Ngaahi Hokosia mei he 2011 Yearbook
LEPUPILIKA TOMINIKA
Peesi 59, palakalafi 1-2
Faifakamoʻoni ʻi he Tā Fika Hala
Naʻe maʻu ʻe ha tuofefine ha ngaahi tā telefoni fika hala, ʻa ia naʻe fakahohaʻasi ai ʻene ngāué. Hili ha ngaahi ʻaho siʻi, naʻá ne fakakaukau, ‘ʻE lava ke u ngāueʻaki ʻa e fakahohaʻa ko ení ke malanga ai.’ Naʻe anga-fēfē ʻene fai iá? ʻI heʻene tali ʻa e ngaahi tā fika hala angé, naʻá ne pehē naʻá ne fakaʻofaʻia he kuo tā fika hala ange ʻa e tokotahá, ka naʻá ne toe pehē leva, “Tuku ke u maʻu ai leva ʻa e faingamālié ni ke ʻeke atu, Kuó ke lau ʻa e Tohi Tapú he ʻahó ni?” Neongo naʻe tāpuni mai ʻe he niʻihi ʻa e telefoní, naʻe tokotokolahi ʻa e faʻahinga naʻa nau tali mai kuo teʻeki ke nau lau ʻe kinautolu ʻa e Tohi Tapú. Naʻá ne ʻeke ange leva, “ʻOkú ke ʻilo ʻa e ʻuhinga ʻoku mātuʻaki mahuʻinga aí?” Ke ʻoatu ha tali Fakatohitapu, te ne lau leva ʻa e Saame 1:1-3. Naʻe talanoa fuoloa ha ʻōfisa fakapuleʻanga mo e tuofefiné ʻo ne pehē naʻe ʻikai ʻi ai haʻane Tohi Tapu ʻana. Naʻe fai leva ʻa e ngaahi fokotuʻutuʻu ke ʻave ki ai ha Tohi Tapu mo ha ngaahi tohi Fakatohitapu. Hili ha uike ua mei ai naʻá ne telefoni ange, ka ko e taimi ko ení ke fakamālō ki he tuofefiné ʻi heʻene mahuʻingaʻia angé mo e ʻū tohí.
ʻI ha tā fika hala ʻe taha, naʻe ʻeke ʻe ha kiʻi fefine, “Ko e taha koe ʻo e Kau Fakamoʻoni ʻa Sihová?” ʻI he tali ange ʻa e tuofefiné ʻió, naʻe kamata ke tangi ʻa e fefiné, ʻo fakamatala ko iá ko ha tokotaha malanga ʻikai longomoʻui. Naʻe fakalototoʻaʻi ʻe he tuofefiné ia pea fokotuʻutuʻu ki ha taha ke tokoniʻi fakalaumālie ia. Kuo hoko he taimí ni ʻa e fefiné ko ha tokotaha malanga kuo toe longomoʻui.
ʻAOSITELĒLIA
Peesi 70, palakalafi 7
Mateuteu mo e ʻŪ Tuleki
ʻOku faʻo ʻe Nathan taʻu 12, ʻa e ngaahi tuleki Fakatohitapu ʻi heʻene kato akó pea faifakamoʻoni maʻu pē ki hono ngaahi kaumeʻa ʻi he ʻapiakó. ʻI he ʻaho ʻe taha, lolotonga ʻene lue ki ʻapi mei he akó, naʻá ne sio ki ha fefine taʻumotuʻa ʻoku tuʻu mai ʻi muʻa ʻi hono ʻapí. Naʻe malimali ange ʻa e fefiné, ko ia naʻe malimali atu ʻa Nathan mo ʻoange kiate ia ʻa e taha ʻo ʻene ngaahi tulekí. Naʻe tala ange leva ʻe he fefiné ki ai kuo mālōlō hono husepānití ʻi he taʻu ʻe tolu ki muʻá. ʻI he meʻá ni naʻe ala hifo ʻa Nathan ki heʻene kató ʻo toʻo hake ʻa e tuleki Ko e Hā ʻa e ʻAmanaki ki he Ngaahi ʻOfaʻanga Kuo Maté? Naʻe fonu loʻimata e mata ʻo e fefiné ʻi he talanoa ange ʻa Nathan fekauʻaki mo e toetuʻu ʻe hoko maí ʻa ia ʻe lava ke ne toe sio ai ki hono husepānití ʻi he Palataisí. “Ka ʻe ngata ʻa e faingataʻa kotoa pē ʻafē?” ko e ʻeke ia ʻa e fefiné. Naʻe ala hifo ʻa Nathan ki ha toe tuleki ʻe taha, Ko e Faingataʻá Kotoa Kuo Vavé Ni ke Ngata! Naʻe ʻeke ange leva ʻe he fefiné kia Nathan pe ko e hā ha toe meʻa ʻokú ne tui ki ai. Ko ia naʻá ne ʻoange kiate ia ha toe tuleki ai pē ʻe taha mei heʻene kató, Ko e Hā ʻOku Tui Ki Ai ʻa e Kau Fakamoʻoni ʻa Sihova? Hili iá, naʻe mavahe leva ʻa Nathan. ʻI ha ngaahi uike mei ai naʻá ne toe sio ki he fefiné ʻi muʻa ʻi hono ʻapí. Naʻe ui ange ia ʻe he fefiné ʻo fāʻofua kiate ia. “ʻOkú ke pehē ko e hā e meʻa ne hokó, Nathan?” ko ʻene leá ia. “Hili hoʻo ʻomai ʻa e ngaahi tulekí, naʻe ʻaʻahi mai ha ongo fefine Fakamoʻoni kia au, pea ʻoku ou ako ʻa e Tohi Tapú mo kinaua he taimí ni!”