Ko ha Tohi mei he Kulupu Pulé
ʻAlā Siʻi Kaungā Kau Fakamoʻoni ʻa Sihova:
ʻOku mau fiefia lahi ke tohi atu kiate kimoutolu siʻi kaungāsevāniti faitōnunga ʻa Sihova, ʻa ia ʻoku toko fitu miliona tupu he taimí ni. ʻI he taimi ʻokú ke feʻiloaki ai mo ha kaungātui mei ha tafaʻaki ʻe taha ʻo e māmaní, ʻokú ke ongoʻi leva ha haʻi makehe ʻo e ʻofa ki he tokotaha ko iá. (Sione 13:34, 35) ʻOku ʻikai ha veiveiua ʻi hoʻo lau ʻa e Yearbook ko ení, ko e ngaahi fakamatala fakaueʻiloto ʻo e tui mo e mateaki ʻa ho fanga tokoua mo e fanga tuofāfine ʻi he ngaahi fonua kehekehe ʻe toe fakatupunga ai koe ke ke ongoʻi ʻa e haʻi laulōtaha ko iá.
Ko e ngaahi līpooti mei he māmaní takatakai ʻoku fakahaaʻi ai ko e fuʻu tokolahi ʻo kimoutolu ʻoku mou fakahoko fakamātoato hoʻomou polokalama Lotu Fakafāmilí. Ko kimoutolu ʻoku ʻi ai hoʻomou fānau īkí kuo mou ngāueʻaki ʻa e pōtoʻi lahi ke puke mo tauhi ʻaki ʻa e tokanga ʻa hoʻomou fānaú. (ʻEf. 6:4) ʻOku tohoakiʻi ʻo toe ofi ange ʻa e ngaahi hoa malí ko ha ola ia ʻo hono fakahoko ʻo e polokalamá ni. (ʻEf. 5:28-33) Ko e moʻoni, ko e faʻahinga tāutaha mo e ngaahi fāmilí ʻoku nau maʻu ʻaonga mei he fokotuʻutuʻu ko eni ki hono ako loloto ʻa e Folofola ʻa e ʻOtuá.—Sios. 1:8, 9.
ʻOku mau kaungāongoʻi fakataha mo kimoutolu kotoa kuo mou tofanga ʻi he ngaahi mole koeʻuhi ko e ola ʻo e ngaahi fakatamaki fakanatula ki muí ni mai. ʻOku mau maʻu ʻa e faingamālie ko ení ke fakamālō atu ai ki he tokolahi kuo nau kau atu, ʻikai toumoua, ʻi he ngaahi feinga tokoni lolotonga ʻa e ngaahi taimi fakatamaki peheé. (Ngā. 11:28-30; Kal. 6:9, 10) Tānaki atu ki ai, ʻi he fakatahaʻanga taki taha, ʻoku ʻi ai ʻa e faʻahinga ʻia kimoutolu ʻoku mou ʻilo ki he ngaahi fiemaʻu fakamatelie ʻa hotau fanga tokouá pea ʻoku nau fai fakalongolongo pē ʻa e tokanga kia kinautolú. Hangē ko Toakase ʻo e kuonga muʻá, ʻoku mou mohu ʻi he “ngaahi ngāue lelei mo e ngaahi foaki ʻofa.” (Ngā. 9:36) Mou ʻilo pau ʻoku fakatokangaʻi eni ʻe Sihova pea te ne toe totongi atu ʻo fakatatau ki ai.—Māt. 6:3, 4.
ʻI he ngaahi fonua ʻe niʻihi, kuo tāpalasia ʻa homou ngaahi totonú ʻe he faʻahinga ʻoku nau mioʻi ʻa e ngaahi laó koeʻuhí ke “fakamamahi.” (Saame 94:20-22) ʻI hono ʻilo naʻe tomuʻa tala ʻe Sīsū ʻa e fakatanga peheé, ʻoku mou kātekina loto-toʻa ia pea hanga kia Sihova ko homou hūfanga. (Sione 15:19, 20) Mou ʻiloʻi pau ʻoku mau huʻekina maʻu pē kimoutolu siʻi ngaahi ʻofaʻanga ʻi heʻemau ngaahi lotú ʻi hoʻomou hokohoko atu ke “fai ha taukapo ʻi he ʻao ʻo e tokotaha kotoa ʻokú ne kounaʻi meiate kimoutolu ha ʻuhinga ki he ʻamanaki ʻoku ʻiate kimoutolú.”—1 Pita 3:13-15.
