Puha Fehuʻi
◼ ʻE lava fēfē ke poupou ʻa e tokotaha kotoa ke tauhi maʻu ha laumālie ʻe tokoni ki he ako ʻi he fakataha ʻa e fakatahaʻangá? (Teu. 31:12)
ʻI he ʻapasia loloto kia Sihova mo ʻene tokonaki ʻo e fakataha ʻa e fakatahaʻangá, ʻoku fakalototoʻaʻi ʻa e tokotaha kotoa ke nau aʻu tōmuʻa ki ai pea ke mateuteu ke ne akoʻi kinautolu. ʻOku ʻaonga ke nofo ʻi he ngaahi sea ʻi muʻa ʻi he holó, ʻo ʻatā ai ʻa e sea ʻi muí ki he faʻahinga ʻoku ʻi ai ʻenau fānau īkí mo e faʻahinga ʻoku nau tōmui ʻi he taimi ki he taimi. Ki muʻa ke kamata ʻa e fakatahá, ʻoku totonu ke seti ʻa e ngaahi meʻa fakaʻilekitulōniká ki ha tuʻunga ʻe ʻikai fakahohaʻasi ai ʻa e kau fanongó. ʻE siʻi mo holo hifo ʻa e fakahohaʻá ʻi he taimi ʻoku tauhi maʻu ai ʻe he faʻahinga kotoa ʻi aí ha fakakaukau ʻapasia ʻi he kotoa ʻo e fakatahá.—Koh. 5:1; Fili. 2:4.
ʻI he kamata maʻu fakataha ʻa e faʻahinga foʻoú, ʻe nofo nai mo kinautolu ha taha ʻi he fakatahaʻangá ʻoku nau mahení. ʻE tautefito ʻa e ʻaonga ʻa e meʻá ni kapau ʻoku ʻi ai ha fānau iiki ke akoʻi. Ko hono maʻu ʻo e fakatahá ko ha hokosia foʻou nai ia ki he fāmilí. Kapau ko ia, ʻoku ngalingali te nau houngaʻia lahi ʻi he malava ke nau tangutu ʻi mui ʻa ia ʻe siʻi ange ai ʻa e fakahohaʻasi ʻo e niʻihi kehé ʻi he fiemaʻu ʻe he mātuʻá ke nau mavahe fakataimi mei he holo tefitó ke tokangaʻi e fiemaʻu ʻa e fānaú. (Pal. 22:6, 15) Ko e fāmili ʻoku ʻi ai ʻenau fānau īkí ʻoku ʻikai totonu ke nau nofo ʻi ha loki mavahe ʻa ia ʻe ongoʻi tauʻatāina nai ai ʻa e fānaú ke nau longoaʻa. ʻOku faʻa lelei tahá ki he mātuʻá ke ne fakahoko ʻa e akonakí pe ko hono tokangaʻi ʻa e ngaahi fiemaʻu fakafoʻituitui kehé ʻi tuʻa ʻi he holo tefitó pea foki leva mo e fānaú ki loto.
ʻOku ngāue ʻa e kau fakanofonofó ke tauhi maʻu ha laumālie ʻoku feʻungamālie ki ha fale faiʻanga lotu. ʻOku nau tokoniʻi ʻa e ngaahi fāmilí mo e faʻahinga ʻoku nau tōmui he taimi ki he taimí ke kumi hanau nofoʻanga feʻungamālie. ʻOku fiemaʻu ke tokanga mo fakapotopoto ʻa e kau fakanofonofó ʻi hono tokoniʻi ʻa e niʻihi kehé ke nau tangutu fiemālie ʻo ʻikai fakahohaʻasi noaʻia. ʻOku nau ngāueʻaki ʻa e fakafuofua leleí ʻi hono fakaleleiʻi ha ngaahi fakahohaʻa taʻeʻamanekina. ʻI hono fakahohaʻasi ʻa e niʻihi kehé ʻe ha tōʻonga ʻa ha kiʻi tama, ʻe fai nai ʻi he anga-lelei ʻe he kau fakanofonofó ha tokoni.
Ko e faʻahinga kotoa ʻi he fakataha ki he lotú ʻe lava ke nau poupou ki ha laumālie ʻe tokoni ki he ako fekauʻaki mo Sihova mo ʻene taumuʻa ki ha māmani foʻou melino mo māʻoniʻoni.—Hep. 10:24, 25.