ngaahi Fale Fakatahaʻanga, Holo ʻAsemipilī mo e ngaahi fale he vaʻá ʻi he kotoa ʻo e māmaní. Ko ʻetau loto-fiefoakí kuó ne ʻai ai ke malava ʻa e laui miliona ʻo maʻu ʻaonga mei he fakahinohino fakateokalatí mo e feohi fakalaumālie fakatupu langa haké.
3 Foaki ʻa e Fakafiemālie: ʻI he taimi ʻoku hoko ai ʻa e ngaahi fakatamakí, ʻoku mateuteu ʻa e kakai ʻa Sihová ke “ngaue ʻaonga” ki he kaungātuí pea pehē foki ki he faʻahinga ʻoku ʻikai te nau kau ʻi heʻetau tuí. (Kal. 6:10) Hili e pā ʻa ha fale ngāue ngaohiʻanga kemikale ʻi Falanisē, naʻe pehē ʻe ha ongo meʻa mali naʻá na nofo ofi ki he fale ngāué: “Naʻe haʻu leva ʻa homa fanga tokoua Kalisitiané ke tokoni ʻi hono fakamaʻa ʻa homa lokí pea pehē ki he ngaahi loki ʻo e faʻahinga kehe ʻi he falé. Naʻe ʻohovale ʻaupito ʻa homa ngaahi kaungāʻapí ke sio ki he tokolahi ʻaupito ʻa e kakai naʻe ō mai ke tokoní.” Naʻe tānaki mai ʻe ha tuofefine ʻe taha: “Naʻe ō mai ʻa e kau mātuʻá ke tokoniʻi kimautolu. Naʻa nau haʻu ke fakalototoʻaʻi kimautolu. Ko hono moʻoní, ko e meʻa ʻeni naʻa mau fiemaʻú, ʻo lahi ange ia ʻi ha tokoni fakamatelie.”
4 Lolotonga ʻoku ʻi ai ʻa e ngaahi founga lahi ʻe lava ke tau failelei ai ki hotau ngaahi kaungāʻapí, ko e founga ʻaonga taha ʻe lava ai ke tau tokoniʻi kinautolú ko hono foaki atu ʻa e ʻilo mahuʻinga ʻo e moʻoní, ʻa ia ʻoku kau ai ʻa e “ʻamanaki ki he moʻui taʻengata” ʻa ia naʻe talaʻofa tonu ʻe Sihová. (Tai. 1:1, 2) ʻOku ʻomai ʻe he pōpoaki ʻo e Tohi Tapú ʻa e fakafiemālie moʻoni ki he faʻahinga ʻoku nau mamahi ʻi he ngaahi tuʻunga ʻo e māmaní pea ʻi honau tuʻunga angahalaʻiá tonu. (Mt. 5:4) ʻOfa ke tau fai lelei pea foaki ki he niʻihi kehé ʻi he taimi ʻoku mafai ai ʻa hotau nimá ke fai peheé.—Pal. 3:27.