ʻE Lava Ke Ke Kau he Ngāue Fakafaifekau ʻi he Ngaahi ʻAho Sāpaté?
1. Ko e hā ʻe lava ke tau ako mei he ngaahi ngāue ʻa Paula mo hono ngaahi kaungāmeʻá ʻi Filipaí?
1 Ko e ʻaho Sāpaté, ko ha ʻaho ia naʻe mālōlō ai ʻa e kau Siu tokolahi taha ʻi Filipaí. Ko Paula mo hono ngaahi kaungāmeʻá naʻa nau ʻaʻahi ki he koló lolotonga ʻa e taha ʻo ʻenau ngaahi fononga fakamisinalé. Heʻikai ha taha te ne mei fakaangaʻi kinautolu ʻi heʻenau mālōlō mei heʻenau ngāue fakafaifekaú ʻa ia naʻe tuha moʻoni mo kinautolu foki ʻi he ʻaho ko iá. Kae kehe, naʻa nau ʻilo naʻe fakatahataha ha kau Siu ʻi tuʻa he koló ke lotu, ko ia naʻa nau ngāueleleiʻaki ʻa e faingamālié ke malanga kia kinautolu. He fiefia moʻoni ē kuo pau naʻe maʻu ʻe Paula mo hono ngaahi kaungāmeʻá ʻi he fanongo ʻa Litia pea papitaiso ʻa e kotoa hono falé! (Ng. 16:13-15) Koeʻuhi ʻoku mālōlō ʻa e tokolahi he ʻahó ni ʻi he ʻaho Sāpaté, ko e hā ʻoku ʻikai ke ngāueʻaki ai ha konga ʻo e ʻaho ko ení ke malanga ai kia kinautolú?
2. Ko e hā ʻa e ngaahi pole kuo ikuʻi ʻe he kakai ʻa Sihová koeʻuhi ke malanga ai ʻi he ʻaho Sāpaté ʻo ʻikai fakahohaʻasí?
2 Ko e Faitau Maʻá e Malanga Sāpaté: Lolotonga ʻa e 1927, naʻe fakalototoʻaʻi ai ʻa e kakai ʻa Sihová ke fakamoleki ha konga ʻo e ʻaho Sāpate kotoa pē ʻi he ngāue fakafaifekaú. Naʻe iku leva eni ki ha fakafepaki. Naʻe puke ʻa e tokolahi ʻi ʻAmelika ki hono maumauʻi ʻa e ngaahi lao faka-Sāpate ʻo e ʻaho Sāpaté, fakahohaʻasi ʻa e melinó, mo fakatau atu taʻeʻiai ha laisení. Ka naʻe ʻikai ke foʻi ai ʻa e kakai ʻa Sihová. ʻI he 1930 tupú, naʻa nau fokotuʻutuʻu ai ha “ngaahi feingangāue fakavāhenga,” ʻa ia ko e kau malanga mei he ngaahi fakatahaʻanga takatakaí te nau fakataha ke kāpui ha feituʻu ngāue. ʻI he taimi ʻe niʻihi ʻi hono puke ʻa e kau malangá, ne nau fuʻu tokolahi ʻo ʻikai malava ai ʻe he kau maʻu mafaí ke taʻofi. ʻOkú ke houngaʻia moʻoni ʻi he ngaahi feilaulau naʻe fai ʻe he fanga tokoua ko iá kae malava ke tau malanga ʻi he ʻaho Sāpaté ʻo ʻikai fakahohaʻasi?
3. Ko e hā ʻokú ne ʻai ʻa e ʻaho Sāpaté ko ha ʻaho lelei ia ke kau ai ʻi he ngāue fakafaifekaú?
3 Ko ha ʻAho Lelei ʻAupito ki he Malangá: Ko e kakai tokolahi ʻoku nau ʻi ʻapi mei he ngāué ʻi he ʻaho Sāpaté. ʻOku nau faʻa fiemālie lahi ange. Ko e kau maʻu lotu ʻe niʻihi ʻoku nau hehema lahi ange ke talanoa fekauʻaki mo e ʻOtuá ʻi he ʻaho ko ení. Kapau ʻoku fai ʻetau fakatahá ʻi he ʻaho Sāpaté, ʻoku tau ʻosi ʻai vala ai pē ʻo hangē ki he ngāue fakafaifekaú, ko ia ko e hā ʻoku ʻikai ke palani ai ki ha ngāue fakamalanga ki muʻa pe hili ʻa e fakatahá? Kapau ʻoku fiemaʻu, teuteu ha kiʻi kai maʻamaʻa ke ʻalu mo ia.
4. Ko e hā ʻa e fiefia ʻe lava ke tau hokosia kapau ʻoku tau fakamoleki ha konga ʻo e ʻaho Sāpaté ʻi he ngāue fakafaifekaú?
4 Kapau te tau ngāueʻaki ha konga ʻo e ʻaho Sāpaté ki he ngāue fakafaifekaú, te tau kei maʻu pē ʻa e taimi ke maʻu ʻa e mālōlō ʻoku tau fiemaʻú. Pea ko ʻetau mālōloó ʻoku ō fakataha ia mo e fiemālie ko e ola ʻo ʻetau kau ʻi he ngāue toputapú. (Pal. 19:23, PM) ʻE aʻu nai ʻo tau hokosia ʻa e fiefia ʻo hono maʻu ha taha hangē ko Litiá!