ʻOku mau fakaongoongoleleiʻi loto-māfana ʻa e laui miliona ʻo kimoutolu ʻoku mou nofoʻaki maʻa fakaeʻulungaanga ʻi he taʻu ki he taʻu neongo ʻa e ngaahi ʻoho taʻemīngao ʻa Sētane ʻaki ʻa e fakalielia mo ʻene ngaahi founga kākā ʻo hono fakamafola iá. ʻI ha taimi ʻoku tūʻulu atu ai ʻa e ngaahi tuʻunga fakaeʻulungaanga ʻa e māmaní ki he ngaahi tuʻunga loloto ange, ʻoku mou “maʻu ʻa e mālohí ʻi he ʻEikí pea ʻi he māfimafi ʻo hono iví.” (ʻEf. 6:10) Kuo “mou tui ʻa e teunga tau kakato mei he ʻOtuá,” pea ʻoku mou tuʻu maʻu ai ʻo fakafepakiʻi ʻa e “ngaahi ngāue kākā ʻa e Tēvoló.” (ʻEf. 6:11, 12) Mou ʻilo ʻoku ngāueʻaki ʻe Sihova hoʻomou faʻifaʻitakiʻangá ke ʻoatu ai ha tali mahino ki he tokotaha-manukí, ʻa Sētane!—Pal. 27:11.
Naʻa mau fiefia ke ʻilo ʻi he 2011, naʻe ʻi ai ʻa e toko 19,374,737 ʻi he Fakamanatu ʻo e pekia ʻa hotau ʻEikí. Ko e fuʻu fika tokolahi ko ia ʻo e kau maʻu Fakamanatú naʻe ʻikai mei pehē ia ʻi hono konga ka ko hoʻomou tali tokolahi ki he fiemaʻu ʻo ha kau tāimuʻa tokoni ʻi ʻEpeleli ʻo e taʻu kuo ʻosí. Ko e laui miliona ʻo e kakai ʻi he māmaní naʻe lava ke nau fanongo ki he ongo fāʻūtaha ʻo e fakahīkihiki kia Sihova ʻoku haʻu mei heʻene Kau Fakamoʻoni mateakí! (Loma 10:18) Pe ko e taha koe ʻo e toko 2,657,377 ʻa ia naʻa nau hoko ko e kau tāimuʻa tokoni ʻi he māhina ko iá pe naʻá ke feinga mālohi ke fakalahi hoʻo ngāué ʻi ha faʻahinga founga, ko kimoutolu kotoa naʻa mou ʻai kimautolu ke mau fiefia lahi koeʻuhí ko hoʻomou laumālie fiengāue mo vēkeveke ki he ngāué.—Saame 110:3; Kol. 3:23.
ʻI he taʻu kuo ʻosí, naʻe fakahāhā ai ʻe he faʻahinga foʻou ʻe toko 263,131 ʻenau fakatapui kia Sihová. ʻOku mau fakamālō kia Sihova ʻi he meʻá ni, pea ʻoku mau fakamālō kia kimoutolu kotoa ʻi hoʻomou kau fakataha mo kimautolu ʻi hono fakaaʻu atu ʻa e fakaafe ki ha toe niʻihi kehe: “Haʻu!” Pea tuku ki ha taha pē ʻoku fieinuá ke ne haʻu; tuku ki ha taha pē ʻokú ne loto ki aí ke ne toʻo taʻetotongi ʻa e vai ʻo e moʻuí.” (Fkh. 22:17) Tautautefito hili ʻa e lāulea ki he ngaahi tafaʻaki ʻo e Puleʻanga kuo fokotuʻu ʻo e ʻOtuá ʻi heʻetau ngaahi fakataha-lahi fakavahe 2011, ʻoku tau leaʻaki ʻi he ongoʻi lahi ange ʻi ha toe taimi, “Tuku ke Hoko Mai ʻa e Puleʻanga ʻo e ʻOtuá!” ʻI hono ueʻi ʻe he fakapapau ʻa Sīsū, “ʻoku vavé ni ke u ʻalu atu,” ʻoku tau tānaki ʻaufuatō atu hotau ngaahi leʻó ki he tali ʻa e ʻapositolo ko Sioné: “ʻĒmeni! Hāʻele mai, ʻEiki Sīsū.”—Fkh. 22:20.
ʻI hoʻomou hanganaki leʻo ki he meʻa fakafiefia ko ia ka hokó, mou ʻilo pau muʻa ʻoku mau ʻofa moʻoni atu ki he tokotaha taki taha ʻo kimoutolu siʻi fanga tokoua mo e siʻi fanga tuofāfine ʻofeina, ʻoku mou fakamoʻoniʻi hoʻomou ʻofa kia Sihová “ʻi he ngāue mo e moʻoni”!—1 Sio. 3:18.
Ko homou fanga tokoua,
Kulupu Pule ʻo e Kau Fakamoʻoni ʻa Sihová