Ngaahi Hokosia mei he 2011 Yearbook
POLIVIA
Naʻe ʻIkai Te Ne Tukituki
Peesi 55, palakalafi 1-2
Naʻe lotu ʻa Miriam ki he ʻOtuá ʻo feʻunga mo ha uike ʻe taha. Ko ʻene lotú naʻe peheni: “Kātaki ʻo tokoniʻi au ke u ʻiloʻi koe, ka ʻoku ʻikai te u fiemaʻu tokoni au mei he Kau Fakamoʻoni ʻa Sihová. ʻOku ʻikai te u loto au ke nau tukituki mai ʻi hoku matapaá.”
Ki mui ange ʻi he uike ko iá naʻe tatangi e telefoní. Ko Candy ia ne tā angé, ko ha tāimuʻa makehe, ʻa ia naʻá ne tala ange kia Miriam te ne ʻoange ʻetau makasiní ʻi he houa ʻe taha mei ai. Naʻá ne tali ia. ʻI loto ʻi he houa ʻe taha mei ai naʻe ʻi hono matapaá ai ʻa Candy. Naʻe fakaava fakavave ʻe Miriam ʻa e matapaá peá ne fekau kia Candy ke hū ange ʻo tangutu. Naʻe kamata leva ke taulaka holo ʻa Miriam mo kalokalo hono ʻulú, ʻo hā mahino ʻokú ne ʻita. Naʻe ʻeke ange ʻe Candy pe ko e hā e meʻa ʻoku hokó. “ʻOku ou moʻutāfuʻua!” ko e lea ange ia ʻa Miriam. “Laka hake ʻi he uike ʻe taha mo ʻeku lotu ki he ʻOtuá ki ha fakahinohino mo ha tataki, ka naʻá ku fakahā mahino ʻaupito ʻi heʻeku ngaahi lotú naʻe ʻikai te u loto ke haʻu ʻa e tokoní mei he Kau Fakamoʻoni ʻa Sihová ʻa ia ʻoku nau tukituki maʻu pē ʻi hoku matapaá! Pea hili pē iá naʻá ke telefoni mai koe kae ʻikai te ke tukituki mai! Talu hoʻo tā mai ʻi he houa ʻe taha ne toki ʻosí mo ʻeku lotu ki he ʻOtuá ke ʻoua muʻa naʻá ke haʻu ʻo ʻaʻahi mai kiate au. Pea kuó ke haʻu koe ia! ʻOku ou moʻutāfuʻua! ʻOku mātuʻaki hā mahino mai ʻokú Ne fiemaʻu ʻa e kakai ko kimoutolú, ʻa e Kau Fakamoʻoni ʻa Sihová, ke mou tokoniʻi au.” Naʻe kamata leva ha ako ʻi he taimi pē ko iá.
PĀPUA NIU KINI
Peesi 138, palakalafi 3-4
Lolotonga ʻa e tāimuʻa ʻi Hula, naʻe kamata ai ʻe Don mo Shirley Fielder ha ako Tohi Tapu pea mo Alogi mo Renagi Pala. “Ko Alogi ko ha tokotaha kaihaʻa ia pea naʻá ne kē maʻu pē mo e niʻihi kehé,” ko e tohi ia ʻe Don. “Naʻá ne tofanga ʻi ha mahaki ʻi he feituʻu talopikí ʻa ia naʻá ne ʻai hono kilí ke hā matamatakovi, pea naʻe keina ʻa e konga hono ngutú ʻe ha pala ʻi he feituʻu talopikí. Fakatouʻosi ʻa ia mo hono uaifí naʻá na toe fakateka betel nut foki, ko ia ko hona ngaahi vahavahaʻa nifo ʻa ia kuo ʻuliʻulí naʻe faʻa hā lanu kulokula toto mai ia. Ko Alogi naʻe ʻikai ko ha faʻahinga tokotaha ia naʻe ʻamanekina ʻe tohoakiʻi mai ki he moʻoní. Ka neongo ia, ko ia mo hono uaifí naʻá na hoko ʻo mahuʻingaʻia ʻi he moʻoní peá na maʻu ʻetau ngaahi fakatahá, ʻo na tangutu fakalongolongo pē ʻi mui.
“Laka hake he vahaʻa taimi ko e māhina ʻe ono,” ko e manatu ia ʻa Don, “naʻa mau sio ai ki ha liliu fakaofo ʻia Alogi. Naʻe ʻikai ke ne kei kaihaʻa, kē mo fakakikihi, pea ko ia mo Renagi naʻá na fakamaʻa fakaesino kinaua pea kamata ke na kau ʻi he ngaahi fakatahá. Naʻe toe kamata foki ke na vahevahe atu ʻa e ongoongo leleí ki he niʻihi kehé. Ko hono moʻoní, naʻá na hoko mo ha niʻihi kehe tokolahi ko e fuofua kau malanga ia ʻi he feituʻu ko eni ko Hula.”